Read KIMERU BIBLE PROTESTANT EDITION 2Ma 9 Bible Online

2Ma 9 - KIMERU BIBLE PROTESTANT EDITION bible

2Ma 9

¹ Rîrîa mûka-mûnene wa Sheba aaigîîrue nkuma ya Solomoni, nî eetîre Jerusalemu kûmûgeria akîmûûragia biûria bibiûmo. Nawe eetîre na nthûûmba ciaawe inyiingî na nkamîîra ikamatîte into bia gûtûma biakûrîa bieera bwega, na thaabu înyiingî na maiga ja goro. Rîrîa aakinyîre kîrî Solomoni aramwîra mantû jarîa jonthe jaarî nkoroone yaawe.

²Solomoni nî aamûcokerie biûria biaawe bionthe, na gûtî ûntû kinya bûmwe atoombîre kûmûcokeria.

³Rîrîa mûka-mûnene ûu wa Sheba aaigîrue ûûme bûrîa Solomoni aarî nabu, na aroona kîûrû kîrîa aakîte,

⁴na irio birîa aarîîjaga, na mûkarîre jwa nthûûmba ciaawe, na mûritîre jwaao jwa ngûgî, na nguû irîa beekagîra, na barîa baamwikagîîria ndibei na nguû irîa beekagîra, na igongwana bia gwaakîîria birîa aaritaga kîûrûûne kîa MWATHANI, ararigara araama.

⁵Rîu mûka-mûnene ûu areera Solomoni atîrî, “Nkuma ya mathithio jaaku na ûûme bwaaku îrîa ndîraigîrîîtue nthîgûrû yaakwa nî ya mma!

⁶Ntîreetîkagia mantû jarîa ndîreeragwa mwanka rîrîa ndîreejîre ndaacionera na meetho. Ntîraigîîtue noo nusu ya ûûme bwaaku. Ûûme bwaaku nî bûbwingî nkûrûki ya ûrîa antû baugaga.

⁷Antû baaku bagwîragua atîa! A nthûûmba iji ciaaku igwîragua atîa cio ikaraga akuî naagwe na ikaigagua nteto cia ûûme irîa waragia!

⁸MWATHANI Mûrungu waaku arokumua we woonanîtie ûrîa agwîrîtue nîgwe aakweethia mûnene nîkenda waathaga nîûntû bwaawe. Tontû bwa ûrîa eendeete Israeli na akeenda kûbarikia mwanka kenya, nîkîo gîtûmi akweethetie mûnene waao nîkenda waathaga na îota na waagîru.”

⁹Mûka-mûnene ûu wa Sheba araa Solomoni thaabu ya kilo ngiri inya (4,000), na into bibingî mono bia gûtûma biakûrîa bieera bwega, na maiga ja goro. Naku gûtaarî kwooneka into ta birîa mûka-mûnene wa Sheba aaere Solomoni.

¹⁰Nthûûmba cia mûnene Hiramu na cia Solomoni irîa ciaajûkîrie thaabu kuuma Ofiri ciaikia nthîgûrûûne ya Juda nî ciaikîrie kinya mîtî ya mîteero na maiga ja goro.

¹¹Solomoni aratumîra mîtî îîu gwaka nkathi cia gûkûrûka kîûrûûne na gîkaroone kîaawe, na gûtuma inanda na wandîîndî irîa ciaringagwa nî aini. Gûtî mantû ta jau jaarî jooneka kaîrî nthîgûrû ya Juda.

¹²Mûnene Solomoni nî aeere mûka-mûnene wa Sheba kîrîa kîonthe aamûrombere. Solomoni aamûeere into bibingî nkûrûki ya birîa aamweete. Nawe aracoka nthîgûrû ya Sheba amwe na nthûûmba ciaawe.

¹³O mwaka, o mwaka, Solomoni nî oonaga kilo ngiri mîrongo îîrî na ithatû (23,000) cia thaabu,

¹⁴gûtîgûtarwa ûgoti bûrîa bwaaritagwa nî aringi biashara na itonga. Kinya anene ba Arabia na arûngamîîri ba nthî ya Israeli nî baamûretagîra fetha na thaabu.

