Read KIMERU BIBLE PROTESTANT EDITION 2Ma 6 Bible Online

2Ma 6 - KIMERU BIBLE PROTESTANT EDITION bible

2Ma 6

¹Rîu Solomoni arauga ûjû, “MWATHANI augîîte arîenda gûtûûraga îtuune rîrîtumanu.

²Nandî ngûgwaakîra kîûrû gîkînene na gîkîega, kûrîa gwe ûgatûûraga kenya na kenya.”

³Kîrîndî gîa Israeli kîonthe kîrûngi au, Solomoni arakîerekera, arakîtharima.

⁴ Nawe arauga: “MWATHANI Mûrungu wa Israeli arokumua, We warîîrie baaba Daudi na kanyua kaawe na rîu nî ojûrîîtie na njara ciaawe mantû jarîa amwîrîre akiugaga atîrî,

⁵‘Kuuma ntukû îrîa ndaaritire antû baakwa nthî ya Misri, ntathuura ntûûra îngî kuuma mwîrîgeene noo jûmwe jwa Israeli mbakîrwa nyomba ku nîkenda riîtwa rîaakwa rîtûûraga ku. Ningî gûtî muntû ûngî ndathuura aa mûtongeeria wa antû baakwa ba Israeli.

⁶Îndî rîu nkûthuura Jerusalemu nîkenda riîtwa rîaakwa rîtûûraga ku, na ndathuura Daudi atongagîîria antû baakwa ba Israeli.’

⁷Baaba Daudi nî agiitîte nkoroone yaawe gwaakîra MWATHANI Mûrungu wa Israeli kîûrû, nîûntû bwa Riîtwa rîaawe.

⁸Îndî MWATHANI nî eerîre baaba Daudi ûjû, ‘Nî ûthithîtie bwega nîûntû bwa gwîkîra îthûgaania nkoroone rîa gwaka kîûrû nîûntû bwa Riîtwa rîaakwa.

⁹Îndî rî, tîgwe ûgaaka kîûrû kîu. Ûrîa ûgagîaka nî mûtaana waaku wengwa, ûu nîwe ûgaaka kîûrû nîûntû bwa Riîtwa rîaakwa.’

¹⁰Nandî MWATHANI nî oojûrîîtie wîrane bwaawe ta ûrîa augîîte. Nî anenkerete waathani bwa baaba Daudi, na ndakarîra rûriga rwa ûnene bwa Israeli o ta ûrîa MWATHANI augîîte. Ningî nandî ndîgwaaka kîûrû nîûntû bwa Riîtwa rîa MWATHANI Mûrungu wa Israeli,

¹¹na ndeeka îthandûkû ku rîrîa rîrî na kîrîkanîro kîa MWATHANI kîrîa ariikanîîre na antû ba Israeli.”

¹²Solomoni aracoka ararûngama mbere ya kîritîro kîa igongwana bia MWATHANI mbere ya kîrîndî kîonthe gîa Israeli araambaaria njara ciaawe.

¹³Solomoni nî aakîte rûtara rwa îturutia rwa ûraaja bwa mita ijîîrî na nusu (2.5m), na waariî bwa mita ijîîrî na nusu (2.5m), na mita imwe na nusu (1.5m) gwitia bwa îgûrû ararwîka kîaragoone kîa bwa oome gatîgatî. Arakinya rûtareene rûu îgûrû araturia maru mbere ya kîrîndî gîa Israeli kîonthe, na araambaaria njara bwa îgûrû.

¹⁴Nawe araromba ûjû: “Îî MWATHANI, Mûrungu wa Israeli: gûtî Mûrungu ûngî ta gwe îgûrû kana nthîgûrû. Gwe nî ûûjûragia kîrîkanîro gîaaku kîa wendo kîrî nthûûmba ciaaku irîa igwîtîkagia na nkoro yonthe.

¹⁵Nî ûingîtie uuge bwaaku bwa mantû jarîa weerîîre nthûûmba yaaku Daudi Baaba. Weekîre wîrane na kanyua gaaku, na rîu nî ûbûjûrîtie na njara yaaku ta ûrîa gûkari naarua.

