Read KIMERU BIBLE PROTESTANT EDITION Ezra 4 Bible Online

Ezra 4 - KIMERU BIBLE PROTESTANT EDITION bible

Ezra 4

¹Anthû ba Juda na Benjamini nî baaigîrue atî atae barîa bacokere nî bagwaka kîûrû kîa MWATHANI, Mûrungu wa Israeli.

² Nabo nî beetîre akuî na Zerubabeli na atongeeria ba mîîrîga barabeera atîrî: “Rekeeni twake tûrî amwe naabuî tontû kinya tuî tûthaathagia Mûrungu ûu weenu. Tûtwîre tûmûritagîra igongwana îgiita rîa Esari-hadoni mûnene wa Asîria ûrîa watûreetere gûkû.”

³Îndî Zerubabeli, na Jeshua, na atongeeria bau bangî ba mîîrîga ya Israeli barabeera atîrî, “Tuî tûtîkwenda bûtûgwatia gwakîra Mûrungu weetû nyomba. Nî tuî twinka tûgaakîra MWATHANI Mûrungu wa Israeli, o ja ûrîa Koreshi mûnene wa Parasia augîîte tûthithie.”

⁴Antû ba nthîgûrû îîu nî baagererie kûguayia antû ba Juda, kenda bakua nkoro batiganîria waaki.

⁵Nabo baratua gûkukumaga atongeeria bamwe ba thirikarî ya Parasia nîkenda bathûûkia ngûgî îîu ya waaki îgiiteene rîonthe rîa waathani bwa Koreshi mûnene wa Parasia. Bareeta na mbere kûthithia ûu mwanka îgiita rîa waathani bwa Dario, mûnene wa Parasia.

⁶ Rîrîa Aritashashita aatuîkîre mûnene, kîambîrîriene kîa waathani bwaawe, antû bau nî baandîkîre barûga bakîthitangaga atûûri ba Juda na Jerusalemu.

⁷Ningî waathaniine bwa Aritashashita, Bishilamu na Mithiredathi na Tabeeli na antû bangî ba mûûrû jwaao nî baandîkîîre Aritashashita mûnene wa Parasia barûga. Barûga îîu yaandîki na rûthiomi rwa Kîaramu, nayo îkagarûrwa rîrîa îkûthomwa.

⁸Rehumu, ûrîa mûtongeeria na Shimushai, ûrîa mwandîki, nî baandîkîîre mûnene Aritashashita barûga ya kûthûûkia Jerusalemu bakiugaga atîrî,

⁹“Nî tuî Rehumu ûrîa mûrûngamîîri, Shimushai ûrîa mwandîki, na antû bangî ba mûûrû jweetû, na agambi, na atongeeria bangî kuuma Ereki, na Babiloni na Susa, tabo antû ba Elamu.

¹⁰Antû ba mîgongo îngî barîa mûnene mûkaathe Osinapari aathaamîrie na arabeeka ntûûra cia Samaria na nthîgûrû ingî irîa irî bwa rûgûrû rwa rûûjî rwa Eufurate.”

¹¹Îîjî nîyo barûga îrîa baandîkîre: “Kîrî mûnene Aritashashita; Jûkia nkeethi kuuma kîrî nthûûmba ciaaku irîa itûûraga bwa rûgûrû rwa rûûjî rwa Eufurate.

¹²Twenda gwe mûnene weetû ûmenya atî Ayahudi barîa baacokere kuuma nthîgûrûûne ingî irîa waathaga nî baakinyîre Jerusalemu. Nabo nandî bagwaka kaîrî ntûûra îrîa ndemi na îmbîî. Ningî nî bagwaka nthingo ciaayo na nî bagwîkîra mîsingi yaayo.

¹³Nandî twenda gwe mûnene, ûmenya atî rîrîa ntûûra îîjî îgaakwa na nthingo ciaayo irîîkie gwakwa antû baba batîrita ûgoti, kana mûng'ana jûrîa batuîri, kana ngûgî ya mûnene, na tontû bûu mûthithû jwa mûnene jûkanyiia mono.

¹⁴Tuî barîa tûrî baaku ba ndeene tûtîkwenda kwona mûnene akîmenwa. Tontû bûû, nîkîo gîatûma tûtûmana na tûkûmenyithia mantû jau gwe mûnene,

¹⁵nîkenda kûraithwa bwega Yukuune rîrîa rîaandîki mathithio ja anene barîa bethîrîîtwe barî mbere yaaku. Yukuune rîu ûkoona atî ntûûra îîjî nî ntûûra ndemi, na îtîathîkagîra mûnene na athani baawe na îtwîre yûûkaûkagia thîîna, kuuma karaaja. Kîu nîkîo gîaatûmîre ntûûra îîu îthirua buru.

¹⁶Nîka tûkwenda gwe mûnene ûmenya atî rîrîa ntûûra îîjî îgaakwa na nthingo ciaayo irîîkie gwakwa, gûtîkîo ûkeethîrwa ûrî nakîo nthîgûrû îrîa îrî bwa rûgûrû rwa rûûjî rwa Eufurate.”

¹⁷Mûnene nawe nî aatûmîre macokio arauga: “Kîrî Rehumu, ûrîa mûtongeeria, na Shimushai ûrîa mwandîki, na antû bangî ba mûûrû jweenu barîa batûûraga Samaria, na nthîgûrû ingî irîa irî rûgûrû rwa rûûjî rwa Eufurate; Jûkieni nkeethi!

¹⁸Nî ndîrathomeerwe barûga îrîa bûratûmîte îgîtaûragwa.

¹⁹Naani nî ndîraritîre waatho, gwacûnkûûnwa bwega, na kwoneka atî kuuma tene ntûûra îîu îtûûraga îremeete anene na yûûkaûkagia thîîna.

²⁰Anene barî inya baathaga Jerusalemu na nthîgûrû îrîa yonthe îrî bwa rûgûrû rwa rûûjî rwa Eufurate na nî boothûranagia ûgoti na mûng'ana jûrîa antû batuîri, na antû bakarita ngûgî cia mûnene.

²¹Tontû bûû, îreeni antû bau batigane na ngûgî îîu, na ntûûra îîu îtige gwakwa mwanka rîrîa ûûni nkaarita waatho.

²²Menyeni bûthaa bûtîrathithia ûntû bûbû, waathani bûtîkeeje kûthûûkua tûkîonaga.”

²³Rîrîa barûga ya mûnene Aritashashita yaathomeerwe Rehumu, na Shimushai ûrîa mwaandîki na antû ba mûûrû jwaao, nî bookîrîîre na mpwîî bareeta kîrî Ayahudi kûu Jerusalemu baratumîra inya barabagiria gwaka.

²⁴ Tontû bûû, ngûgî ya waaki bwa nyomba ya Mûrungu îrîa îrî Jerusalemu îrarûngama. Ngûgî îîu nî yarûngamîre mwanka mwaka jwa îîrî jwa waathani bwa Dario mûnene wa Parasia.