¹⁵Solomoni nî aathithîrie rong'o magana jaîrî (200) inene, na o îmwe yereeretue na kilo mûgwanja cia thaabu înjûmo.

¹⁶Ningî aarathithia rong'o ingî magana jathatû (300) inini, na o îmwe yereeretue na kilo ithatû cia thaabu înjûmo. Nawe araciîka cionthe nyomba îrîa yeetagwa Mwitûûne jwa Lebanoni.

¹⁷Ningî Solomoni nî aatumithîrie gîtî kîa ûnene kîa mûgwongo na kîrereerua na thaabu îrîa ntheru.

¹⁸Nî kwaarî na nkinyo ithanthatû cia gwitia gîtîîne kîu, na gatî ka gûkinyithia magûrû kagwatanithîtue na gîtî kîu, nako keereeretue na thaabu. Nteere cio-ijîîrî nî kwaarî na mîtumbî ya kûrîkîîra njara, na mîng'uanano ya ngatûnyi îrî nteere cio-ijîîrî.

¹⁹Nî kwaarî na mîng'uanano îngî îkûmi na îîrî ya ngatûnyi nkinyoone, o kamwe rûteere rûmwe rwa nkinyo. Gûtî gîtî kîa ûnene ta gîkî kîaarî kîooneka kaîrî nthîgûrû noo îrîkû.

²⁰Ikombe bia Solomoni bionthe biaarî bia thaabu, na into bia kûrîîra bionthe birîa biaarî nyomba ya mwitû jwa Lebanoni biaarî bia thaabu. Fetha îtoonagwa ja gîntû matukûûne ja Solomoni.

²¹Solomoni nî aarî na meri cieetaga Tarishishi ciîtanîtie na nthûûmba cia mûnene Hiramu, na o mîaka îthatû yonthe nî ciareetaga thaabu na fetha na mîgwongo na marukî, na nyoni inthongi.

²²Tontû bwa mantû jau, Solomoni nî aakûrûkîre anene bangî bonthe ba nthî na ûtonga o na ûûme.

²³Nabo anene bonthe nî beetaga kûmûcwaa nîkenda baigua ûûme bûrîa Mûrungu aamweete.

²⁴O ûmwe wa anene bau nî aaretagîra Solomoni biewa bia fetha na thaabu na ndwambambio na into bia ndwaa into bia gûtûma biakûria bieera bwega na mbarathi, na nyûmbû. O mwaka o mwaka ûu nîu gwakaraga.

²⁵ Solomoni nî aarî na nyomba ngiri inya (4,000) cia gwîkaga ngaarî cia ndwaa na mbarathi. Aarî na mbarathi ngiri îkûmi na ijîîrî (12,000). Imwe araciîka Jerusalemu na ingî ntûûreene ingî.

²⁶ Solomoni araa mûnene wakwathaga anene barîa bangî bonthe kuuma rûûjî rwa Eufurate mwanka nthîgûrû ya Filisti, na mwankeene jwa Misri.

²⁷Îgiiteene rîa waathani bwaawe fetha yaingîîte Jerusalemu ja maiga. Mîtarakwa yaingîi ja matî.

²⁸ Solomoni nî aagîîraga mbarathi kuuma Misri na kuuma nthîgûrû ingî inyiingî.

²⁹Mathithio jangî ja Solomoni nî jaandîki Rûgonoone rwa kîroria Nathani, na Ûrorieene bwa Ahija ûrîa wa kuuma Shilo, na bionekiine bwa Ido ûrîa kîroria, bûrîa bwaarîîtie kinya mantû ja waathani bwa Jeroboamu, mûnene wa Israeli.

³⁰Solomoni aathanîre nthî ya Israeli yonthe arî Jerusalemu îgiita rîa mîaka mîrongo îna (40).

³¹Nawe arakua, arathikwa Ntûûra ya Daudi, na mûtaana waawe, Rehoboamu araa mûnene.