Read KIMERU BIBLE PROTESTANT EDITION Neh 10 Bible Online

Neh 10 - KIMERU BIBLE PROTESTANT EDITION bible

Neh 10

¹Nehemia mûtaana wa Hakalia nîwe waarî wa mbere gwîkîra kîrore kîu. Nehemia nîwe waarî mûrûngamîîri. Zedekia nîwe wathingatîre Nehemia gwîkîra kîrore.

²Athînjîri-Mûrungu baba nîbo beekîîre kîrore bathingatîte Zedekia: Seraia, na Azaria, na Jeremia,

³na Pashuri, na Amaria, na Malikija,

⁴na Hatushi, na Shebania, na Maluki,

⁵na Harimu, na Meremothi, na Obadia,

⁶na Danieli, na Ginethoni, na Baruku,

⁷na Meshulamu, na Abija, na Mijamini,

⁸na Maazia, na Biligai, na Shemaia.

⁹Alawi baba nî beekîîre kîrore bathingatîte athînjîri-Mûrungu: Jeshua, mûtaana wa Azania, na Binui wa mûciî jwa Henadadi, na Kadimieli.

¹⁰Alawi bangî barîa beekîîre kîrore nî: Shebania, na Hodia, na Kelita, na Pelaia, na Hanani,

¹¹na Mika, na Rehobu, na Hashabia,

¹²na Zakuri, na Sherebia, na Shebania,

¹³na Hodia, na Bani, na Beninu.

¹⁴Nabo atongeeria baba nî bekîîre kîrore: Paroshi, na Pahathi-moabu, na Elamu, na Zatu, na Bani,

¹⁵na Buni, na Azigadi, na Bebai,

¹⁶na Adonija, na Bigivai, na Adini,

¹⁷na Ateri, na Hezekia, na Azuri,

¹⁸na Hodia, na Hashumu, na Bezai,

¹⁹na Harifu, na Anathothi na Nebai,

²⁰na Magipiashi, na Meshulamu, na Heziri,

²¹na Meshezabeli, na Zadoki, na Jadua,

²²na Pelatia, na Hanani, na Anaia,

²³na Hoshea, na Hanania, na Hashubu,

²⁴na Haloheshi, na Pila, na Shobeki,

²⁵na Rehumu, na Hashabina, na Maaseia,

²⁶na Ahia, na Hanani, na Anane,

²⁷na Maluki, na Harimu, na Baanaha.

²⁸Tuî antû ba Israeli, amwe na eekûrû beetû, na aana beetû barîa barî na kîrîra nî tûciathûranîte na ageni barîa bakaraga nthîgûrûûne yeetû. Ningî kinya athînjîri-Mûrungu, Alawi, na aini na antû barîa baritaga ngûgî kîûrûûne kîa Mûrungu, nî baciathûranîte na ageni bau ba kuuma nthîgûrû ingî.

²⁹Tûrî amwe na atongeeria beetû nî tûkûrîa muuma tûkiugaga atî tûrogwatwa nî kîrumi twarega kûthingata Waatho bwa Mûrungu bûrîa aanenkeere nthûûmba yaawe Musa nîûntû bweetû. Ningî tûrogwatwa nî kîrumi kîu twarega kwathîkîra maathana na mawaatho jonthe ja MWATHANI Mwathi weetû.

³⁰ Tûtîkoroendia aarî beetû kîrî antû ba mîgongo îngî barîa batwîre nthîgûrûûne yeetû kana tûgûrîra nthaka cieetû aarî baao.

³¹ Tûtîgûraga into kana irio ntukû ya sabatû kana ntukû ingî cia thigûûnkû kuuma kîrî antû ba mîgongo îngî barîa batwîre nthîgûrûûne yeetû. Tûtîrîmaga miuunda yeetû mwaka jwa mûgwanja jwaakinya na tûkarekagîra barîa bakethagîrwa barî na marandû.

³² Ningî tûkaaritaga gachunchî kanini ga fetha o mwaka nîûntû bwa ngûgî irîa iritagwa kîûrûûne.

³³Fetha îîu îgatumagîrwa nîûntû bwa into birîa bikethagîrwa bikîendekanaga kîûrûûne. Nabio nî mîgaate yaathûrîri Mûrungu, na igongwana bia irio na bia gwakîîria birîa biaaritagwa ntukû cionthe, na bia sabatû, na bia mweri jûkîguûka, na bia biatho bitue na bia into bibitheru, na bia kûthiria meeyia ja Israeli na igongwana nîûntû bwa ngûgî irîa iritagwa kîûrûûne.

³⁴Baatuî amwe na athînjîri-Mûrungu, na Alawi tûkaaringaga kuura o mwaka o mwaka nîkenda tûmenya nî mîciî îrîkû îkaareetaga nkû kîûrûûne kîa Mûrungu weetû. Nacio nîcio îgaakagîîria kîgongwana kûringana na Waatho nîûntû bwa MWATHANI Mûrungu weetû.

³⁵ Ningî tûkaareetaga maketha ja mbere ja miuunda yeetû na matuunda ja mbere ja mituunda yeetû. Najo tûkaajareetaga kîûrûûne o mwaka o mwaka.

³⁶ Tûkaathûragîra Mûrungu ataana beetû ba rikithaathi na rikithaathi cia ndîîthia cieetû. Bo amwe na ndîîthia iu tûkabaikagia kîrî athînjîri-Mûrungu o ta ûrîa kwaandîki Wathoone.

³⁷ Ningî tûkaaritaga mîgaate ya mbere kuumania na maketha jeetû îrî kîgongwana, na matuunda, na ndibei na maguta ja nzeituni tûgaikia kîûrûûne kîrî athînjîri-Mûrungu. Ningî tûkaaritaga gîchunchî kîmwe kuuma kîrî îkûmi kîa maketha jeetû tûgakînenkanîra kîrî Alawi. Alawî nîbo babuîrîte kûûthûranagia ichunchî biu bia îkûmi ntûûreene cieetû.

³⁸ Athînjîri-Mûrungu ba rûrîîjo rwa Aaroni bakethagîrwa barî amwe na Alawi îgiita rîa kûûthûrania gîchunchî kîmwe kuuma kîrî îkûmi. Alawi nîbo bagaikagia gîchunchî kîmwe kuuma kîrî îkûmi kuumania na ichunchî biu bia îkûmi tûnyomba twa gwîka into kîûrûûne.

³⁹Tuî antû ba Israeli na Alawi tûkareetaga into bia maketha jeetû, na ndibei, na maguta ja nzeituni tûnyomba tûrîa twîkagwa into bia kîûrû birîa bitumagîrwa antû bakîrîa. Tûnyomba tûu nîtu tûkaragwa nî athînjîri-Mûrungu barîa beethagîrwa barî ngûgîîne, na akaria kîûrû, na aini. Tuî tûtîtîîjîra kîûrû.