Read KIMERU BIBLE PROTESTANT EDITION 2Ma 4 Bible Online

2Ma 4 - KIMERU BIBLE PROTESTANT EDITION bible

2Ma 4

¹ Solomoni nî aakîre kîritîro kîa igongwana na îturutia. Nakîo kîaarî kîa ûraaja bwa mita îkûmi (10m) na waariî bwa mita îkûmi (10m) na mita ithaano (5m) gwitia bwa îgûrû.

²Ningî arathithia îtangi rîa îturutia rîa kîthiûrûrî. Narîo rîaarî na wariî bwa mita ithaano (5m), na mita ijîîrî na nusu (2.5m) gwitia bwa îgûrû, na mita îkûmi na ithaano (15m) kûthiûrûka.

³Bwa îgûrû îtangi rîu rîagemetue na mbicha ikari ta ndeegwa ithiûrûkîte îtangi rîonthe. Nacio ciaringi îturutieene rîrîa îtangi rîathithagua, irî ithiûrûri biîrî, kîmwe îgûrû rîa kîngî.

⁴Narîo îtangi rîu rîakinyithîtue îgûrû rîa ndeegwa cia îturutia îkûmi na ijîîrî. Ithatû cierekerete bwa ûrîo na ithatû bwa rûgûrû, na ithatû bwa ûmotho na ithatû bwa gaiti. Magûrû jaacio ja nyuma jaarî bwa ndeene.

⁵Rûthingo rwa îtangi rwaarî na ûmatu bwa centimita mûgwanja na nusu. Rwakûmi bwa kaja ta gîkombe kana îrao rînanchûki. Narîo nî rîang'anagîra rûûjî rwa lita ngiri mîrongo îtantatû (60,000).

⁶ Ningî Solomoni nî aathithîrie itegû îkûmi: bitaano bireekwa bwa ûmotho bwa kîûrû na bitaano bingî bwa ûrîo. Nabio biaarî bia kûthambagîria into bia igongwana bia gwakîîria. Îtangi narîo rîaarî rîa kûthambagîrwa nî athînjîri-Mûrungu.

⁷ Ningî arathithia itugî îkûmi bia thaabu bia kûrîîkagîîra taawa ta ûrîa kwaarî bithithue, arabiîka kîûrûûne ndeene, bitaano rûteere rwa ûrîo, na bitaano rûteere rwa ûmotho.

⁸ Aracoka aratuma meetha îkûmi araciîka kîûrûûne: ithaano bwa ûrîo na ithaano bwa ûmotho. Ningî arathithia mpakûri îgana cia thaabu.

⁹Ningî arathithia kîarago kîa athînjîri-Mûrungu na kîarago kîrîa kînene. Aracoka arathithia mîrango ya kîarago na aramîereeria na îturutia.

¹⁰Narîo îtangi aarîîkîre mûthieene jwa kîûrû jwa ûmotho rûteere rwa gaiti.

¹¹Hiramu arathithia nyongû na itai birîa bibinene na mpakûri. Arathiria ngûgî îrîa eejîte kûritîra mûnene Solomoni kîûrûûne kîa Mûrungu. Into birîa aathithîrie nî bibi:

¹²itugî bio-biîrî; biongo bio-biîrî bia itugî biu birîa biakari ja tûraî; mîtungo îrîa yakari ja mîkathî îrîa yagemeetie biongo bio-biîrî bia itugî;

¹³mîng'uanano ya matuunda ja îturutia magana jana îrîa yathithîtie mîtungo îîu. O mûtungo jwagemetue na mîari îîrî ya mîng'uanano îîu ya matuunda.

¹⁴Ningî nî athithîtie into îkûmi bia kûrîkagîîra mpakûri na mpakûri îkûmi;

¹⁵na kinya itangi amwe na ndeegwa îkûmi na ijîîrî irîa ciaarî rungu rwaarîo

¹⁶na nyongû, na itai, na nchibe, na into bia ndeene bionthe birîa mûtea ûu Hiramu athithîîrie Solomoni bia kîûrû kîa MWATHANI. Nabio abithithîtie na îturutia rîrîa rîthongi buru rîkwenaenia.

¹⁷Mûnene Solomoni athithîrîtie into biu bionthe mûgwanthîîne jwa Jorodani naarîa kwaarî na mûthetu jwa yûmba gatîgatî ga Sukothi na Zereda.

¹⁸Nabio into birîa biathithîrue biaarî bibingî mono. Ûrito bwa îturutia rîrîa rîatumîri bûtîûmba kûmenyeka.

¹⁹Ningî Solomoni nî aathithîrie into bionthe bia ndeene ya kîûrû. Nabio nî: kîritîro kîa igongwana, kîrîa kîathithîtue na thaabu, na meetha cia kûrîkîîra mîgaate ya kûritîra Mûrungu;

²⁰na itugî bîa kûrîkîîra taawa, na taawa cia thaabu irîa nthongi irîa ciakaraga îgwetue mbere ya antû arîa atheru buru kûringana na ûrîa kweranîîtwe;

²¹maûa ja kûgemia, na taa, na mîchuuma ya riiko birîa biathithîtue na thaabu intheru mono;

²²mîgwati ya kworia taa, na mpakûri, na into bia gûkamata ubaani, na ngîo cia gûkamata makara. Into biu bionthe biaarî bia thaabu îrîa ntheru buru. Nayo mîrango ya kaja ya kîûrû na mîrango yaantû arîa atheru buru yagemetue na thaabu îgûrû kunthe.