Read KIMERU BIBLE PROTESTANT EDITION Neh 9 Bible Online

Neh 9 - KIMERU BIBLE PROTESTANT EDITION bible

Neh 9

¹Kûrî ntukû ya mîrongo îîrî na inya ya mweri jwa mûgwanja, antû ba Israeli nî boothûranîre. Nabo beekîrîte mathango na nî baaciatîte biakûrîa, na nî baaciakîîte tîîri mîtwe yaao kwonania kwirira meeyia jaao.

²Bararûngama baraumbûra meeyia jaao na meeyia ja biûjûjû biaao. Aisraeli nî baarî bagûciathûrana na antû ba nthîgûrû ingî barîa baarî nthîgûrûûne yaao.

³Aisraeli bau nî baarûngamîre mathaa jathatû bathikîîrîte Yuku rîa Waatho bwa MWATHANI Mûrungu waao rîkîthomwa. Ningî barakara mathaa jangî bakiumbûraga meeyia jaao na bakîthaathagia MWATHANI Mûrungu waao.

⁴Alawi baba nî baarûngami karîngoone bakîrombaga MWATHANI Mûrungu waao na kajû: Jeshua, na Bani, na Kadimieli, na Shebania, na Buni, na Sherebia, na Bani, na Kenani.

⁵Rîu Alawi baba, tabo Jeshua na Kadimieli, na Bani na Hashabineia, na Sherebia na Hodia, na Shebania, na Pethahia, bareeta antû nîkenda bathaathayia Mûrungu. Barabeera atîrî, “Rûngameeni bûkumie MWATHANI Mûrungu weenu we ûtwîre kuuma kenya mwanka kenya. Kumagieni riîtwa rîaawe rîrîa rîbuîrîte gûkumua, kinya këethîra rîtîûmba gûkumua bwa kûng'ana.”

⁶Antû ba Israeli nî baarombere bakiugaga atîrî, “MWATHANI, nîgwe gwenka ûrî MWATHANI. Nîgwe woombîre îgûrû, kinya îgûrû rîrîa rîrî kûraaja mono na birîa bionthe birî ku. Nîgwe ûtûmîte biîthîrwa birî o. Riûa, na mweri, na njota nî bikûthaathagia.

⁷ MWATHANI Mûrungu, Nîgwe waathuurîre Abramu, ûramûrita Uru, nthîgûrûûne ya Babiloni, ûracoka ûragarûra riîtwa rîaawe ûramwîta Abrahamu.

⁸ Nî woonere Abrahamu nî mwîtîkua. Ûreekanîra kîrîkanîro nawe, ûreeka wîrane atî ûkamwaa nthîgûrû ya Kanaani, na ya Ahiti, na ya Aamori, na ya Aperizi, na Ajebusi, na ya Agirigashi, îrîa nchiarwa ciaawe igaatûûra. Gwe nî wîkîîte wîrane bûu nîûntû ûrî ûmwagîru.

⁹ Nî woonere mîthangîko ya biûjûjû bieetû barî Misri, ûraigua kîrîro kîaao barî kûu Îria Îtuune.

¹⁰ Nî waaringîre biama bia kûrigaria nîkenda ûkanûkia Farao amwe na atongeeria baawe ba njûûrî na antû bonthe ba nthîgûrû ya Misri. Waathithîrie ûu nîûntû nî waaijî ûrîa biûjûjû bieetû biaainyîîrîîtue. Ûû nîu waatûmîre riîtwa rîaaku rîgîa îgweta na nîu rîkari mwanka naarua tûrî.

¹¹ Waathûranîre îria, ûrathithîria antû baaku njîra bareetîîra ku. Ûratûma barîa beengeene nabo baûrîra rûûjîîne o ta ûrîa iiga rîûragîra ku.

¹² Mûthenya waabatongagîîria ûkari ta gîtugî kîa îtu ûtukû ûkaabamûrîkîra ûkari ta gîtugî kîa mwanki.

¹³ Weenamîre kuuma îgûrû ûraarîria antû kîrîmeene gîa Sinai. Ûrabanenkera mawaatho na waatho bûbwega na maathana.

¹⁴Nî waatûmîre nthûûmba yaaku Musa kûbaritana bajûkagie sabatû îrî întheru, na kûbaritana maathana, na mawaatho na waatho bwaaku.

¹⁵ Rîrîa baaigîrue mpara, nî waabanenkeere biakûrîa kuuma îgûrû, na rîrîa baaigîrue nyoonta, nî waabaritîîre rûûjî kuuma iigeene. Nî waabeerîre bakaigwatîre nthî îrîa waciîtîtie atî ûkaabanenkera.

¹⁶ Îndî biûjûjû bieetû biaikumîrie biroomia mîtwe birarega kwathîkîra maathana jaaku.

¹⁷ Nî biaaregere kwathîka, biroorîrua nî biama biaaku. Ningî nî boomîrie mîtwe, barathuura mûtongeeria wa kûbacokia ûkomboone bwaao Misri. Îndî Gwe Mûrungu wa kîaao, ûtîthûûrangaga na mpwîî Wendo bwaaku bûtîthiraga na nî ûrekanagîra, Naagwe ûtaberûkîra.

¹⁸ Nî baaithithîîrie kajaû ka îturutia bakiugaga: ‘Ûûjû nîwe Mûrungu weetû ûrîa waatûritîre Misri,’ nabo barakûruma mono.

¹⁹ Amwe na ûu, ûtábeerûkîîre kûu rwanda nîûntû bwa kîaao gîaaku kîrîa gîtîthiraga; ûtabeebeerie îtu rîrîa rîaakari ta gîtugî rîrîa rîaabatongagîîria mûthenya, kana ûbeebaeberia gîtugî kîa mwanki kîrîa kîaabamûrîkagîra beetîte ûtukû.

