Read KIMERU BIBLE PROTESTANT EDITION Neh 3 Bible Online

Neh 3 - KIMERU BIBLE PROTESTANT EDITION bible

Neh 3

¹Eliashibu, mûthînjîri-Mûrungu ûrîa mûnene amwe na athînjîri-Mûrungu bangî, nî baakîre mpingîro îrîa yeetagwa mpingîro ya Ng'ondu. Baracoka baramîîkîra mîari. Baraathûra mpingîro îîu amwe na rûthingo rûrîa rwaarî akuî nayo, mwanka mûnaareene jûrîa jweetagwa Mûnaara jwa Îgana, na mwanka gûkinya Mûnaareene jwa Hananeli.

²Antû ba Jeriko nî baakîre rûthingo, kuuma au Eliashibu aatigîrîte. Zakuri mûtaana wa Imuri araaka ruu, kuuma arîa antû ba Jeriko baatigîîrîte.

³Nchiarwa cia Hasenaa nîcio ciaakîre mpingîro îrîa yeetagwa Mpingîro ya Gîkûyû. Nî beenjîîre itugî bareekîra mîari. Baamîakîre ûrîa îkombaga kwiingwa na kûrugûrwa.

⁴Meremothi mûtaana wa Uria, Urîa mûtaana wa Hakozi nî aakîre rûthingo rûu, kuuma arîa nchiarwa cia Hasenaa ciaatigîrîte. Meshulamu, mûtaana wa Berekia, Berekia mûtaana wa Meshezabeli araaka rûthingo rûu, kuuma arîa Meremothi aatigîîrîte. Zadoki mûtaana wa Baana araaka rûthingo rûu kuuma arîa Meshulamu aatigîîrîte.

⁵Antû ba ntûûra ya Tekoa nî baakîre rûthingo rûu, kuuma arîa Zadoki aatigîîrîte. Îndî antû ba îgweta ba ntûûra îîu bararega kûrita ngûgî îrîa baagaîri nî arûngamîîri baao.

⁶Joiada mûtaana wa Pasea, na Meshulamu mûtaana wa Besodeia nîbo baakîre mpingîro îrîa yeetagwa Mpingîro ya Jeshana, kuuma arîa antû ba ntûûra ya Tekoa baatigîîrîte. Bareenjîra itugî na bareekîra mîari ûrîa îkoombaga kwiingwa na kûrugûrwa.

⁷Melatia wa kuuma ntûûreene ya Gibeoni, na Jadoni kuuma ntûûreene ya Meronothi amwe na antû bangî kuuma ntûûreene ya Gibeoni, na ya Mizipa nî baakîre rûthingo rûu, kuuma arîa Joiada na Meshulamu baatigîîrîte. Baakîre mwanka barakinya arîa nyomba ya mûrûngamîîri ûrîa waathanaga bwa rûgûrû rwa mûuro jwa Eufurate yaarî.

⁸Uzieli mûtaana wa Harihaia ûrîa waarî mûturi, nî aakîre rûthingo rûu, kuuma arîa Melatia na antû bangî baatigîîrîte. Hanania ûrîa wathithagia marashi nî aakîre rûthingo rûu, kuuma arîa Uzieli aatigîîrîte. Aakîre mwanka arîa gweetagwa Rûthingo Rûrwariî.

⁹Refaia mûtaana wa Huri ûrîa waathaga rûteere rûmwe rwa Jerusalemu nî aakîre rûthingo rûu, kuuma arîa Hanania aatigîîrîte.

¹⁰Jedaia mûtaana wa Harumafu nî aakîre rûthingo rûu kuuma arîa Refaia aatigîîrîte, mwanka arakinya akuî na nyomba yaawe. Hatushi mûtaana wa Hashabineia nawe araaka rûthingo rûu kuuma arîa Jedaia aatigîîrîte.

