Read KIMERU BIBLE PROTESTANT EDITION Neh 6 Bible Online

Neh 6 - KIMERU BIBLE PROTESTANT EDITION bible

Neh 6

¹Sanibalati, na Tobia, na Geshemu na anthû bangî beetû nî baaigîrue atî nî tûthirîtie gwaka rûthingo, na atî gûtî mîanya îtigi gatîgatî. Nî mîari ya mpingîro akî îteekîri.

²Sanibalati, na Geshemu nî baantûmanîre bakîendaga tûcemania nabo gatûûreene kamwe bûûrîîne ya Ono. Îndî bo nîka baabangîte kûnthithîria ûntû bûbûthûûku.

³Naani ndîratûmana nîkenda beerwa atîrî, “Ngûgî îrîa nkûrita nî ya bata mono, ntîkwona gîtûmi gîa gûtiga kûmîrita mbîja gûtirimana naabuî.”

⁴Nabo nî baatûmanîre maita jana na ntûmwa o îîu. Naani nî ndaabacokagîria o ûu maita jau jana.

⁵Sanibalati nî aatûmanîre rîa jataano kîrî ni, ndeeterwa barûga îtîkunîki.

⁶Barûga îîu yaaugaga atîrî, “Geshemu nî amenyithîtie atî kûrî na nteto ikwarua nî atûûri beenu atî ûûgwe na Ayahudi bangî nî bûkwenda kûrega kwathîkîra mûnene. Kîu nîkîo gîtûmi bûgwaka rûthingo. Ningî atî gwe nîka ûkwenda kwaa mûnene waao.

⁷Kinya ûrî na iroria ntûûreene ya Jerusalemu birîa bigaatûmîîria biuge atî gwe ûrî mûnene wa Juda. Mantû jau no mwanka jakinyîre mûnene. Tontû bûû, nî kaaba ûkeeja tûkajaarîrîria.”

⁸Naani ndîratûmana kîrî Sanibalati ndîramwîra atîrî, “Gûtî mantû ta jau jakwarua. Îndî jau nî mantû jarîa ûtuungîte wengwa.”

⁹Anthû bau beetû bonthe nîka beendaga gûtwîkîra ûguaa nîkenda tûremwa nî ngûgî ya gwaka rûthingo. Naani ndîraromba ndîrauga atîrî, “Itû Mûrungu mpongeera inya.”

¹⁰Ntukû îmwe ûûni Nehemia nî ndeetîre kûriûngîra Shemaia mûtaana wa Delaia, Delaia aarî mûtaana wa Mehetabeli. Shemaia nî aaremi kuuma nyomba yaawe nîûntû bwa ûguaa. Nî aambîrîre atîrî, “Nîkwîthîrwa nî ûbangîri kûûragwa ûtukû, twîte tugaiciithe kîûrûûne twingîte mîari.”

¹¹Îndî ndîramûcokeria ndîramwîra atîrî, “Muntû ta ûûni ndoomba kûmatûka, kana mbîta gwiciitha kîûrûûne?” Ntîgûcwaa gûcionokia. Tontû bûû, ntîîta.

¹²Nî ndaarî ndîkûmenya atî tî Mûrungu waamûtûmîte ambîîra mantû jau. Îndî tontû nî Tobia na Sanibalati baamweete mbeecha nîkenda ambîîra ûu.

¹³Aakombori nîkenda ambîkîra ûguaa, naani mbîyia. Ndaathithia ûu, bathûûkia riîtwa rîaakwa nabo boona bwa gûncikûûrîra.

¹⁴Naani ndîraromba nkiugaga atîrî, “Itû Mûrungu waakwa, kanûkia Tobia na Sanibalati nîûntû bwa mantû jarîa bambangîrîte. Kanûkia kinya mûka-kîroria kîrîa gîtagwa Noadia amwe na iroria bingî birîa bigeretie kûmbîkîra ûguaa.”

¹⁵Rûthingo rwaakîrwe na rûrathira nyuma ya ntukû ya mîrongo îtaano na ijîîrî (52). Nayo ngûgî îîu yaathirîre gatîgatîîne ka mweri jwa înaana na mweri jwa kenda.

¹⁶Rîrîa anthû beetû bonthe ba mîgongo îrîa yaatûthiûrûkîrîte baaigîrue mantû jau, baramenya batîûmbana. Nîkwîthîrwa nî baamenyere atî ngûgî îîu yaaritîkîre nîûntû Mûrungu nî aarî amwe naatuî.

¹⁷Îgiita rîu rîonthe atongeeria ba Juda nî baandîkanagîra barûga na Tobia.

¹⁸Antû babaingî nthîgûrûûne ya Juda nî baagwataga Tobia mbaru. Baathithagia ûu nîûntû Tobia nî aagûrîte mûka Mûyahudi ûrîa waarî mwarî wa Shekania mûtaana wa Ara. Ningî kinya mûtaana wa Tobia weetagwa Jehohanani nî aagûranîte kwa Meshulamu mûtaana wa Berekia.

¹⁹Antû babaingî ba nthîgûrû ya Juda nî baambîraga mantû jameega jarîa Tobia aathithîtie. Ningî nî baamwîraga jarîa ndaaugaga. Tobia nî aampaandîkagîra barûga akîendaga kûûmakia.