Read KIMERU BIBLE PROTESTANT EDITION Ezra 10 Bible Online

Ezra 10 - KIMERU BIBLE PROTESTANT EDITION bible

Ezra 10

¹Rîrîa Ezra aarombaga na kuumbûra meeyia, akîrîraga na kwigwîthia nthî mbere ya nyomba ya Mûrungu, ntundu înene ya antû ba Israeli, arûme na aka, na twaana, nî boothûranîre kîrî we bakîrîraga mono.

²Shekania, mûtaana wa Jehieli, wa rûrîîjo rwa Elamu, araarîria Ezra aramwîra atîrî, “Nî tûregeete kwaa eetîkua kîrî Mûrungu weetû twagûra aka kuuma kîrî antû ba mîgongo îngî barîa batwîre nthîgûrûûne yeetû. Îndî kinya kwëethîrwa gûkari ûu, Israeli îrî na wîrîgîîro.

³Tontû bûû, ga tûcokie ngwatanîro na Mûrungu weetû twînge aka barîa bonthe tûjûkîîtie kuuma kîrî antû ba mîgongo îngî amwe na aana baao, kûringana na ûrîa gwe na antû barîa bakîraga Waatho bwa Mûrungu weetû bagatwîra. Nabu ûntû bûu bûthithue kûringana na ûrîa waatho bûkari.

⁴Ûkîîra, tontû îîjî nî ngûgî yaaku, naatuî tûrî amwe naagwe. Gîta inya na ûmîîrîrie.”

⁵Ezra arookîîra na aratûma athînjîri-Mûrungu barîa batongeeragia bangî na Alawi, o amwe na Aisraeli bonthe baciîtia bakathithia ûrîa Shekania aarî akuuga. Nabo baraciîtia.

⁶Rîu, Ezra arauma au mbere ya nyomba ya Mûrungu, areeta kanyomba ka Jehohanani mûtaana wa Eliashibu araraara ku, atîrûmîte gantû kana akunda rûûjî, nîûntû nî aaithikîrîte mono nîûntû bwa ûrîa antû ba Israeli baacokere bagûrîte aka ba mîgongo îngî.

⁷Kûratûmîîrua kunthe kûu Juda na Jerusalemu atî antû bonthe barîa baumîte kîthamîrioone boothûrane Jerusalemu.

⁸Ningî kûreeranwa atî muntû ûrîa ûkeethîrwa atîkinyîîte ntukû ithatû ikîthira, we agaatunywa into bionthe nawe wengwa aathûranwe na antû barîa baacokere kuuma kîthamîrioone ta ûrîa waatho bwa atongeeria na akûrû bûgîîte.

⁹Mbere ya ntukû ithatû ithira, kûrî ntukû ya mîrongo îîrî ya mweri jwa kenda, antû bonthe barîa baatûûraga Juda na nthîgûrû ya Benjamini nî boothûranîre Jerusalemu. Nabo bonthe barakara nthî kîaragoone kîa nyomba ya Mûrungu. Nabo nî bainainaga nîûntû bwa mantû jarîa beetîri, na nîûntû bwa ngai înene îrîa yauraga.

¹⁰Ezra, mûthînjîri-Mûrungu ararûngama na arabeera atîrî, “Nî buunîîte waatho, bwajûkia aka ba mîgongo îngî, tontû bûu bwongeera meeyia ja Israeli.

¹¹Nandî-rî, umbûrîreeni MWATHANI Mûrungu wa biûjûjû bieenu na bûthithie wendi bwaawe. Athûkaneeni na antû barîa batwîre nthîgûrû îîu bûrî na bwathûkane na aka beenu bau ba mîgongo îngî.”

¹²Nîu kîûthûrano kîonthe gîa antû kîracokia na kajû gakanene kîrauga: “Nîu kûbuîrîte gûkara. Tuî tûkathithia ûrîa wauga.

¹³Antû nî babaingî na nî gûkuura ngai înene. Tûtîûmba kûrûngama oome ûjû tûkari. Kaîrî ngûgî îîjî tî ya ntukû îmwe kana ijîîrî; nîûntû tuî nî twîîtie mono mantûûne jaja.

¹⁴Rekeeni atongeeria beetû barûngame antûûne eetû. Bonthe barîa baarî ntûûreene cieetû na bajûkîîtie aka ba mîgongo îngî nî beeje rîrîa batuîri, na beejanie na akûrû, na agambi ba ntûûra cionthe, mwanka mûthûûro jûmûnene jûrîa Mûrungu weetû arî naju nîûntû bwa mantû jaja, jweeberue kuuma kîrî tuî.”

