Read KIMERU BIBLE PROTESTANT EDITION Neh 5 Bible Online

Neh 5 - KIMERU BIBLE PROTESTANT EDITION bible

Neh 5

¹Îgiita rîmwe Ayahudi bamwe nî baambîrîîrie kûnung'una nîûntû bwa kwinyîîrua nî Ayahudi bangî.

²Ayahudi baugaga atîrî, “Tuî tûrî na aana babaingî. Tontû bûû, nî tûkwenda irio tûtîgaakue.”

³Ayahudi bangî baaugaga atîrî, “Nî tûkoomborithanîtie miuunda yeetû na miuunda yeetû ya mîzabibû, na nyomba cieetû nîkenda twona gîa kûgûra biakûrîa nakîo.”

⁴Ayahudi bangî nabo baaugaga atîrî, “Tûkoobeete mbeecha nîkenda tûrîa ûgoti bwa mûnene, nîûntû bwa miuunda yeetû, na miuunda yeetû ya mîzabibû.

⁵Gûtî mwanya jweetû na Ayahudi bau bangî. Aana baao bakari ûmwe na aana beetû. Îndî kweete no mwanka twendie aana beetû bae nkombo nîûntû bwa thîîna îrîa tûrî nayo. Nîkwîthîrwa antû bangî nî bajûkîîtie miuunda yeetû na miuunda ya mîzabibû.”

⁶Ûûni Nehemia nî ndaathûûrîre ndîkwigua ûrîa baanung'unîte bakîrîraga.

⁷ Rîrîa ndaathûgaanîrie mantû jau bwega nî ndaateterie atongeeria na atongeeria ba njûûrî ndîrabooria atîrî, “Nîkî tontû bûkwinyîîria antû beenu ûjû mantûûne jegiî ûgoti?” Nehemia areetana mûcemanio jûmûnene jwa kwarîîria mantû jau.

⁸Areera atongeeria atîrî, “Tuî nî tûgeretie ûrîa tûkûûmba kûgûra Ayahudi barîa beendeetue barî nkombo mîgongoone îngî. Îndî buî, nîka bûkwendia antû beenu bongwa kîrî ageni ba kûngî.” Nabo atongeeria barakira ki.

⁹Ningî ndîreeta na mbere ndîrabeera atîrî, “Mantû jarîa bûkûthithia jatîbuui. Bûbuîrîte kwathîkîra Mûrungu nîkenda tûtîkameneerue nî antû ba mîgongo îngî.

¹⁰Ûûni na antû beetû na antû barîa baranditagîra ngûgî nî tûkobithagia antû bangî mbeecha na irio. Nandî tûtigeeni kûbeetia mpongeeri îrîa boonaga.

¹¹Tûbacokerieni ithaka biaao, na miuunda yaao ya mîzabibû na miuunda yaao ya mîzeituni, na nyomba ciaao na mpongeeri îrîa batûnenkerete.”

¹²Nabo atongeeria bau barauga atîrî, “Tûkaathithia ûrîa watwîra. Tûgaacokeria antû into biaao na gûtî mpongeeri ya birîa tûbakoobithîtie tûkaabeetia.” Naani ndîreera atongeeria bau baciîtie barî mbere ya athînjîri-Mûrungu atî bakaathithia ûu bauga.

¹³Ndîrainainia nguû nîkenda boona into birîa biaarî ku bikîgwa. Ndîrabeera atîrî, “Ûu nîu Mûrungu akabwinainia, abûthirîrie into këethîra bûtîûjûria mûciîtio jûu.” Nabo antû bonthe barauga, “Amen!” Bagîkumagia MWATHANI, Nabo barathithia ûrîa baaciîtîtie.

¹⁴Ûûni Nehemia nî ndaarûngamîîrîte nthîgûrû ya Juda kuuma Mwakeene jwa mîrongo îîrî jwa waathani bwa mûnene Aritashashita mwanka mwakeene jwa mîrongo îthatû na îîrî kuuma akwambîrîria kwaathana. Îgiita rîu rîonthe ndaathanaga rîa mîaka îkûmi na îîrî, ûûni amwe na antû ba ndûgû cieetû tûtaarîjaga biakûrîa birîa ndaabuîri kûrîa ndî mûtongeeria.

¹⁵Arûngamîîri barîa baathanaga nthîgûrûûne ya Juda mbere ya mpaa mûrûngamîîri wa nthîgûrû îîu, nî bainyagîîria antû mono. Baabeetagia fetha mîrongo îna (40) o ntukû, na bakabeetia irio na ndibei. Kinya barîa baabatumîkagîra no bainyagîîria antû. Îndî ûûni ntaathithia mantû ta jau, nîûntû nî ndeetîkîtie Mûrungu.

¹⁶Ûûni ndaatumîîre îgiita rîaakwa rîonthe gwaka rûthingo. Kinya antû barîa baantumîkagîra baathithagia o ûu. Ûûni ntaaicwîîre ûtonga kuuma kîrî bo.

¹⁷Amwe na ûu, ni ndaareraga Ayahudi; antû îgana rîa mîrongo îtaano (150) amwe na atongeeria baao. Ningî nî ndaareraga kinya antû ba mîgongo îngî barîa beejaga kîrî tuî.

¹⁸Nja yaakwa o ntukû nî ndaathînjagîra antû ndeegwa îmwe, na ntûrûme inoru ithanthatû, na ngûkû inyiingî. Ningî nyuma ya ntukû îkûmi antû nî baakuundagua ndibei ya kûng'ana. Nîkwîthîrwa nî ndaijî ûrîa antû baathangîkaga, ûûni nteetagia antû kîrîa mûrûngamîîri aabuîrîte kûnenkerwa nî antû.

¹⁹Itû Mûrungu waakwa ndirikanaga nîûntû bwa mantû jameega jarîa nthithîrîtie antû beetû.