Read KIMERU BIBLE PROTESTANT EDITION Neh 8 Bible Online

Neh 8 - KIMERU BIBLE PROTESTANT EDITION bible

Neh 8

¹Gûgîkinya mweri jwa mûgwanja antû bonthe ba Israeli barîa baaumîte kîthamîrioone, nî baarî bakûmarîra ntûûreene ciaao nthîgûrûûne ya Juda. Kûrî ntukû ya mbere ya mweri jûu, antû bonthe nî boothûranîre Jerusalemu kîaragoone akuî na Ezra ûrîa waarî mûthînjîri-Mûrungu na waaritanaga antû maathana ja Musa. Baramwîra areete yuku rîa Waatho bûrîa MWATHANI aamenyithîrie Musa nîûntû bwa antû ba Israeli.

²Tontû bûû, Ezra araretera antû barîa boothûranîte Waatho bûu. Antû bau baarî aka, arûme na twaana; barîa barîîngî gûciûrwa ûrîa bakwîrwa.

³Antû bau boothûreene kîaragoone, kîrîa kîaarî mbere ya mpingîro ya Rûûjî. Ezra nawe aabathomeere Waatho bûu bathikîîrîte. Arabathomera Waatho bûu, kuuma rûkîîrî mwanka thaa thita.

⁴Ezra ûu, waaritanaga Waatho nî aarûngamîre kîrîîngoone gîaaki na mbaaû. Kîrîîngo kîu, gîaaki nîkenda Ezra aritanîra antû o. Nabo antû baba nî baarûngami rûteere rwaawe rwa ûrîo: Matithia, na Shema, na Anaia, na Urîa, na Hilikia, na Maaseia. Antû baba bangî nî baarûngami rûteere rwaawe rwa ûmotho: Pedaia, na Mishaeli, na Milikija, na Hashumu, na Hashi-badana, na Zekaria, na Meshulamu.

⁵Ezra aarûngami arîa oonagwa nî antû bonthe. Rîrîa aakunûrîre Yuku rîa Waatho antû bonthe bararûngama.

⁶Ezra arakumia MWATHANI, arauga atîrî, “Kumieni MWATHANI Mûrungu wa kûrigaria.” Nabo antû barookîîria njara barauga, “Amen! Amen!” Baracoka baraturia maru, bareenamîîria mwanka nthî, barathaathayia MWATHANI.

⁷Antû bararûngama. Nabo Alawi baba barabaritana Waatho: Jeshua na Bani, na Sherebia, na Jamini, na Akubu, na Shabethai, na Hodia, na Maaseia, na Kelita, na Azaria, na Jozabadi, na Hanani, na Pelaia.

⁸Alawi bau barathoma bwega Yuku rîu rîa Waatho bwa Mûrungu. Bararitana antû mantû jarîa jaarî ku, mwanka antû barajaciûra.

⁹Rîrîa antû baaigîrue nteto iu cia Waatho nî baambîrîîrie kûrîra. Nehemia ûrîa waarî mûrûngamîîri, na Ezra, ûrîa waarî mûthînjîri-Mûrungu na ûrîa waaritanaga antû, amwe na Alawi barîa baaritanaga antû nî baarîîrie antû bonthe barabeera atîrî, “Naarua nî ntukû întheru yaathûrîri MWATHANI Mûrungu weenu. Tigeeni kûrîra na bûkáithikîîra.”

¹⁰Nehemia arabeera atîrî, “Aaneeni. Bweta bûrîe biakûrîa bibiega na bûnyue ndibei îrîa nthongi mono. Ningî bûrûmie barîa batî nabio biakûrîa Nîkwîthîrwa naarua nî ntukû întheru yaathûrîri MWATHANI weetû. Tigeeni kwithikîîra nîûntû kûgwîrua ndeene ya MWATHANI nîyo inya yeenu.”

¹¹Tontû bûû, Alawi nî baaboreerie antû bonthe bakîbeeraga atîrî, “Tigeeni kwithikîîra nîûntû naarua nî ntukû întheru.”

¹²Rîu antû bonthe baraana. Nabo nî baarîîre na baranyua na bararûmania biakûrîa kîrî barîa bataarî nabio. Baracoka barakûngwîra nîûntû nî baarî bakûmenya bwega ûrîa baarî bakwîrwa.

¹³Rûnene rwa ntukû îîu ya mbere atongeeria ba mîciî ya antû bonthe ba Israeli, amwe na athînjîri-Mûrungu, na Alawi nî beetîre kîrî Ezra, ûrîa waaritanaga Waatho, nîkenda bakaritanwa Waatho.

¹⁴Nabo baramenya nî kwaandîki Wathoone bûrîa MWATHANI aneenkere Musa atî nî baabuîrîte gûkaraga tûgaandeene rîrîa kûrî na mambura mweriine jwa mûgwanja.

¹⁵ Ningî baramenya atî baabuîrîte kûmenyithania Jerusalemu na ntûûreene mantû jaja: “Antû babuîrîte gwitia irîmeene bakagîîra mpang'i cia mîzeituni, na cia mîthithinda, na cia mîkîîndû, na makûri. Mpang'i iu nî cia gwaka tûgaanda, o ta ûrîa kwaandîki.”

¹⁶Tontû bûû, antû nî beetîre baragîîra mpang'i iu baraaka nacio tûgaanda. Antû bamwe baakîre tûgaanda îgûrûgûrû rîa nyomba ciaao, na bangî baraaka biaragoone bia nja ciaao, na bangî baraaka kîaragoone gîa kîûrû, na bangî baraaka kîaragoone kîrîa kîaarî mbere ya mpingîro ya Rûûjî, na bangî baraaka kîaragoone kîrîa kîaarî mbere ya mpingîro ya Efuraimu.

¹⁷Antû bonthe barîa baarî bakuuma kîthaamîroone nî baakîre tûgaanda baratûûra ku. Rîu nîrîo rîaarî îgiita rîa mbere rîa Aisraeli kûthithia ûu kuuma rîrîa Joshua mûtaana wa Nuni aarî mwoyo. Nabo antû nî baagwîrîîtue mono.

¹⁸Kuuma ntukû ya mbere ya mambura jau mwanka ya mûthia, Ezra nî aathomagîra antû Waatho bûu bwa Mûrungu. Antû barakûngwîra ntukû mûgwanja na ntukû ya inyaanya baroothûrana nîkenda bainga mambura.