¹¹Malikija mûtaana wa Harimu, amwe na Hashubu mûtaana wa Pahathi-moabu nî baakîre rûthingo rûu, kuuma arîa Hatushi aatigîîrîte. Ningî baraaka kinya mûnaara jûrîa jwetagwa Mûnaara jwa Mariiko.

¹²Shalumu mûtaana wa Haloheshi ûrîa waathaga rûteere rûngî rwa Jerusalemu araaka rûthingo rûu, kuuma arîa Malikija na Hashubu baakinyîtie. Shalumu aateethagua gwaka nî aarî baawe.

¹³Hanuni amwe na antû barîa baatwîre ntûûreene ya Zanoa nî baakîre mpingîro îrîa yeetagwa Mpingîro ya Kîguuru. Bareenjîra itugî na bareekîra mîari, ûrîa îkoomba kwiingwa na kûrugûrwa. Ningî baraaka rûthingo rwa ntûûra rwa ûraaja bwa mita magana jataano (500m) mwanka barakinya mpingîroone îrîa yeetagwa Mpingîro ya Matî.

¹⁴Malikija, mûtaana wa Rekabu, ûrîa waarî mûtongeeria wa nthîgûrû ya Bethihazikeremu, nî aakîre mpingîro îrîa yeetagwa Mpingîro ya Matî. Areenjîra itugî na areekîra mîari ûrîa îkomba kwiingwa na kûrugûrwa.

¹⁵Shalumu mûtaana wa Kolihoze, ûrîa waathaga kûu ntûûreene ya Mizipa, nî aakîre mpingîro îrîa yeetagwa Mpingîro ya Kîthima. Aamiakîre aramiimba na aramîîkîra mîari ûrîa îkomba kwiingwa na kûrugûrwa. Ningî nî aakîre rûthingo rwa ntûûra au karieene ka Shela, karîa kaarî akuî na kamuunda ka mûnene. Aakîre rûthingo mwanka arakinya tûkinyoone tûrîa antû baatumagîra bakîînama kuuma ntûûreene ya Daudi.

¹⁶Nehemia mûtaana wa Azibuku, ûrîa waathaga rûteere rûmwe rwa Bethizuri nî aakîre rûthingo rûu, kuuma arîa Shalumu aakinyîtie. Aarwakîre arakinya arîa kwaarî na mbîrîra ya Daudi, na kwaarî karîa, na kwaarî na kambî ya njûûrî.

¹⁷Kuuma au Nehemia aatigîîrîte Alawi nîbo baambîrîîrie gwaka rûthingo rwa ntûûra. Rehumi mûtaana wa Bani nî aakîre rûthingo rûu kuuma au Nehemia aatigîîrîte. Hashabia ûrîa waathaga rûteere rûmwe rwa Keila nîwe waakîre rûthingo rûu, kuuma arîa Rehumu aatigîîrîte. Aakîre rûthingo rûu antûûne a gûntû kûrîa aathaga.

¹⁸Bavai mûtaana wa Henadadi ûrîa waathaga rûteere rûngî rwa Keila araaka kuuma au Hashabia aatigîîrîte.

¹⁹Ezeri mûtaana wa Jeshua ûrîa waathanaga kûu Mizipa nî aakîre rûthingo rûu kuuma arîa Bavai aatigîîrîte. Arwakîre mwanka arakinya nyomba îrîa mathaga ja ndwaa jeekagwa, na gwîta mwanka arîa rûthingo rwathiorereete.

²⁰Baruku mûtaana wa Zabai nî aakîre rûthingo rûu kuuma arîa Ezeri aatigîîrîte. Aarwakîre mwanka arîa nyomba ya Eliashibu, mûthînjîri-Mûrungu ûrîa mûnene yaarî.

²¹Meremothi mûtaana wa Uria, Uria mûtaana wa Hakozi nî aakîre rûthingo rûu, kuuma arîa Baruku aatigîîrîte. Aarwakîre kuuma mwariine jwa nyomba ya Eliashibu mwanka mûthia jwaayo.