¹⁶ Nandî MWATHANI, Mûrungu wa Israeli ûjûria wîrane bwaaku bûrîa werîîre nthûûmba yaaku Daudi, baaba, ûramwîra, ‘Ûtîkoroaga muntû wa gûkaraga mbere yaakwa rûrigeene rwa ûnene bwa Israeli, këethîra bunka ataana baaku bakamenyagîîra gûtûûraga batongeeretue nî Waatho bwaakwa ta ûrîa gwe ûtwîîre ûthithagia.’

¹⁷Tontû bûû, Gwe MWATHANI Mûrungu wa Israeli, reka rîu wîrane bwaaku bûrîa weerîîre nthûûmba yaaku Daudi bûûjûre.

¹⁸ Îndî rî, Mûrungu oomba gûtûûrania na antû gûkû nthîgûrû? Atîrî, këethîra ûtîûmba kûng'anîra îgûrû na kinya îgûrû buru rî, no kîûrû gîkî mbakîte ûng'anîra!

¹⁹Îndî amwe na bûu, thikîîra îromba rîa nthûûmba yaaku na kwithaithanîîra kwaawe. Gwe MWATHANI Mûrungu waakwa thikîîra kîrîro na îromba rîrîa nthûûmba yaaku îkûromba mbere yaaku.

²⁰ Karagia kîûrû gîkî ûtukû na mûthenya, nîûntû aja nîo waugîre ûgatûûria Riîtwa rîaaku. Igua itû îromba rîrîa nthûûmba yaaku îkûromba nîûntû bwa antû aja.

²¹Igua maromba ja nthûûmba yaaku na ja antû baaku ba Israeli rîrîa beeja kûrombera antû aja. Bathikagîîre ûrî îgûrû, gîtûûro gîaaku, na wabaigua, ûkabarekera.

²²Rîrîa muntû eeîîria mûtûûri waawe na eerwa aciîtie, akëeja kwîja agaciîtia mbere ya kîritîro kîa igongwana gîaaku kîûrûûne gîkî rî,

²³Gwe ûkaigagua ûrî kûu îgûrû na ûkathithia ûrîa kwagîrîte. Ûgatuujagîra nthûûmba ciaaku îgamba nawe ûrîa wîîtie ûkamûkanûkia kûringana na maatia jaawe. Nawe ûrîa ûtî na maatia ûmûrekeerie.

²⁴Rîrîa antû baakû ba Israeli boombwa ndweene nî anthû nîûntû bwa gûkwîîria, bagûcokeera bairirîte, bakîrombaga na kwithaithanîîra kîrî gwe kîûrûûne gîkî,

²⁵ûbaigague ûrî kûu îgûrû, naagwe ûkarekera antû baaku ba Israeli meeyia jaao, na ûkabacokia nthî îrîa wabaeere amwe na beethe.

²⁶Rîrîa îgûrû rîaingwa nayo ngai îrega kuura, nî ûrîa antû baaku bakwîîrîîtie, bakëeja kûromba beerekerete antû aja bakîgwetaga Riîtwa rîaaku na bagatigana na wîîyia, nîûntû bwa ûrîa ubakanûkîtie rî,

²⁷ûbaigue ûrî kûu îgûrû na ûrekere nthûûmba ciaaku, antû ba Israeli meeyia jaao. Ûbaritane mûtûûrîre jûrîa mwega, ningî uurithie ngai nthîgûrû îrîa waeere antû baaku îrî rûgai rwaao.

