Read KIMERU BIBLE PROTESTANT EDITION 2Ma 7 Bible Online

2Ma 7 - KIMERU BIBLE PROTESTANT EDITION bible

2Ma 7

¹ Rîrîa Solomoni aathirîrie kûromba, mwanki jûreenama kuuma îgûrû jûraîîthia igongwana bia gwakîîria, na kinya igongwana birîa bingî biariti, naju mwago jwa MWATHANI jûroojûra kîûrûûne.

²Kinya athînjîri-Mûrungu batoomba gûkûrûka kîûrûûne kîa MWATHANI nîûntû bwa ûrîa mwago jwa MWATHANI jwoojûri ku.

³ Ningî rîrîa antû ba Israeli bonthe boonîre mwanki jweenama kuuma îgûrû naju mwago jwa MWATHANI jûrî îgûrû rîa kîûrû, nî baturîrie maru, barenamîîria na baratiirithia moothiû jaao mûthetuune, barathaathayia MWATHANI na baramûcokeria nkaatho bakiugaga: “MWATHANI nî ûmwega; nîkwîthîrwa kîaao kîaawe gîtûûraga mwanka kenya.”

⁴Mûnene na antû bonthe nî baaritîîre MWATHANI igongwana.

⁵Mûnene Solomoni aaritîre îgongwana rîa ndeegwa ngiri mîrongo îîrî na ijîîrî (22,000) na ng'ondu ngiri îgana rîmwe rîa mîrongo îîrî (120,000). Ûu nîu mûnene Solomoni na antû bonthe baathûûrîre kîûrû kîa Mûrungu.

⁶Athînjîri-Mûrungu baarûngi antû arîa boonetue. Nabo Alawi baarûngi babeerekerete bakîringaga into bia kwina birîa mûnene Daudi aathithîtie bia gûkumagia Mûrungu. Baainaga rwîmbo rûrîa Daudi aatuungîte rûrîa rwaugaga, “Nîkwîthîrwa wendo bwa MWATHANI bûtûûraga mwanka kenya.” Athînjîri-Mûrungu bararinga tarumbeta ciaao kîrîndî gîa Israeli kîonthe kîrûngi.

⁷Solomoni araathûra gatîgatî ga kîarago kîrîa kîaarî bwa mbere ya kîûrû kîa MWATHANI; au nîo aaritîîre igongwana bia gwakîîria, na maguta ja igongwana bia thîîrî, nîûntû kîritîro kîa igongwana kîrîa aakîte na îturutia gîtîngîûmba kûng'anîra igongwana biu bia gwakîîria na bia irio, na maguta.

⁸Solomoni nî aathithîrie mambura ntukû mûgwanja amwe na antû ba Israeli bonthe. Kîrîndî kîrîa kîothûreene kîaarî gîkiingî mono kiumîte rûteere rwa Hamathi mwanka mûuro jwa Misri.

⁹Nabo baathirîtie ntukû mûgwanja mantûûne ja kûtharima kîritîro kîa igongwana na ntukû ingî mûgwanja mambureene. Nayo ntukû ya inyanya baragîa na kîûthûrano gîkîtheru.

¹⁰Ntukû ya mîrongo îîrî na ithatû ya mweri jwa mûgwanja, nîrîo Solomoni arekererie kîrîndî kîraana nja ciaao kîrî na nkerû na kûgwîrua nkoroone ciaao nîûntû bwa mantû jameega jarîa MWATHANI athithîrîtie Daudi na Solomoni na kinya antû baawe ba Israeli.

¹¹Rîrîa Solomoni aathirîrie gwaka kîûrû kîa MWATHANI na gîkaro kîa mûnene, ningî aroojûria mantû jarîa jonthe aabangîte kûthithia kîûrûûne na gîkaro kîu kîa mûnene,

¹²MWATHANI nî amuumîrîîre ûtukû aramwîra atîrî, “Ndîkwigua îromba rîaaku, naani ndîkwithuurîra antû aja arî kîûrû gîa kûritagîrwa igongwana.

¹³Nkëeja kûrega kuurithia ngai, kana ngatûma ngigî ciînyangia imera, kana ngatûmîra antû baakwa mûrimo jûmûûî,

¹⁴nabo antû baakwa barîa bagwetanagîrua na riîtwa rîaakwa bakëeja kwinyiyia na kûromba, na bakairira bagatigana na wîîyia bwaao, ni nkabaigua ndî îgûrû, na mbarekere meeyia jaao, na ndeete umithio nthîgûrû yaao.

¹⁵Nandî, ngakaragia kîûrû gîkî na nthikagîre maromba jarîa jakarombagîrwa antû aja.

¹⁶Ndîkûthuura na ndatheria kîûrû gîkî nîkenda riîtwa rîaakwa rîtûûraga ku kenya na kenya. Ngagîkaragia na kîmenyagîre magiita jonthe.

¹⁷Gwe naagwe, watûûra ûmbîtîkîtie ja ûrîa abaagu Daudi aathithagia, ûkîthithagia mantû jarîa ngûkwîra jonthe, na ûkîmenyagîîra nkuagaya ciaakwa na mawaatho jaakwa rî,

¹⁸ naani nkarikia rûriga rwaaku rwa ûnene o ja ûrîa ndaarîîkanîîre na abaagu Daudi rîrîa ndaamwîrîre, ‘Gûtîkoroaga muntû wa rûrîîjo rwaaku wa gûtongeeria Israeli.’

¹⁹Îndî bûkëeja kûgarûka bûgatigana na nkuagaya ciaakwa na mawaatho jarîa mbûeete na bûkaambîrîria gûtumîkagîra mîrungu îngî na kûmîthaathayia rî,

²⁰naani nkathaamia Aisraeli mbarite nthîgûrû yaakwa îrîa mbaeete, na ningî nkerûkîra kîûrû gîkî ntharimîte nîûntû bwa riîtwa rîaakwa, nkîeethie gîntû gîa kûguutagwa na kûmenagîîrua nî antû ba mîgongo yonthe.

²¹Kînarî gîkîthongi ûjû gîkari nandî-rî, barîa bonthe bagakûrûkagîîra aja bakarigaraga nabo bakooria, ‘Nîmbi îtûmîte MWATHANI athithia ûntû ta bûbû kîrî nthîgûrû îîjî na kîûrû gîkî?’

²²Antû nabo bakabeera atîrî, ‘Nî tontû bwa ûrîa batigîte MWATHANI, Mûrungu wa biûjûjû biaao, ûrîa wabaritîre nthî ya Misri, na bacoka kûthaathayia mîrungu îngî na kûmîtumîkagîra. Kîu nîkîo gîtûmîte MWATHANI abareteera thîîna îîjî yonthe.’”