Read KIMERU BIBLE PROTESTANT EDITION Neh 11 Bible Online

Neh 11 - KIMERU BIBLE PROTESTANT EDITION bible

Neh 11

¹Atongeeria ba antû ba Israeli baatûûraga Jerusalemu. Antû bangî ba Israeli nî baaringîre kuura nîkenda bamenya nî muntû ûrîkû kuuma o mûciî ûgeeta gûtûûra Jerusalemu. Antû bau bangî ba Israeli nî baatûûrîre ntûûreene ingî.

²Antû nî baakumîrie antû bonthe barîa baairitîre bongwa gwîta gûtûûra Jerusalemu.

³ Antû bangî barîa baatûûraga ntûûreene iu ingî, amwe na athînjîri-Mûrungu, na Alawi, na ariti ngûgî kîûrûûne, na nchiarwa cia barîa baatumîkagîra Solomoni nî baatûûraga ithakeene birîa baagaîri.

⁴Antû bamwe ba mwîrîga jwa Juda na ba mwîrîga jwa Benjamini nî baatûûraga Jerusalemu. Mwîrîgeene jwa Juda nî kwaarî na Athaia mûtaana wa Uzia, Uzia aarî mûtaana wa Zekaria. Biûjûjû bingî bia Athaia biaarî Amaria, na Shefatia, na Mahalaleli. Bau bonthe baarî nchiarwa cia Perezi mûtaana wa Juda.

⁵Antû bangî kuuma mwîrîgeene jwa Juda baarî Maaseia mûtaana wa Baruku, Baruku aarî mûtaana wa Kolihoze. Biûjûjû bingî bia Maaseia biaarî Hazaia, na Adaia, na Joiaribu, na Zekaria. Bau bonthe baarî nchiarwa cia Shela mûtaana wa Juda.

⁶Nchiarwa cionthe cia Perezi irîa ciaatûûraga Jerusalemu ciaarî antû magana jana ja mîrongo îtaantatû na banaana (468). Antû bau bonthe baarî antû ba îgweta.

⁷Antû barîa baatûûraga Jerusalemu kuuma mwîrîgeene jwa Benjamini baarî Salu mûtaana wa Meshulamu, Meshulamu aarî mûtaana wa Joedi. Biûjûjû bingî bia Salu biaarî Pedaia, na Kolaia, na Maaseia, na Ithieli, na Jeshaia.

⁸Antû bangî ba mwîrîga jwa Benjamini barîa baatûûraga Jerusalemu baarî Gabai na Salai. Antû bonthe ba mwîrîga jwa Benjamini barîa baatûûraga Jerusalemu baarî magana kenda ja mîrongo îîrî na banaana (928).

⁹Joeli mûtaana wa Zikiri aarî mûtongeeria wa antû ba Jerusalemu. Juda mûtaana wa Hasenua nîwe waarî mûnini wa Joeli.

¹⁰Athînjîri-Mûrungu barîa baatûûraga Jerusalemu baarî Jakini, na Jedaia mûtaana wa Joiaribu,

¹¹na Seraia mûtaana wa Hilikia. Hilikia aarî mûtaana wa Meshulamu. Biûjûjû bingî bia Zeraia biaarî Zadoki, na Meraiothi, na Ahitubu ûrîa waarî mûthînjîri-Mûrungu ûrîa mûnene.

¹²Athînjîri-Mûrungu ba mwîrîga jûmwe na Zeraia barîa baatumîkaga kîûrûûne baarî antû magana janaana ja mîrongo îîrî na baîrî (822). Mûthînjîri-Mûrungu ûngî ûrîa waatûûraga Jerusalemu eetagwa Adaia mûtaana wa Jerohamu, Jerohamu aarî mûtaana wa Pelalia. Biûjûjû bingî bia Adaia biaarî Amuzi, na Zekaria, na Pashuri, na Malikija.

¹³Antû bonthe barîa baarî ba mwîrîga jûmwe na Adaia, barîa baarî atongeeria ba mîciî yaao Jerusalemu baarî antû magana jaîrî ja mîrongo îna na baîrî (242). Mûthînjîri-Mûrungu ûrîa waatûûraga Jerusalemu aarî Amashisai mûtaana wa Azareli. Azareli aarî mûtaana wa Ahazai. Biûjûjû bingî bia Amashisai biaarî Meshilemothi na Imeri.

¹⁴Kuuma mwîrîgeene jûu jwa Amashisai nî kwaarî na nchamba cia ndwaa antû îgana rîa mîrongo îîrî na banaana (128). Mûtongeeria waao aarî Zabidieli na aaumîte mûciî jwaarî na îgweta.

¹⁵Alawi barîa baatûûraga Jerusalemu baarî Shemaia mûtaana wa Hashubu, Hashubu aarî mûtaana wa Azirikamu. Biûjûjû bia Shemaia biaarî Hashabia na Buni.

