Read KIMERU BIBLE PROTESTANT EDITION Ezra 7 Bible Online

Ezra 7 - KIMERU BIBLE PROTESTANT EDITION bible

Ezra 7

¹Nyuma ya mantû jau, kûrî waathaniine bwa Aritashashita mûnene wa Parasia, Ezra mûtaana wa Seraia, Seraia mûtaana wa Azaria, Azaria mûtaana wa Hilikia,

²Hilikia mûtaana wa Shalumu, Shalumu mûtaana wa Zadoki, Zadoki mûtaana wa Ahitubu,

³Ahitubu mûtaana wa Amaria, Amaria mûtaana wa Azaria, Azaria mûtaana wa Meraiothi,

⁴Meraiothi mûtaana wa Zeraia, Zerahia mûtaana wa Uzzi, Uzzi mûtaana wa Buki,

⁵Buki mûtaana wa Abishua, Abishua mûtaana wa Fineasi, Fineasi mûtaana wa Eleazari, Eleazari mûtaana wa Aaroni, Aaroni mûthînjîri-Mûrungu ûrîa mûnene.

⁶Ezra ûu aracoka Jerusalemu aumîte Babiloni. Aarî mwandîki ûmûnene mono mantûûne jegiî Waatho bwa Musa, bûrîa MWATHANI Mûrungu wa Israeli aanenkanîrîte; nawe mûnene nî eetîkîrîîrie jarîa jonthe aamûrombeete, nîûntû MWATHANI Mûrungu waawe nî aamûtongeretie.

⁷Kûrî mwakeene jwa mûgwanja jwa waathani bwa Aritashashita, antû bamwe ba Israeli, na athînjîri-Mûrungu bamwe, na Alawi, na aini na akaria mpingîro, na barîa batûmîkagîra kîûrûûne kîa Mûrungu, nî beetire Jerusalemu.

⁸Ezra eetîre Jerusalemu mweriine jwa îtaano, mwakeene jwa mûgwanja jwa waathani bwa mûnene ûu.

⁹Ezra na antû bangî nî baaumîre Babiloni ntukû ya mbere ya mweri jwa mbere, nabo barakinya Jerusalemu ntukû ya mbere ja mweri jwa îtaano, nîkwîthîrwa Mûrungu waao nî aabateethagia.

¹⁰Ezra nî aacieejanîte na nkoro yaawe kûthoma Waatho bwa MWATHANI bwega, na kûbwathîkagîra, na kûritana Waatho na mataaro jau, kîrî Aisraeli.

¹¹Îîjî nîyo barûga îrîa mûnene Aritashashita aanenkeere Ezra ûrîa waarî mûthînjîri-Mûrungu na mwandîki wa Waatho. Ezra aarî muntû ûmûthomu mono mantûûne jegiî Waatho bwa MWATHANI na mataaro jarîa MWATHANI aanenkerete antû ba Israeli.

¹²Barûga yaugaga ûjû: Nkeethi kuuma kîrî Aritashashita, mûnene wa anene, kîrî Ezra mûthînjîri-Mûrungu na mwandîki wa Waatho bwa Mûrungu wa Îgûrû.

¹³Nî ndîkûrita waatho atî o muntû wa Israeli wonthe, kana athînjîri-Mûrungu baao, kana Alawi barîa barî nthîgûrû îrîa nkwaathana barîa bagaciendera bongwa gûcoka Jerusalemu, nî bacokanie naagwe.

¹⁴Nîkwîthîrwa gwe ûtûmi nî mûnene, na antû baawe mûgwanja barîa bamweejaga kîrîra nîkenda ûcûnkûûna bwega mantû ja Juda na Jerusalemu kûringana na Waatho bwa Mûrungu waaku bûrîa ûnenkeri.

¹⁵Ningî nîkenda ûnenkanîra fetha na thaabu irîa ni mûnene na aeejani kîrîra baakwa tweejanîte na gûciendera kîrî Mûrungu wa Israeli ûrîa kîûrû kîaawe kîrî kûu Jerusalemu.

¹⁶Ningî ûjûkie fetha yonthe, na thaabu yonthe îrîa ûkoothûrania kunthe nthîgûrû ya Babiloni, na into birîa antû na athînjîri-Mûrungu baritîte na gûciendera kwaao bongwa, nîûntû bwa Nyomba ya Mûrungu waao îrîa îrî Jerusalemu.

