Read KIMERU BIBLE PROTESTANT EDITION Ezra 8 Bible Online

Ezra 8 - KIMERU BIBLE PROTESTANT EDITION bible

Ezra 8

¹Baba nîbo atongeeria ba mîîrîga ya antû ba Israeli na nîo ru rûrîîjo rwa barîa baacokanîrie naani kuuma Babiloni rîrîa mûnene Aritashashita aathanaga:

²kuuma kîrî nchiarwa cia Fineasi, ûrîa weetîre nî Gerishomu. Kuuma kîrî nchiarwa cia Ithamari, ûrîa weetîre nî Danieli. Kuuma kîrî nchiarwa cia Daudi, ûrîa weetîre nî Hatushi

³wa rûrîîjo rwa Shekania. Kuuma kîrî nchiarwa cia Paroshi, ûrîa weetîre nî Zekaria na arûme barîa baandîki ba rûrîîjo rwaao îgana rîmwe rîa mîrongo îtaano (150).

⁴Kuuma kîrî nchiarwa cia Pahathi-moabu, ûrîa weetîre nî Eliehoenai mûtaana wa Zeraia, aarî amwe na arûme magana jaîrî (200).

⁵Kuuma kîrî nchiarwa cia Zatu, ûrîa weetîre nî Shekania mûtaana wa Jahazieli arî amwe na arûme magana jathatû (300).

⁶Kuuma kîrî nchiarwa cia Adini, ûrîa weetîre nî Ebedi mûtaana wa Jonathani arî amwe na arûme mîrongo îtaano (50).

⁷Kuuma kîrî nchiarwa cia Elamu, na Jeshaia mûtaana wa Athalia arî amwe na arûme mîrongo mûgwanja (70).

⁸Kuuma kîrî nchiarwa cia Shefatia, ûrîa weetîre nî Zebadia mûtaana wa Mikaeli arî amwe na arûme mîrongo înaana (80).

⁹Kuuma kîrî nchiarwa cia Joabu, ûrîa weetîre nî Obadia mûtaana wa Jehieli arî amwe na arûme magana jaîrî ja îkûmi na banaana (218).

¹⁰Kuuma kîrî nchiarwa cia Bani, ûrîa weetîre nî Shelomithi mûtaana wa Josifia arî amwe na arûme îgana rîmwe rîa mîrongo îtantatû (160).

¹¹Kuuma kîrî nchiarwa cia Bebai, ûrîa weetîre nî Zekaria mûtaana wa Bebai, arî amwe na arûme mîrongo îîrî na banaana (28).

¹²Kuuma kîrî nchiarwa cia Azigadi, ûrîa weetîre nî Johanani mûtaana wa Hakatani, arî na arûme îgana rîa îkûmi (110).

¹³Kuuma kîrî nchiarwa cia mûthia cia Adonikamu, barîa beetîre nî Elifeleti, na Jeueli, na Shemaia, barî amwe na arûme mîrongo îtantatû (60).

¹⁴Kuuma kîrî nchiarwa cia Bigivai, barîa beetîre nî Uthai na Zakuri, barî amwe na arûme mîrongo mûgwanja (70).

¹⁵Naani nî ndoothûranîrie antû bau karûûjîîne karîa gakûrûkîrîîte Ahava na tûraamba maema tûrakara o ntukû ithatû. Îndî rîrîa ndaraithîrîrie antû na athînjîri-Mûrungu nî ndaagîre muntû kinya ûmwe wa mwîrîga jwa Lawi.

¹⁶Tontû bûû, ndîratûmanîra atongeeria tabo Eliezeri, na Arieli na Shemaia, na Elinathani, na Jaribu, na Elinathani na Nathani na Zekaria na Meshulamu, na antû baaciûku mono, nabo nî Joiaribu na Elinathani.

¹⁷Bau bonthe ndîrabatûma kîrî Ido mûtongeeria wa gûntû gûgwîtwa Kasifia, beeta kwîra Ido na antû ba mûûrû jwaawe barîa baarî ariti ngûgî nyomba ya Mûrungu îrîa îrî Kasifia, batûtûmîre nthûûmba cia kûrita ngûgî nyomba ya Mûrungu weetû.

¹⁸Tontû Mûrungu weetû nî aarî amwe naatuî, antû bau baratûretera Sherebia muntû ûmwe waijî gûciûra nteto bwega, nawe aarî wa mwîrîga jwa Mahili mûtaana wa Lawi, Lawi mûtaana wa Israeli. Amwe na Sherebia nî baatûtûmîîre ataana baawe na antû bamwe ba mwîrîga jwaao bonthe îkûmi na banaana (18).

¹⁹Ningî kuuma kîrî nchiarwa cia Merari, nî baatûmîre Hashabia na Jeshaia amwe na ndûgû ciaao na ataana baao, bonthe antû mîrongo îîrî (20).

²⁰Amwe na bau, nî gwatûmi ariti ngûgî bangî magana jaîrî ja mîrongo îîrî (220) nyomba ya Mûrungu barîa Daudi na atongeeria baawe baarî bakûthuura bateethagîîria Alawi. Bonthe nî baandîkîrwe mariîtwa jaao.