¹⁵Barîa bonka bateetîkanîrie na ûntû bûu nî Jonathani mûtaana wa Asaheli, na Jahazeia mûtaana wa Tikiva, baragwatwa mbaru nî Alawi beetagwa Meshulamu na Shabethai.

¹⁶Antû barîa baacokere kuuma kithaamîrioone barathithia o ûrîa kweerani. Ezra, mûthînjîri-Mûrungu arathuura antû, tabo atongeeria ba mîîrîga yaao, na o mûtongeeria araandîkwa na riîtwa rîaawe. Ntukû ya mbere ya mweri jwa îkûmi nîrîo antû bau baakarîre nthî baraambîrîîria gûcûnkûûna mantû jau.

¹⁷Gûgîkinya ntukû ya mbere ya mweri jwa mbere nî baarî bakûrîîkia gûcûnkûûna mantû ja barîa bonthe baagûrîte aka ba mîgongo îngî.

¹⁸Kîrî nchiarwa cia athînjîri-Mûrungu, barîa boonekere bagûrîte aka ba mîgongo îngî baarî ba mwîrîga jwa Jeshua mûtaana wa Jozadaki na ataaneethe, tabo Maaseia na Eliezeri na Jaribu, na Gedalia.

¹⁹Nabo baraciîtia kwînga aka baao, na bararita ntûrûme ya kûthambia mûgiro jwa maatia jaao.

²⁰Kîrî nchiarwa cia Imeri, kûrooneka Hanani na Zebadia.

²¹Kîrî nchiarwa cia Harimu, kûrooneka Maaseia, na Elija, na Shemaia, na Jehieli, na Uzia.

²²Kîrî nchiarwa cia Pashuri, kûrooneka Elioenai, na Maaseia, na Ishimaeli, na Nethaneli, na Jozabadi, na Elasa.

²³Kîrî Alawi, kûrooneka Jozabadi, na Shimei, na Kelaia, na no we Kelita, na Pethahia, na Juda, na Eliezeri.

²⁴Kîrî aini, kûrooneka Eliashibu. Kuuma kîrî akaria mpingîro kûrooneka Shalumu, na Telemu, na Uri.

²⁵Kuuma kîrî Aisraeli barîa bangî: kuuma nchiarwa cia Paroshi, kûrooneka Ramia, na Izia, na Malikija, na Mijamini, na Eleazari, na Malikija, na Benaia.

²⁶Kuuma kîrî nchiarwa cia Elamu, kûrooneka Matania, na Zekaria, na Jehieli, na Abudi, na Jeremothi, na Elija.

²⁷Kîrî nchiarwa cia Zatu, kûrooneka Elioenai, na Eliashibu na Matania, na Jeremothi, na Zabadi, na Aziza.

²⁸Kîrî nchiarwa cia Bebai, kûrooneka Jehohanani, na Hanania, na Zabai, na Athilai.

²⁹Kuuma kîrî nchiarwa cia Bani, kûrooneka Meshulamu, na Maluki, na Adaia, na Jashubu, na Sheali, na Jeremothi.

³⁰Kuuma kîrî nchiarwa cia Pahathi-moabu, kûrooneka Adena, na Kelali, na Benaia, na Maaseia, na Matania, na Bezaleli, na Binui, na Manase.

³¹Kîrî nchiarwa cia Harimu, kûrooneka Eliezeri na Ishija, na Malikija, na Shemaia, na Shimeoni, na

³²Benjamini, na Maluki, na Shemaria.

³³Kîrî nchiarwa cia Hashumu, kûrooneka Matenai, na Matata, na Zabadi, na Elifeleti, na Jeremai na Manase na Shimei.

³⁴Kîrî nchiarwa cia Bani, kûrooneka Maadai, na Amuramu, na Ueli,

³⁵na Benaia na Bedeia, na Keluhi,

³⁶na Vania, na Meremothi, na Eliashibu, na

³⁷Matania, na Matenai, na Jaasu.

³⁸Kuuma kîrî nchiarwa cia Binui, kûrooneka Shimei, na

³⁹Shelemia, na Nathani, na Adaia, na

⁴⁰Makinadebai, na Shashai, na Sharai, na

⁴¹Azareli, na Shelemia, na Shemaria, na

⁴²Shalumu, na Amaria, na Josefu.

⁴³Kuuma kîrî nchiarwa cia Nebo, kûrooneka Jeieli na Matithia, na Zabadi, na Zebina, na Jadai, na Joeli, na Benaia.

⁴⁴“Antû baba bonthe baagûrîte aka ba mîgongo îngî, nabo nî baabengîre bonthe amwe na twaana twaao.”