²²Athînjîri-Mûrungu barîa baatûûraga akuî na ntûûra ya Jerusalemu nîbo baakîre rûthingo rûu, kuuma arîa Meremothi aatigîîrîte.

²³Benjamini na Bashubu nî baakîre rûthingo rûu kuuma arîa athînjîri-Mûrungu baatigîîrîte. Baakîre rûthingo rûrîa rwerekeene na nyomba yaao. Maaseia mûtaana wa Anania nî aakîre rûthingo rûu mwanka rûteere rwa nyomba yaawe.

²⁴Binui mûtaana wa Henadadi nî aakîre rûthingo rûu kuuma arîa Azaria aatigîîrîte. Aarwakîre mwanka arîa rûthingo rwathiorereete.

²⁵Palali mûtaana wa Uzai nî aakîre rûthingo rûu kuuma arîa Binui aatigîîrîte. Aambîîrîîrie gwaka kuuma arîa rûthingo rwathiorereete mwanka mûnaareene jûrîa jwaarî nyomba ya ngoroba ya mûnene akuî na kîarago gîa akaria. Pedaia mûtaana wa Paroshi nî aakîre rûthingo rûu kuuma arîa Palali aatigîîrîte.

²⁶Pedaia aarwakîre eetîte bwa gaiti mwanka arakinya akuî na mpingîro îrîa yeetagwa mpingîro ya Rûûjî. Areeta na mbere kûrwaka mwanka mûnaareene jûrîa jwatumagîrwa gûkaria kîûrû.

²⁷Antû ba kuuma Tekoa nî baakîre rûthingo rûu kuuma arîa Pedaia aatigîîrîte. Ningî nî baarwakîre kuuma arîa mûnaareene jûrîa mûnene jwatûmagîrwa gûkaria kîûrû mwanka rûthingo rûrîa rwarî akuî na karîma ka Ofeli.

²⁸Athînjîri-Mûrungu bamwe nabo baakîre rûthingo rûu kuuma arîa antû ba Tekoa baakinyîtie. Baambîrîîrie gwaka beetîte bwa ûrîo kuuma mpingîroone îrîa yaatagwa mpingîro ya Mbarathi. O muntû aakaga rûthingo rûrîa rwaarî mbere ya nyomba yaawe.

²⁹Zadoki mûtaana wa Imeri aakîre rûthingo rûu, kuuma arîa athînjîri-Mûrungu baatigîîrîte. Aakîre rûthingo rûrîa rwaarî mbere ya nyomba yaawe. Shemaia mûtaana wa Shekania ûrîa waarî mûkaria wa mpingîro ya bwa gaiti aakîre rûthingo rûu kuuma arîa Zadoki aatigîîrîte.

³⁰Hanania mûtaana wa Shelemia na Hanuni mûtaana wa bataantatû wa Zalafu nîbo baakîre rûthingo rûu kuuma arîa Shemaia aatigîîrîte. Meshulamu mûtaana wa Berekia nî aakîre rûthingo rûu kuuma arîa Hanania na Hanuni baatigîîrîte. Aakîre rûthingo rûrîa rwaarî mbere ya nyomba yaawe.

³¹Malikija ûrîa mûturi nî aakîre rûthingo rûu kuuma arîa Meshulamu aatigîîrîte. Aarwakîre mwanka arîa nyomba ya ariti ngûgî ba kîûrû na abiashara baakaraga. Nyomba îîu yaarî akuî na mpingîro îrîa yeetagwa Mpingîro ya Mifikadi. Ningî nyomba îîu yaarî akuî na kanyomba ka ngoroba arîa rûthingo rwathiorereete.

³²Nabo aturi na abiashara nîbo baakîre rûthingo rûrîa rwatigeere mwanka mpingîroone îrîa yeetagwa Mpingîro ya Ng'ondu.