Read KIMERU BIBLE PROTESTANT EDITION 2Ma 5 Bible Online

2Ma 5 - KIMERU BIBLE PROTESTANT EDITION bible

2Ma 5

¹ Nayo ngûgî ya gwaka kîûrû kîa MWATHANI îrathira. Solomoni araikia into birîa îthe Daudi aathûrîrîte MWATHANI. Nabio nî: fetha na thaabu na into bia ndeene bionthe, na arabiîka kûrîa gweekagwa mûthithû jwa into bia goro ndeene ya kîûrû.

² Solomoni aratûmanîra akûrû ba Israeli, na atongeeria ba mîîrîga na ba mîciî ya antû ba Israeli bareeta Jerusalemu nîkenda beeta kûgîîra Îthandûkû rîa Kîrîkanîro kîa MWATHANI kuuma Zaiûni, ntûûra ya Daudi.

³Nabo antû bau ba Israeli boothûranîre kîrî mûnene îgiiteene rîa mambura ja Tûgaanda mweriine jwa mûgwanja.

⁴Nabo akûrû ba Israeli bonthe baroothûrana, nabo Alawi baraakamata Îthandûkû,

⁵bararîkûrûkia kîûrûûne. Barajûkia kinya îema rîa gûtirimanîra amwe na into biarîo bionthe barabikûrûkia kîûrûûne.

⁶Solomoni na kîûthûrano kîonthe gîa antû ba Israeli barîa beejîte kîrî we baroothûrana mbere ya Îthandûkû rîa Kîrîkanîro bakîritaga igongwana bia ng'ondu na ng'ombe inyiingî mono itîngîûmba gûtarîka.

⁷Nabo athînjîri-Mûrungu baraikia Îthandûkû rîa kîrîkanîro kîa MWATHANI antû arîa aathuranîri nîûntû bwa rîo kîûrûûne ndeene, antû arîa atheru buru, bararîîka rungu rwa mathagu ja kerubi.

⁸Najo mathagu ja kerubi jaatambûrûkîte îgûrû rîa antû au Îthandûkû rîaarî jakarîkunîkîra amwe na mîaro îrîa rîakamatagwa nayo.

⁹Mîaro îîu nî yaarî îmîraaja mono nîûntû mîthia yaayo nî yoonekaga muntû arî kîûrûûne bwa ndeene buru îndî îrî o ndeene ya antû arîa atheru mono. Îndî îtoonekaga muntû arî bwa oome. Nayo îrî o kinya naarua.

¹⁰ Gûtî gîntû kîaarî îthandûkûûne rîu tiga mbechua irîa ijîîrî Musa eekîrîte ku arî kîrîmeene gîa Sinai arîa MWATHANI aathithîrie kîrîkanîro na antû ba Israeli rîrîa baumaga Misri.

¹¹Nabo athînjîri-Mûrungu baraumauma antû arîa atheru buru. Athînjîri-Mûrungu barîa baarî o bonthe nî baitheretie batîkûûria muntû nî wa gîkundi kîrîkû kana kîrîkû.

¹²Nabo Alawi barîa aini bonthe, ja bo Asafu na Hemani na Jeduthuni, amwe na ataana baao na antû ba ndûgû ciaao baarûngi rûteere rwa ûrîo rwa kîritîro kîa igongwana beekîrîte nguû inthongi mono na bakîringaga thaani cia kûringithania na inanda na wandîîndî. Ningî nî kwaarî na athînjîri-Mûrungu îgana rîa mîrongo îîrî barîa baaringaga tarumbeta.

¹³ Nabo aringi ba tarumbeta na ba thaani cia kûringithania na ba into birîa bingî barainanîria amwe rwîmbo rwa gûkumia MWATHANI na kûmûcokeria nkaatho na kajû gakanene bakiugaga: “MWATHANI nî ûmwega; Nîkwîthîrwa kîaao kîaawe gîtûûraga kenya na kenya.” Narîo îtu rîroojûra kîûrûûne kîa Mûrungu o îgiita rîu,

¹⁴nabo athînjîri-Mûrungu bararemwa nî kûrita ngûgî ciaao nîûntû bwa ûrîa mwago jwa MWATHANI jwoojûrîte kîûrûûne.