¹⁶Shabethai na Jozabadi baarî atongeeria babanene ba Alawi barîa baarûngamîrîte ngûgî îrîa yaaritagwa oome ya kîûrû.

¹⁷Mûlawi ûngî ûrîa waatûûraga Jerusalemu aarî Matania mûtaana wa Mika, Mika mûtaana wa Zabidi. Matania aarî wa rûrîîjo rwa Asafu. Matania ûu nîwe waatongagîîria aini rîrîa kweethagîrwa kûrî na maromba ja gûcokia nkaatho. Bakibukia nîwe waarî mûnini wa Matania. Mûlawi ûngî ûrîa waatûûraga Jerusalemu aarî Abuda mûtaana wa Shamua, Shamua aarî mûtaana wa Galali. Abuda aarî wa rûrîîjo rwa Jeduthuni.

¹⁸Alawi bonthe barîa baatûûraga Jerusalemu baarî antû magana jaîrî ja mîrongo înaana na bana (284).

¹⁹Akaria ba kîûrû barîa baatûûraga Jerusalemu baarî Akubu, na Talimoni, na antû ba ndûgû ciaao. Bonthe baarî antû îgana rîa mîrongo mûgwanja na baîrî (172).

²⁰Antû bangî ba Israeli barîa baatûûraga ntûûreene iu ingî cia nthîgûrû ya Juda amwe na athînjîri-Mûrungu, na Alawi nî baatûûraga ithakeene birîa baagaîri.

²¹Îndî antû barîa baaritaga ngûgî kîûrûûne baakaraga rûteere rûmwe rwa Jerusalemu rweetagwa Ofeli. Atongeeria baao baarî Ziha na Gishipa.

²²Mûrûngamîîri wa Alawi barîa baatûûraga Jerusalemu nî Uzzi, mûtaana wa Bani, Bani mûtaana wa Hushabia. Biujûûjû bia Hushabia biaarî Matania, na Mika. Uzzi aarî wa rûrîîjo rwa Asafu. Mûciî jwa Asafu nîju jwaarûngamîrîte aini ba kîûrû.

²³Aini bau nî baathingataga waatho bûrîa bwaumîte kîrî mûnene bwa kwonania ûrîa baabuîri kwina o ntukû o ntukû.

²⁴Muntû ûrîa waathuuri kwaragîîria antû ba Israeli Kîameene gîa Parasia eetagwa Pethalia mûtaana wa Meshezabeli. Pethalia aarî wa mûciî jwa Zera, wa kuuma mwîrîgeene jwa Juda.

²⁵Antû ba mwîrîga jwa Juda nî baatûûraga ntûûreene iji akuî na miuunda yaao: Kiriathiaraba, na Diboni, na Jekabuzeeli na tûtûûra tûrîa twaithiûrûkîrîte.

²⁶Ningî nî baatûûraga ntûûreene ya Jeshua, na ya Molada, na ya Bethipeleti,

²⁷na ya Hazari-shuali, na ya Beerisheba na tûtûûra tûrîa twaaithiûrûkîrîte.

²⁸Ningî nî baatûûraga ntûûreene ya Zikilagi, na ya Mekona, na tûtûûra tûrîa twaithiûrûkîrîte.

²⁹Ningî nî baatûûraga ntûûreene ya Enirimoni, na ya Zora, na ya Jaramuthi,

³⁰na ya Zanoa, na ya Adulamu na tûtûûra tûrîa twaaithiûrûkîrîte. Ningî nî baatûûraga ntûûreene ya Lakishi na miuundeene îrîa yaamîthiûrûkîrîte, na bangî Azeka na tûtûûra tûrîa twaamîthiûrûkîrîte. Tontû bûû, antû ba Juda baatûûraga ntûûreene irîa ciaarî gatîgatî ka Beerisheba îrîa yaarî bwa ûmotho mwanka kîguuruune kîa Hinomu kîrîa kîaarî bwa ûrîo.

³¹Antû ba mwîrîga jwa Benjamini nî baatûûraga ntûûreene iji: Geba, na ya Mikimashi, na ya Ai, na ya Betheli, na tûtûûra tûrîa twaithiûrûkîrîte.

³²Ningî nî baatûûraga ntûûreene ya Anathothi, na ya Nobu, na ya Anania,

³³na ya Hazori na ya Rama, na ya Gitaimu,

³⁴na ya Hadidi, na ya Zeboimu, na ya Nebalati,

³⁵na ya Lodi, na ya Ono, na kîguuruune kîa Atea.

³⁶Ikundi bimwe bia Alawi barîa baatûûraga nthîgûrûûne ya Juda nî beerîrwe bagatûûre amwe na antû ba mwîrîga jwa Benjamini.