Read KIMERU BIBLE PROTESTANT EDITION Neh 12 Bible Online

Neh 12 - KIMERU BIBLE PROTESTANT EDITION bible

Neh 12

¹Athînjîri-Mûrungu, na Alawi barîa baacokere kuuma kîthamîrioone batongeeretue nî Zerubabeli mûtaana wa Shealitieli barî na Jeshua, mûthînjîri-Mûrungu ûmûnene nî baba: Seraia, na Jeremia, na Ezra,

²na Amaria, na Maluki, na Hatushi,

³na Shekania, na Rehumu, na Meremothi,

⁴na Ido, na Ginethoi, na Abija,

⁵na Mijamini, na Maadia, na Biliga,

⁶na Shemaia, na Joiaribu, na Jedaia,

⁷na Salu, na Amoko, na Hilikia, na Jedaia. Bau nîbo baarî atongeeria ba athînjîri-Mûrungu îgiiteene rîa Joshua.

⁸Alawi barîa baacokere kuuma kîthamîrioone baarî: Jeshua, na Binui, na Kadimieli, na Sherebia, na Juda, na Matania. Bau nîbo baarî atongeeria ba aini barîa bainaga ndwîmbo cia gûcokia nkaatho.

⁹Alawi baba nîbo baarî atongeeria ba aini barîa bainaga bagîcokanagîria: Bakibukia na Uno. Nabo nî baateethagîîrua nî Alawi bangî.

¹⁰Joshua aarî îthe wa Joiakimu, Joiakimu aarî îthe wa Eliashibu, Eliashibu aarî îthe wa Joiada,

¹¹Joiada aarî îthe wa Jonathani, Jonathani aarî îthe wa Jadua.

¹²Rîrîa Joiakimu aarî mûthînjîri-Mûrungu ûrîa mûnene, baba nîbo baarî atongeeria ba mîciî ya athînjîri-Mûrungu: Meraia wa kuuma mûciî jwa Seraia, na Hanania wa mûciî jwa Jeremia.

¹³Meshulamu aarî wa mûciî jwa Ezra, na Jehohanani aarî wa mûciî jwa Amaria.

¹⁴Jonathani aarî wa mûciî jwa Malukî, na Josefu wa mûciî jwa Shebania.

¹⁵Adena aarî wa mûciî jwa Harimu, na Helikai wa mûciî jwa Meraiothi.

¹⁶Zekaria aarî wa mûciî jwa Ido, na Meshulamu wa mûciî jwa Ginethoni.

¹⁷Zikiri aarî wa mûciî jwa Abija, mûtongeeria wa mûciî jwa Miniamini atiijîkeene. Pilitai aarî wa mûciî jwa Moadia.

¹⁸Shamua aarî wa mûciî jwa Biliga, na Jehonathani aarî wa mûciî jwa Shemaia.

¹⁹Matenai aarî wa mûciî jwa Joiaribu, na Uzzi aarî wa mûciî jwa Jedaia.

²⁰Kalai aarî wa mûciî jwa Salai, na Eberi aarî wa mûciî jwa Amoko.

²¹Hashabia aarî wa mûciî jwa Hilikia, na Nethaneli aarî wa mûciî jwa Jedaia.

²²Mariîtwa ja mîciî ya Alawi na ya athînjîri-Mûrungu nî jaandîkagwa rîrîa Eliashibu na Joiada, na Johanani, na Jadua baarî athînjîri-Mûrungu barîa anene. Mariîtwa jau jaathirîrie kwaandîkwa rîrîa Dario aarî mûnene wa Parasia.

²³Mariîtwa ja atongeeria ba mîciî ya Alawi jaandîkîrwe Yukuune rîrîa rîaandîkagwa mantû ja o ntukû o ntukû mwanka îgiiteene rîa Johanani mûtaana wa Eliashibu.