²⁰Nî waabanenkeere Roho ûmwega wa kûbaritanaga; nî waabaeere biakûrîa bia manna, na ûrabanenkera rûûjî rîrîa baarî na nyoonta.

²¹Nî waabamenyereere barî rwanda mîaka mîrongo îna. Gûtî gantû baaga; bataathirîrie nguû kana baimba magûrû nîûntû bwa gwîta.

²² Nî waatûmîre boomba moonene na mîgongo îngî nthîgûrû îrîa yaabathiûrûkîrîte. Ûratûma baraithûkîra na barataa nthîgûrû îrîa yaathagwa nî mûnene Sihoni wa kuuma ntûûreene ya Heshiboni, na nthîgûrû îrîa yaathagwa nî mûnene Ogi wa kuuma nthîgûrû ya Bashani.

²³ Nî waatûmîre nchiarwa ciaao iraingîa ta njota na ûrabaikia nthîgûrûûne îrîa weerîrîîre biûjûjû biaao atî ûkaabaikia.

²⁴ Ningî nî waatûmîre baraithûkîra nthîgûrû ya Kanaani baramîtaa, baroomba Akanaani barîa baatûûraga ku amwe na anene baao, ûratûma barabathithîria ûrîa boonaga kwagîrîte.

²⁵ Nî waatûmîre baithûkîra na bataa ntûûra irîa ciaairigîri na nthingo ciarika; barataa nthîgûrû înthongi, yaarî na nyomba ciojûri into bibiega, yaarî na ithima, na miuunda ya mîzabibû, na mîzeituni na mîtî îngî ya matuunda. Baarîîjaga bakanyira, nabo baranora, nabo nî baagwîragîrua bionthe birîa waabaeete.

²⁶ Îndî nî baaere ndemi bararega gûkwathîkîra bararegana na maathana jaaku, na barooraga iroria biaaku birîa biaabaroragîria. Nabo nî baakaraga bagîkûrumangaga.

²⁷Tontû bûû, nî waatûmîre boombwa nî anthû baao barabathîînia mono. Îndî nî baagûkaîîre nîûntû bwa mîthangîko îîu, naagwe ûrabaigua ûrî kûu îgûrû. Tontû bwa kîaao gîaaku kîrîa gîtîthiraga nî waabatûmîîre atongeeria ba kûboonokia kuuma kîrî anthû baao.

²⁸Îndî rîrîa baakarîre kiindajî baraambîrîria kwîyia kaîrî naagwe ûratûma anthû baao baraboomba. Îndî rîrîa baairirîre na baagûkaîra nî waabaigîrue ûrî kûu îgûrû ûraboonokia nîûntû bwa kîaao gîaaku kîrîa gîtîthiraga.

²⁹ Nî waabeeraga baathîkîre Waatho bwaaku îndî bo baraikumia bararega kwathîkîra maathana jaaku. Nî boomîrie mîtwe bararega gûkwathîkîra na bararega kwathîkîra mawaatho jaaku jarîa jatûmaga muntû atûûra ûtûûro bûbwega.

³⁰ Gwe nî woomîrîîrie mantû jaao mîaka îmiingî kinya wabatûmîra iroria bia kûbakaania jo bataabithikîrîîre. Tontû bûû, nî waatûmîre baithûkîrwa nî anthû ba mîgongo îrîa yaabathiûrûkîrîte.

³¹Îndî nîûntû bwa kîaao gîaaku gîkiingî ûtaabeerûkîîre kana ûbathiria buru. Nîkwîthîrwa gwe Mûrungu ûrî ûtugi na kîaao gîkiingî.

³² Nandî rî, gwe Mûrungu weetû, Gwe ûrî inya na ûrî Mûrungu wa kûrigaria Ûrî kîaao gîkiingî na nî ûûjûragia kîrîkanîro. Kuuma rîrîa anene ba Asîria baatwithûkîîre mwanka naarua tûrî, tuî twinthe amwe na anene beetû na atongeeria beetû, na athînjîri-Mûrungu beetû na iroria bieetû, na biûjûjû bieetû, nî tûthaangîkîte mono.

³³Îndî kîrî mantû jau jonthe jaakarîkîre kîrî tuî Gwe nî ûtûthithîrîtie mantû ja îota kinya këethîra tûtî eetîkua na nî tûthithagia ûthûûku mono.

³⁴Biûjûjû bieetû, na anene beetû, na atongeeria beetû na athînjîri-Mûrungu beetû bataathingata Waatho bwaaku kana baathîkîra maathana jaaku kana baigua ûrîa waabakaanagia.

³⁵Kinya këethîra nî waabaeere ûnene na nthîgûrû înene na înoru bataakûthaathayia kana batigana na ûthûûku bwaao.

³⁶Nandî nî tweete nkombo nthîgûrûûne îrîa waaere biûjûjû bieetû nîkenda bagwîragua nîûntû bwa maciara jaayo.

³⁷Meeyia jeetû nîjo jatûmaga anene barîa batwathaga bajûkia birîa biumaga nthîgûrû yeetû. Ningî batûtumagîra amwe na nyomoo cieetû o ûrîa bakwenda, tuî tûrî na mîthangîko îmiingî.”

³⁸Tontû bwa mantû jau jonthe, tuî antû ba Israeli nî tûkûrîa muuma na twajwaandîka. Nabo atongeeria beetû, na Alawi, na athînjîri-Mûrungu bagwîkîra kîrore.