Read KIMERU BIBLE PROTESTANT EDITION 2Ma 8 Bible Online

2Ma 8 - KIMERU BIBLE PROTESTANT EDITION bible

2Ma 8

¹Solomoni aakîre kîûrû na gîkaro kîa mûnene na îgiita rîa mîaka mîrongo îîrî.

²Aracoka araaka kaîrî ntûûra irîa mûnene Hiramu aamweete, arainenkanîra kîrî antû ba Israeli baratûûra ku.

³Ningî araithûkîra Hamathi-zoba na aramîtaa.

⁴Araaka ntûûra ya Tadimori rwanda na araaka ntûûra cia Hamathi cionthe irîa ciaarî cia gwîkaga into.

⁵Ningî Solomoni nî aakîre ntûûra ya Bethihoroni ya bwa rûgûrû na Bethihoroni ya bwa gaiti. Ntûûra iu nacio ciaarî indikie buru, irî na nthingo na mpingîro na iburi.

⁶Ningî araaka ntûûra ya Baalathi na ntûûra cionthe kûrîa into biekagwa na ntûûra cionthe cia ngaarî cia ndwaa, na cia njûûrî cia mbarathi. Nawe aroojûria mîbango îrîa aabangîte yonthe ya mîako ya Jerusalemu na Lebanoni, na nthîgûrû îrîa aathaga yonthe.

⁷Nabo antû barîa baatigeere batî Aisraeli ja Ahiti na Amori na Aperizi na Ahivi na Ajebusi,

⁸nchiarwa ciaao irîa ciatigeere nthî îîu itîûragi nî Aisraeli, Solomoni nî aabaeetherie nkombo. Ûu nîu batwîre mwanka naarua.

⁹Îndî Solomoni ataethia Aisraeli nkombo cia kûmûritîra ngûgî. Bau baarî antû baawe ba ndwaa na arûngamîîri na atongeeria ba mbûûtû cia ndwaa cia ngaarî na cia mbarathi.

¹⁰Atongeeria bonthe ba mûnene Solomoni barîa baatongagîîria kîrîndî baarî magana jaîrî ja mîrongo îtaano (250).

¹¹Solomoni nî aathamîrie mwarî wa Farao kuuma Ntûûra ya Daudi aramwikia nyomba îrîa aamwakîrîte arauga, “Mwekûrû waakwa atîkara mwîrîgeene jwa Daudi, mûnene wa Israeli, nîûntû antû barîa bathirîtie kûriûngîrwa nî Îthandûkû rîa kîrîkanîro nî babatheru.”

¹²Rîu Solomoni araritîra MWATHANI igongwana kîritîroone kîa igongwana kîrîa aakîte mbere ya kîûrû

¹³ kûringana na wîîthîre, o kîgongwana na îgiita rîaakîo. Aaritaga kûringana na ûrîa Musa aathanîte: ntukû cia sabatû na cia mambura ja mweri jûkîguûka na mambura ja mîgaate îtiimbithîtue na mambura ja maketha, na mambura ja tûgaanda.

¹⁴Ningî nî aathithîrie mûbango jwa ngûgî ya athînjîri-Mûrungu na Alawi ya mûthenya o mûthenya kûringana na mîtaratara îrîa yathuranîri nî îthe Daudi. Alawi bateethagîîria athînjîri-Mûrungu mantûûne ja kwina ndwîmbo na ngûgîîne ciaao ingî. Ningî aragaania akaria ba kîûrû ikundi gûkaragia ikundi nîûntû bwa kûrangagîra mîrango yonthe, kûringana na uuge bwa Daudi, muntû wa Mûrungu.

¹⁵Gûtî Waatho noo bûmwe bwa jarîa Daudi aaejanîte nîûntû bwa athînjîri-Mûrungu na Alawi, na wîîki bwa mûthithû baakûrûkana nabu.

¹⁶Ûu nîu Solomoni arîîkîrie ngûgî yaawe yonthe, kuuma ntukû îrîa mûsingi jwa kîûrû kîa MWATHANI jwaambîrwe mwanka rîrîa kîûrû kîojûrîre. Nakîo kîûrû kîa MWATHANI kîroojûra.

¹⁷Solomoni aracoka areeta Ezioni-geberi na Elothi, ntûûra irîa ciaarî rûteere rwa îria rwa nthî ya Edomu.

¹⁸Mûnene Hiramu aramûtûmîra meri ciîtithîtue nî antû bamwe baawe barîa baijî mantû ja îria. Nabo bareetania na Solomoni mwanka Ofiri, na baracoka na thaabu ya kilo ngiri îkûmi na ithaano (15,000), baranenkera mûnene Solomoni.