²⁴Atongeeria ba Alawi tabo Hashabia, na Sherebia, na Jeshua, na Binui, na Kadimieli, nîbo baagaanîrie aini ikundi biîrî birîa biaakumagia Mûrungu bigîcokanagîria, o ta Daudi muntû wa Mûrungu aaugîîte.

²⁵Matania, na Bakibukia, na Obadia, na Meshulamu, na Talimoni, na Akubu, baarî akaria ba kîûrû barîa baarûngamîrîte tûnyomba tûrîa tweekagwa into tûrîa twaarî mpingîroone.

²⁶Antû bau baatûûraga îgiiteene rîa Joiakimu mûtaana wa Jeshua, Jeshua ûrîa waarî mûtaana wa Jozadaki. Ningî nî baatûûraga îgiiteene rîrîa Nehemia aarî mûrûngamîîri, na rîa Ezra ûrîa waarî mûthînjîri-Mûrungu na aarî mûritani wa Waatho.

²⁷Rîrîa rûthingo rwa Jerusalemu rwaathûragîrwa MWATHANI, Alawi nî beetîrwe kuuma kûrîa kunthe baatûûraga nîkenda beeta Jerusalemu kwiringanîra na bangî gûkûngwîra mantû jau. Nabo baakûngwagîra bagwîrîtue na bakiinaga ndwîmbo cia gûcokia nkaatho. Baainaga, na bagatumîra thaani cia kûringithania na kînanda na wandîîndî.

²⁸Aini ba mîciî ya Alawi barîa baatûûraga tûtûûreene tûrîa twaathiûrûkîrîte Jerusalemu na tûrîa twaathiûrûkîrîte Netofa nî boothûranîre.

²⁹Ningî barîa baatûûraga tûtûûreene tûrîa twaathiûrûkîrîte Bethigiligali, na Geba, na Azimavethi, nî boothûranîre.

³⁰Athînjîri-Mûrungu na Alawi nî baathithîrie kîgongwana gîa kwitheria na kûtheria antû, na gîa kûtheria mpingîro na rûthingo.

³¹Naani nî ndaatûmîre atongeeria ba Juda baitia îgûrû rîa rûthingo. Nabo nî baatongeererie ikundi biîrî bibinene bireeta bikiinaga. Gîkundi kîmwe kîreeta bwa ûrîo kîerekerete mpingîro îrîa yeetagwa Mpingîro ya Matî.

³²Hoshaia na nusu ya atongeeria ba Juda bareeta barî nyuma ya gîkundi kîu.

³³Athînjîri-Mûrungu baba nîbo baathingatîre bakîringaga tarumbeta: Azaria, na Ezra, na Meshulamu

³⁴na Juda, na Benjamini, na Shemaia, na Jeremia,

³⁵Zekaria mûtaana wa Jonathani, Jonathani aarî mûtaana wa Shemaia. Biûjûjû bingî bia Zekaria biaarî Matania, na Mikaia, na Zakuri. Bau baarî ba mûciî jwa Asafu.

³⁶Zekaria aathingati nî antû ba ndûgû ciaao tabo Shemaia, na Azareli, na Milalai, na Gilalai, na Maai, na Nethaneli, na Juda, na Hanani. Bau beetîte bakiinaga na into bia kwina o ta birîa biaatumagîrwa nî muntû wa Mûrungu tawe mûnene Daudi. Ezra ûrîa waarî mwaandîki, nî eetîre aarî mbere ya gîkundi kîu.

³⁷Gîkundi kîu nî gîeetîre mwanka barakinya mpingîroone îrîa yeetagwa mpingîro ya Kîthima. Kuuma au bareetîîra nkinyoone irîa ciaitagia ntûûreene ya Daudi. Bareeta barakûrûkîîra gîkaro kîrîa kîaarî kîa Daudi, barakinya mpingîroone îrîa yeetagwa mpingîro ya Rûûjî, îrîa yaarî bwa gaiti ka ntûûra.

