Read KIMERU BIBLE PROTESTANT EDITION Ezra 5 Bible Online

Ezra 5 - KIMERU BIBLE PROTESTANT EDITION bible

Ezra 5

¹Îgiita rîu, kîroria Hagai na kîroria Zekaria mûtaana wa Ido, nî baarorerie Ayahudi barîa baarî Juda na Jerusalemu riîtweene rîa Mûrungu wa Israeli ûrîa waabatongeeretie.

² Nîrîo Zerubabeli mûtaana wa Shealitieli na Jeshua mûtaana wa Jozadaki, baambîrîîrie gwaka nyomba ya Mûrungu kaîrî, îrîa îrî Jerusalemu. Ningî nî baarî na iroria bia Mûrungu bikîbateethagia ngûgî.

³O îgiiteene rîu rîongwa Tatenai mûrûngamîîri wa nthîgûrû ya bwa rûgûrû rwa rûûjî rwa Eufurate, na Shethari-bozenai, na antû ba mûûrû jwaao nî beejîre barabooria atîrî, “Nûû ûbweete rûûtha rwa gwaka nyomba îîjî na bûmîgemia.”

⁴Ningî barabooria atîrî, “Antû barîa bagwaka nyomba îîjî beetagwa atîa?”

⁵Îndî nîûntû Mûrungu nî aakarîtie akûrû ba Ayahudi, antû bau batoombîre kûrûûngîka waakî mwanka rîrîa mantû jakinyîîre Dario, nawe arabatûmîra macokio na barûga.

⁶Îîjî nîyo barûga îrîa yaandîkîri mûnene Dario, nî Tatenai mûrûngamîîri wa nthîgûrû ya bwa rûgûrû rwa Rûûjî rwa Eufurate na Shethari-bozenai na antû ba mûûrû jwaao, na atongeeria ba gûntû kûu.

⁷Barûga îrîa baamwandîkîîre yakari ûjû: “Kîrî mûnene Dario, “Jûkia nkeethi.

⁸Ga tûkwenda gûkûmenyithia gwe mûnene atî nî tweetîre nthîgûrû ya Juda na twethîra nyomba ya Mûrungu ûrîa mûnene mma îgîakagwa. Nî twethîîre îgîakagwa na maiga jamanene na mbaaû igîîkagîrwa nthingoone. Nayo ngûgî îîu nî îtîîte na mbere mono, na aaki barî na wîru mono.

⁹Ningî nî twoorîrie akûrû bau atîrî, ‘Nûû ûbweete rûûtha rwa gwaka nyomba îîjî na bûmîgemia?’

¹⁰Ningî nî twaboorîrie mariîtwa jaao na tûrajaandîka nîkenda tûkûmenyithia barîa babatongeeretie.

¹¹Nabo nî baatûcokerie ûjû: ‘Tuî tûrî nthûûmba cia Mûrungu wa îgûrû na nthî, naatuî nîka tûgwaka nyomba îrîa yaakîîtwe mîaka îmingî îthirîte na îrarikua nî mûnene wa Israeli waarî îgweta mono.

¹² Îndî tontû biûjûjû bieetû nî biathûûrîrie Mûrungu wa Îgûrû, we nî aabinenkanîîre njareene cia Nebukadineza mûnene wa Babiloni, ûrîa Mûkalidea, ûrîa waakoborangîre nyomba îîu buru na arathaamia antû arabaikia Babiloni.

¹³ Îndî kûrî mwakeene jwa mbere jwa waathani bwa Koreshi mûnene wa Babiloni, mûnene Koreshi nî aaritîre waatho nyomba îîu ya Mûrungu yaakwe kaîrî.

¹⁴Nabio into bia thaabu na bia fetha bia nyomba ya Mûrungu, birîa Nebukadineza aarî akûjûkia kuuma kîûrûûne kîrîa kîaarî Jerusalemu na arabiikia kîûrûûne kîa Babiloni, bionthe birajûkua nî mûnene Koreshi kuuma kîûrûûne kîu kîa Babiloni, na biranenkerwa muntû ûgwîtwa Sheshibazari, ûrîa waarî akwethua mûrûngamîîri wa nthîgûrû ya Juda.

¹⁵Aramwîra atîrî: Jûkia into biu, ûbiikie kîûrûûne kîa Mûrungu kîrîa kîrî Jerusalemu, na ûrekeerie nyomba ya Mûrungu yaakwe arîa yaaki rîa mbere.

¹⁶Tontû bûû, Sheshibazari ûu nî aacokere na arambîrîria gwaka mûsingi jwa nyomba îîu ya Mûrungu îrîa îrî Jerusalemu; na kuuma îgiita rîu mwanka nandî no yakagwa îndî îtîrojûra.’

¹⁷Tontû bûû, këethîra nî ûkwona kwagîrîte gwe mûnene, ûreke gûcûûwe kuuma maandîkoone jarîa jeeki kûu Babiloni jegiî anene, nîkenda kwoneka këethîra nî mma waatho nî bwanenkanîri nî mûnene Koreshi nîûntû bwa gwaka kaîrî nyomba îîu ya Mûrungu îrîa îrî kûu Jerusalemu. Nandî mûnene itûkwîrîgîîra ûgatûtûmîra macokio jegiî wendi bwaaku îgûrû rîa mantû jaja.”