Read KIMERU BIBLE PROTESTANT EDITION Neh 4 Bible Online

Neh 4 - KIMERU BIBLE PROTESTANT EDITION bible

Neh 4

¹Rîrîa Sanibalati ûrîa waarî mûtongeeria wa Samaria aaigîrue atî Ayahudi nî bagwaka rûthingo, nî aathûûrîre mono araambîrîîria kûbacikûûra.

²Nî aarîrie mantû jaja antû barîa baarî amwe nawe bakiigagua na kinya atongeeria ba njûûrî ya Samaria bakiigagua. “Tûmuntû tûtû twa Ayahudi tûtî na inya tûrîthûgaania nîatîa tûkûthithia? Ga tûkwenda gwaka rûthingo rwa ntûûra? Ga tûkûthûgaania atî kinya twarita igongwana ngûgî îkaathira na ntukû îmwe? Nîka bakûthûgaania atî mûthuthurîka jwa maiga jaja jaîîte jwoomba gwaka?”

³Tobia ûrîa waarî wa kuuma nthîgûrû ya Amoni nî aarûngami rûteere rwa Sanibalati. Aramwîra atîrî, “Nî rûthingo rûkari baba boomba gwaka? Kinya mbîrwa yongwa îkëeja kûrûkinya ka îrûkobora!”

⁴Nehemia nî aarombere akiugaga atîrî, “Itû Mûrungu, igua ûrîa bagûtûmeneeria. Barocokerwa nî rûmena rwaao. Baroithûkîrwa bagaikua kîthamîrioone nthîgûrû ya kûraaja.

⁵Ûkábarekera ûthûûku bwaao, kana ûûrîrua nî meeyia jaao nîûntû nî bakarîte bakîrumaga aaki rûthingo.”

⁶Tontû bûû, tûraaka rûthingo, rûrakinya nusu ya arîa rwendekanaga rûkinya gwitia bwa îgûrû. Twambîre kûthithia ûu nîûntû antû nî baarî na wîru bwa kûrita ngûgî.

⁷Îndî rîrîa Sanibalati, na Tobia, na antû ba kuuma Arabia, na ba Aamoni, na ba ntûûra ya Ashidodi, baaigîrue atî rûthingo rwa Jerusalemu no rûgwakwa, na atî makutho jarîa jaatigi nî jakûthingwa, barathûûra mono.

⁸Nabo bonthe bareeka nkireba ya kwithûkîra antû ba Jerusalemu na kûbangaratania.

⁹Naatuî tûraromba Mûrungu weetû na tûracwaa antû ba gûkaria ûtukû na mûthenya, antû batîkaithûke.

¹⁰Nabo antû ba nthîgûrû ya Juda nî bainaga rwîmbo bakiugaga atîrî, “Tûkûnoga nî gûkamata mûthuthurîka jwa maiga! Tûkaathiria gwaka rûthingo rûrû?”

¹¹Anthû beetû baathûgaanagia atî bagaatwithûkîra mbere ya tûmenya ûrîa bakûthithia, batûûrage, na bathirie ngûgî îrîa twaritaga.

¹²Îndî Ayahudi barîa baatûûraga amwe na anthû beetû nî beejaga magiita na magiita bagaatwîra atî anthû nî babangîte gûtwithûkîra.

¹³Tontû bûû, nî ndeerîre antû bajûkie mathaga ja ndwaa, bakabe rûthingoone kûrîa kwaarî na mîanya kûringana na mîîrîga yaao.

¹⁴Ndîgûtega bwega ûrîa mantû jaakari ndîreera atongeeria, na atongeeria ba njûûrî, na antû bonthe atîrî, “Bûgákîreeni anthû. Ririkaneeni atî MWATHANI arî inya na nî wa gûkîrwa. Tontû bûû, rwîreeni antû beenu; aana beenu, na aka beenu na mîciî yeenu.”

¹⁵Anthû beetû nî baamenyere mîbango îrîa baatûbangîrîte îmîthûûku îkûmenyekana. Ningî baramenya atî Mûrungu akûthûûkia mîbango yaao. Naatuî tûracoka ngûgîîne ya gwaka rûthingo.

¹⁶Kuuma rîu nusu ya antû barîa baaritaga ngûgî nî beetîre na mbere kûrita ngûgî. Nusu îngî îrabakaria îgwete mathaga ja ndwaa. Nabo atongeeria nî baaigîkaga antû barîa

¹⁷baakaga rûthingo. Antû baakamataga into bia gwaka na njara îmwe, na îîu îngî îgwete mathaga ja ndwaa.

¹⁸Aaki baakaga baikundîkîte mathaga ja ndwaa. Muntû ûrîa waanenkeri ngûgî ya kûringa tarumbeta îgiita rîa thîîna aarî akuî na ûûni Nehemia.

¹⁹Naani ndîreera antû, na atongeeria baao, na atongeeria ba njûûrî atîrî, “Rûthingo nî rûrûraaja, na aaki barîaka muntû arî kûraaja na ûngî.

²⁰Rîrîa bûkaigua tarumbeta yaringwa, bûûthûrane arîa tûkeethîrwa tûrî. Mûrungu weetû agatûrwîrîîra.”

²¹Tontû bûû, twaaritaga ngûgî kuuma rûkîîrî kainda mwanka gûgatuka. Nusu ya barîa baakaga baakaraga bagwete itumo.

²²Naani ndîreera antû barîa baaritaga ngûgî na atongeeria baao atîrî, “Nî kaaba bwîthagîrwe bûrî ntûûreene ûtukû bûmîkarîtie, gwakea bûgeeta na mbere gwaka.”

²³Ûûni na antû barîa baarî amwe naani, na nthûûmba ciaakwa, na akaria baakwa, twaaraaraga twîkîrîte nguû irîa twaaritaga ngûgî nacio na tûgweete mathaga ja ndwaa.