²¹Tûrî au karûûjîîne ka Ahava ndîratûmîîria mantû ja gûciata biakûrîa nîkenda twinyiiyia mbere ya Mûrungu weetû, nîkenda atweberia ûgwati njîreene irîa tûgeeta nacio, tuî na into bieetû bionthe birîa tûrî twarî nabio.

²²Nîkwîthîrwa nî ndaigîîtue nthoni cia kûromba mûnene gîkundi kîa asikarî barîa beetithagia mbarathi ba gwîtania naatuî batûkarîtie tûtîkeeje kwithûkîrwa nî anthû. Nîkwîthîrwa nî twaarî tûkwîra mûnene atîrî, “Mûrungu weetû nî akaragia bonthe barîa bamûcwaga na agakanûkia na mûthûûro barîa bonthe baregaga kûmwathîkîra.”

²³Tontû bûû, tûraciata biakûrîa na tûraromba Mûrungu atûteethie ûntûûne bûu nawe araigua maromba jeetû.

²⁴Ningî nî ndaathuurîre kuuma kîrî athînjîri-Mûrungu barîa batongeeragia bangî, Sherebia na Hashabia na antû bangî îkûmi ba ndûgû ciaao. Bonthe barî antû îkûmi na baîrî.

²⁵Ndîrabathimîra fetha, na thaabu, na into bingî nkîbanenkagîra. Into biu nîbio biaejani nî mûnene, na antû barîa bamwathaga kîrîra, na atongeeria bangî, na antû ba Israeli bonthe barîa baarî au, nîûntû bwa nyomba ya Mûrungu weetû.

²⁶Ndîrabathimîra nkîbanenkagîra ûjû: fetha kilo ngiri mîrongo îîrî na ijîîrî (22,000) na into îgana rîmwe bia fetha (100) bia ûrito bwa kilo mîrongo mûgwanja (70), na thaabu kilo ngiri ithatû cia magana jana (3,400);

²⁷na mpakûri cia thaabu mîrongo îîrî (20) cia ûrito bwa kilo inyanya na nusu, (8.5) na mpakûri ijîîrî (2) cia îturutia rîrîthongi rîkwenia rîa ûgûri ja bwa thaabu.

²⁸Ndîrabeera atîrî, “Buî nî bwathûrîri Mûrungu, na into biu nî bibiathûre. Nayo fetha îîu na thaabu îîu nî biewa bieejani na gûciendera kîrî MWATHANI Mûrungu wa biûjûjû bieenu.

²⁹Bikarieeni na bûbiîke mwanka rîrîa bûkabithima mbere ya athînjîri-Mûrungu barîa batongeeragia bangî na Alawi na atongeeria ba mîîrîga ya antû ba Israeli kûu Jerusalemu ndeene ya tûnyomba twa nyomba ya MWATHANI.”

³⁰Tontû bûû, athînjîri-Mûrungu na Alawi nî bajûkîrie fetha îîu na thaabu îîu na into biu bingî barabiikia Jerusalemu, nyomba ya Mûrungu weetû.

³¹Ningî tûrauma au karûûjîîne ka Ahava ntukû ya îkûmi na ijîîrî ya mweri jwa mbere, tûragwata rûgendo rwa gwîta Jerusalemu. Mûrungu weetû nî aatûmenyeerete, nawe aratwonokia kuuma kîrî anthû na kîrî barîa baatwiciithîrîte njîreene.

³²Nî twakinyîre Jerusalemu na tûrakara ku ntukû ithatû.

³³Ntukû ya inya, fetha na thaabu na into birîa bingî birathimîrwa nyomba ya Mûrungu weetû bikînenkagîrwa mûthînjîri-Mûrungu Meremothi, mûtaana wa Uria. Meremothi amwe na Eleazari mûtaana wa Fineasi, ningî amwe nabo nî kwaarî na Alawi, Jozabadi mûtaana wa Jeshua, na Noadia Mûtaana wa Binui.

³⁴Into bionthe nî biatarîrwe bikîthimagwa na ûrito bwabio bionthe bûkîandîkagwa.

³⁵Îgiita rîu antû barîa baarî bagûcoka kuuma kîthamîrioone nî baaritîîre Mûrungu wa Israeli igongwana. Bararita ndeegwa îkûmi na ijîîrî (12) nîûntû bwa Israeli yonthe, na ntûrûme mîrongo kenda na ithanthatû (96), na tûtûrûme mîrongo mûgwanja na mûgwanja (77) nîûntû bwa kîgongwana gîa gwakîîria kîa Israeli yonthe. Ningî bararita nthenge îkûmi na ijîîrî nîûntû bwa kîgongwana gîa kûthiria meeyia. Biu bionthe biaarî kîgongwana kîa MWATHANI gîa gwakîîria.

³⁶Nabo baranenkanîra mawaatho ja mûnene kîrî nchaama na arûngamîîri barîa baathanaga nthîgûrû ya bwa rûgûrû rwa Rûûjî rwa Eufurate; nabo baraigîka antû bau na mantû jegiî nyomba ya Mûrungu.