Read KIMERU BIBLE PROTESTANT EDITION Neh 2 Bible Online

Neh 2 - KIMERU BIBLE PROTESTANT EDITION bible

Neh 2

¹Kûrî mweri jwa Nisani[2] mwakeene jwa mîrongo îîrî jwa waathani bwa mûnene Aritashashita, mûnene nî aarî meetheene akîrîîjaga. Naani nî ndaamwikîîrie ndibei îndî nî ndaarî na kîeba mono. Mûnene ataarî akûmbona nkari ûu kaîrî.

²Mûnene arambûûria atîrî, “Nîkî tontû withikîrîte ûjû na ûtîajîtue? No mwanka kwîthîrwe kûrî na ûntû bûgûkûthangîkia.” Rîu ndîramaka mono.

³ Ndîreera mûnene atîrî, “Gwe mûnene ûrotûûra ûtûûro bûbûraaja! Nîatîa mpûûmba kûrega kwithikîîra o rîrîa ntûûra îrîa biûjûjû bieetû biathikîrwe yeete îgaanjo na mpingîro ciaayo ciaîthua buru?”

⁴Mûnene arambûûria atîrî, “Nîatîa ûkwenda ngûteethia?” Naani ndîraromba Mûrungu wa Îgûrû.

⁵Rîu ndîreera mûnene atîrî, “Woona kwagîrîte mbîtîkîîria ncoke nthîgûrûûne ya Juda, ntûûreene îrîa biûjûjû bieetû bithiki nîkenda mîaka.”

⁶Mûka wa mûnene nî aakari nthî rûteere rwa mûnene. Mûnene arambûûria atîrî, “Nî îgiita rîng'ana atîa ûkaajûkia gwîta na gûcoka? Nîrî ûgaacoka?” Mûnene arambîtîkîîria mbîta naani ndîramwîra rîrîa ngaacoka.

⁷Ndîracoka ndîreera mûnene atîrî, “Woona kwagîrîte aandîkîra arûngamîîri barîa baathanaga nthîgûrû irîa irî bwa rûgûrû rwa mûuro jwa Eufurate, nîkenda bambîtîkîîria nkûrûkîîra ku ngîîta nthîgûrûûne ya Juda.

⁸Ningî ûnenkere barûga mbikîrie Asafu ûrîa ûmenyagîîra mwitû jwa mûnene, nîkenda anenkera mbaaû cia gwaka mpingîro ya giitiiro kîrîa kîrî akuî na kîûrû, na cia nthingo cia ntûûra, na cia gwaka nyomba îrîa ngaakaraga.” Mûnene areetîkîîria kûnthithîria ûrîa ndaamûûrîtie nîûntû Mûrungu nî aarî amwe naani.

⁹Mûnene aranenkanîra asikarî ba mbarathi nîkenda beetania naani. Tûreeta tûrakinya nthîgûrû îrîa îrî bwa rûgûrû rwa mûuro jwa Eufurate. Ndîranenkera arûngamîîri barîa baathanaga nthîgûrû îrîa îrî bwa rûgûrû rwa mûuro jwa Eufurate barûga.

¹⁰Îndî rîrîa Sanibalati ûrîa waaumîte ntûûreene ya Horoni na Tobia ûmwe wa atongeeria ba nthîgûrû ya Amoni baigîrue mantû jau, baarathûûra mono bakwigua kûrî muntû ûgûcwaa ûrîa Aisraeli boomba kwona wega.

¹¹Tontû bûû, nî ndeetîre ntûûreene ya Jerusalemu, ndîrakara ku ntukû ithatû.

¹²Gûtî muntû ndaamenyithîtie ûrîa Mûrungu aambîrîte mantû jegiî ntûûra îîu. Naani amwe na antû babakai twookîrîîre kûrî ûtukû tûreeta. Twaarî na ntigiri îmwe akî îrîa ndaathuutîte.

¹³Kûrî ûtukû o ûu, tûreeta tûraumagarîîra mpingîroone ya mûgwanthî, îrîa îrî bwa rûgûrû. Tûreeta bwa ûmotho tûrakûrûka kîthima gîa Nkûnga, mwanka mpingîroone îrîa matî jaateejagwa. Ndîreeta nkîraithaga ûrîa nthingo cia ntûûra ciaakoborangi na ûrîa mpingîro cia ntûûra ciaîthîîtue.

¹⁴Ndîreeta bwa gaiti ndîrakinya mpingîroone ya Kîthima na ndîrakinya kîthimeene kîa Mûnene, îndî kuuma au kajîra nî gaaciicimari mono. Ntigiri îrîa yaankamatîte îtîngî kûûmba gwîtîîra ku.

¹⁵Tontû bûû, ndîreetîîra mûgwanthî jwa Kidroni o ûtukû bûu, nkîraithaga ûrîa nthingo ciaakari. Naani ndîracokeera mpingîroone ya mûgwanthî, ndîracoka ntûûreene.

¹⁶Nabo atongeeria ba ntûûra bataamenyaga kûrîa ndaarî, kana ûrîa ndaathithagia. Ningî ntaarî ndîkûmenyithia Ayahudi bangî, kana athînjîri-Mûrungu, kana atongeeria, kana antû bangî barîa barîngî kûrita ngûgî.

¹⁷Rîu ndîrabeera atîrî, “Tûrî thîîneene înene, nîûntû ntûûra ya Jerusalemu nî yeetheetue îgaanjo na mpingîro ciaayo nî ithûûkangîtue. Tontû bûû, njûûni twake nthingo cia Jerusalemu, nîkenda tûtiga kûmenwa.”

¹⁸Ndîrabeera ûrîa Mûrungu eethîîrîtwe arî amwe naani agînteethagia. Ningî ndîrabeera ûrîa mûnene Aritashashita aambîrîte. Antû bau barambîîra atîrî, “Twambîîrieni gwaka.” Nabo barambîrîria kwithuranîra gwaka.

¹⁹Îndî rîrîa Sanibalati ûrîa wa kuuma ntûûra ya Horoni na Tobia mûtongeeria ûrîa waaumîte nthîgûrû ya Amoni, na Geshemu ûrîa waaumîte nthîgûrû ya Arabu, baaigîrue nteto iu, baratûthekera mono bagîtûcikûûraga. Nabo nî baatûûrîrie atîrî, “Nî ngûgî mbi îîjî bûkûrita? Nîka bûkwenda kûregana na ûrîa mûnene augîîte?”

²⁰Naani ndîrabacokeria atîrî, “Tuî tûtumîkagîra Mûrungu wa îgûrû na agaatûma tûûmbane ngûgîîne ya gwaka. Îndî buî bûtî na kiigai noo kîrîkû, kana yuga noo rîrîkû, kana ûntû noo bûrîkû bwa gûtûma bûgwetanîrua na ntûûra ya Jerusalemu.”