¹⁷Bûmenyeere bwega bûgûre na mbeecha iu ndeegwa, na ntûrûme na tûtûrûme, na igongwana bia irio, na bia gwîtûrîria birîa biîtanagia nabio. Nabio bûbirite birî igongwana kîritîroone kîa igongwana kîa nyomba ya Mûrungu weenu îrîa îrî Jerusalemu.

¹⁸O bûrîa bunthe gwe na antû beenu bangî bûkoona bwagîrîte bwa kûthithua na fetha na thaabu îrîa îtigarîte, bûthithie bu, bunka ûntû bûu bwîthîrwe bûringeene na wendi bwa Mûrungu weenu.

¹⁹Into birîa ûnenkeri nîûntû bwa gûtûmîrwa ndeene nyomba ya Mûrungu waaku ûbinenkanîre mbere ya Mûrungu wa Jerusalemu.

²⁰Gîntû kîngî kîonthe kîrîa gîkeendekana nîûntû bwa Nyomba ya Mûrungu waaku kîrîa ûkoona ûbuîrîte kûrita, no ûkîrite kuuma kîrî mûthithû jwa mûnene.

²¹Ningî ni mûnene Aritashashita ningwa nî nkûrita waatho kîrî eeki kîgîîna bonthe barîa barî nthîgûrû îrîa îrî bwa rûgûrû rwa Rûûjî Eufurate atî: o kîrîa kîonthe Ezra ûrîa mûthînjîri-Mûrungu, na mwandîki wa Waatho bwa Mûrungu wa Îgûrû akeenda kuuma kîrî buî. Mûnenkereni kîo ntûtî,

²²bunka kîëethîrwa gîtîkûrûkîîtie kilo ngiri ithatû cia magana jana (3,400) ja fetha, kana kilo ngiri îkûmi (10,000) cia nkano, kana lita ngiri ijîîrî (2,000) cia ndibei, na lita ngiri ijîîrî (2,000) cia maguta ja nzeituni na chumbî o îrîa îkeendekana.

²³Kîrîa kîonthe Mûrungu wa Îgûrû, augîîte kîritwe nîûntû bwa nyomba yaawe, nî kîritwe na wîru, nîkenda Mûrungu atîgatûrîkîrie nthîgûrû îrîa ûûni mûnene mbathaga na aana baakwa mûthûûro jwaawe.

²⁴Ningî nî bûkûmenyithua atî gûtî noo ûmwe wa athînjîri-Mûrungu, kana Alawi, kana aini, kana akaria mpingîro, kana barîa batumîkaga kîûrûûne, kana ariti ngûgî bangî ba nyomba ya Mûrungu, bûbuîrîte kûritithua ûgoti, kana mûng'ana jûrîa jûtujanagîrwa, kana ngûgî ya mûnene.

²⁵“Ningî naagwe Ezra, thuura agambi babanene na agambi baanini kûrîngana na kîrîra kîrîa ûrî nakîo kuuma kîrî Mûrungu waaku, nîkenda bagambagîra antû bonthe barîa baarî nthîgûrû îrîa îrî bwa rûgûrû rwa rûûjî rwa Eufurate, bonthe barîa baijî Waatho bwa Mûrungu waaku; na barîa batîjaijî ûbaritanage jo.

²⁶Ûrîa wonthe ûtîathîkîra Waatho bwa Mûrungu waaku na waatho bwa mûnene nî atwirwe ûrîa kwagîrîte atîkwigigîîrua kîaao, kinya këethîra nî kûûragwa, kana kwîngwa nthîgûrû yaawe, kana gûtaîrwa into biaawe, kana kûtheekwa ncheera.”

²⁷“Ezra nî augîre atîrî, Mûrungu wa ba baaba, arokumua, we ûrîa wekîîre mantû jaja nkoroone ya mûnene, nîkenda athongomia nyomba ya MWATHANI îrîa îrî Jerusalemu.

²⁸Ningî nî ambonetie kîaao kîaawe kîrîa gîtîthiraga ndoona wega kuuma kîrî mûnene na aejani kîrîra kîaawe, na atongeeria baawe bonthe barîa barî inya. Ndîragwata inya nîûntû bwa gûteethua nî MWATHANI Mûrungu waakwa, ndîroothûrania atongeeria ba antû ba Israeli nîkenda tûcoka nabo Jerusalemu.”