³⁸Gîkundi kîngî kîa barîa bacokagia nkaatho kîreeta bwa ûmotho. Naani amwe na nusu îngî ya antû tûreeta tûrî nyuma. Tûreeta tûrakûrûka mûnaara jûrîa jweetagwa Mûnaara jwa Mariiko mwanka tûrakinya arîa gweetagwa Rûthingo Rûrwariî.

³⁹Kuuma au tûreeta tûrakûrûka mpingîro îrîa yeetagwa Mpingîro ya Efuraimu, na îrîa yeetagwa mpingîro Înkûrû, na îrîa yeetagwa mpingîro ya Makûyû. Tûreeta tûrakûrûka mûnaara jûrîa jweetagwa Mûnaara jwa Hananeli na jûrîa jweetagwa Mûnaara jwa Îgana, mwanka tûrakinya mpingîro îrîa yeetagwa Mpingîro ya Ng'ondu. Rîrîa twakinyîre mpingîro îrîa yaatagwa Mpingîroone ya Akaria tûrarûngama.

⁴⁰Tontû bûû, ikundi biu bio-biîrî birîa biaacokagia nkaatho birakinya au mbere ya kîûrû. Kinya ûûni na atongeeria barîa twaarî nabo tûrakinya o.

⁴¹Ningî nî twaarî amwe na athînjîri-Mûrungu baba barîa baaringaga tarumbeta: Eliakimu, na Maaseia, na Miniamini, na Mikaia, na Elioenai, na Zekaria, na Hanania,

⁴²na Maaseia, na Shemaia, na Eleazari, na Uzzi, na Jehohanani, na Malikija, na Elamu, na Ezeri. Nabo aini nî bainaga batongeeretue nî Jezirahia.

⁴³Ntukû îîu antû nî baaritîre igongwana bibingî bagwîrîtue nîûntû Mûrungu nî aatûmîte bagwîrua. Kinya aka na twaana nî baagwîrîîtue mono. Antû nî baaigagua gûkûngwîra kûrîa kwarî Jerusalemu barî kûraaja.

⁴⁴Ntukû o îîu yongwa antû baakûngwagîra, antû bamwe nî baathuurîrwe barûngamagîîra tûnyomba tûrîa twekagwa into birîa antû baareetaga kîûrûûne. Into biu biaarî gîchunchî kîmwe kuuma kîrî îkûmi, maketha na matuunda ja mbere. Antû bau nîbo beetaga tûtûûreene kûgîîra into birîa antû baabuîri kûrita nîûntû bwa athînjîri-Mûrungu na Alawi o ta ûrîa Waatho bwaugaga. Antû ba nthîgûrû ya Juda nî baagwîrîîtue nîûntû bwa ngûgî îrîa athînjîri-Mûrungu na Alawi baaritaga.

⁴⁵ Nîkwîthîrwa nî baaritaga igongwana bia mîthemba yonthe nîûntû bwa kûthaathayia Mûrungu. Nabo aini na akaria ba kîûrû nî baaritaga ngûgî o ta ûrîa Daudi na mûtaana waawe Solomoni baaugîîte.

⁴⁶Kuuma îgiiteene rîa mûnene Daudi na Asafu ûrîa waarî mwini, nî kweethagîrwa kûrî na atongeeria ba aini na nî kweethagîrwa kûrî na ndwîmbo cia gûkumia na gûcokeria Mûrungu nkaatho.

⁴⁷Îgiiteene rîa Zerubabeli na rîa Nehemia antû bonthe ba Israeli nî baaritaga into birîa biendekanaga kûritagwa o ntukû, nîûntû bwa aini na akaria ba kîûrû. Ningî antû nî baaritaga gîchunchî kîmwe kuuma kîrî îkûmi nîûntû bwa Alawi. Nabo Alawi nî baaritaga gîchunchî kîmwe kuuma kîrî îkûmi kîa birîa baanenkagîrwa bakanenkera athînjîri-Mûrungu ba rûrîîjo rwa Aaroni.