²⁸Rîrîa kwagîa mpara nthîgûrûûne, kana mûrimo jûmûthûûku, kana ruuo rûrîa rûîîthagia irio miuundeene, kana mûrimo jwa kworia irio, kana gûkëeja kûgîa ngigî na ing'inyo, kana rîrîa anthû baacîgîîria ntûûra îmwe yaao; kana o ûntû bunthe bwa kûbathangîkîa ja mîrimo;

²⁹muntû ûmwe kana kîrîndî gîaaku kîonthe kîa Israeli bakëeja kûromba kana kwithaithanîîra o muntû arîîkîîtie kwirira nîûntû bwa mîthangîko yaawe na arî na kwithikîîra; nawe arombe atambûrûkîîtie njara bwa kîûrû gîkî

³⁰wiigue maromba jaao gwe ûrî o kûu îgûrû kûrîa ûtûûraga na ûbarekere meeyia jaao. Ningî ûrîee o muntû kûringana na mathithio jaawe jonthe ta ûrîa wiijî nkoro yaawe (nîûntû nîgwe gwenka wiijî nkoro cia antû),

³¹nîkenda bagûkîraga na bakwathîkîra matukû jonthe jarîa bagatûûra nthîgûrû îrîa waeere biûjûjû bieetû.

³²Kinya mûgeni ûrîa ûtî ûmwe wa antû baakû Israeli eejîte kuuma nthî ya kûraaja nîûntû bwa nkuma ya Riîtwa rîaaku na mathithio jaaku jamanene na kîaao gîaaku; rîrîa akeeja na arombe eerekerete kîûrû gîkî,

³³igagua maromba jaawe ûrî kûu gwaaku îgûrû, na ûmûthithîrie bûrîa bunthe agakûromba nîkenda antû ba nthîgûrû cionthe bakûmenye na bakwathîkagîre o ta antû baaku ba Israeli, na ningî bamenye atî kîûrû gîkî ngwaakîrîte nîo antû arîa ûkarombagîrwa.

³⁴Rîrîa antû baaku beeta kûrwaa na anthû baao o kûrîa kunthe ûkaabatûma, nabo bakûrombe beerekerete ntûûra îîjî, ûthuurîte na kîûrû gîkî mbakîte nîûntû bwa riîtwa rîaaku,

³⁵Gwe wîtîkîre kwiigagua maromba na kwithaithanîîra kwaao ûrî kûu îgûrû naagwe ûbateethie.

³⁶Nabo baëeja gûkwîîria nîûntû gûtî muntû ûtîîagia naagwe ûkathûûra nîbo ûkabarekeeria kîrî mûnthû, nawe akabagwata akabaikia ûkomboone nthî ya kûraaja kana gûkuî;

³⁷nabo bakëeja gwîcokera barî o nthî îîu ya ûkombo, bakairira na bagakûthaitha bakiugaga, ‘Nî twîîtie na twauna Waatho na tûrî antû ngîti.’

³⁸Ningî bakëeja gûgûcokeera na nkoro ciaao cionthe barî o kûu nthî ya ûkombo bagäkûromba beerekerete nthîgûrû îrîa waeere biûjûjû biaao, na beerekerete ntûûra îrîa withuurîrîte, na kîûrû gîkî ngwaakîrîte;

³⁹wîîtîkîre gwe kwigua maromba jaao na kwithaithanîîra kwaao ûrî o kûu gwaaku îgûrû na ûboonokie. Ningî ûrekere antû baaku barîa bakwîîrîtie.

⁴⁰Nandî ndakûthaitha, itû, Mûrungu waakwa, meetho jaaku jarokaraga jamincûki, najo matû jaaku jakathikagîîra maromba jarîa jakarombagîrwa antû aja.

⁴¹ Nandî ûkîîra, Gwe MWATHANI Mûrungu, wîîje wiinogokere arîa athuranîri nîûntû bwaaku, gwe na Îthandûkû inya yaaku. Athînjîri Mûrungu baaku, gwe MWATHANI Mûrungu, baroona wonokio, na antû baaku barîa eetîkua bagwîrîrue wega bwaaku.

⁴²Gwe MWATHANI Mûrungu, itû ûgáutatîra ûrîa ûthuurîte. Ririkana wendo bwaaku bûrîa bûtîthiraga bûrîa weendeete nabu nthûûmba yaaku Daudi.”