Read KIMERU BIBLE PROTESTANT EDITION Esta 1 Bible Online

Esta 1 - KIMERU BIBLE PROTESTANT EDITION bible

Esta 1

¹ Aritashashita, mûnene wa Parasia, aathanaga nthîgûrûûne îrîa yaagaanîtue ichunchî îgana rîa mîrongo îîrî na mûgwanja (127) kuuma India mwanka Ethiopia.

²Mûnene Aritashashita aathanaga arî ntûûreene ya Susa.

³Aritashashita, nî aathithîrie mambura kûrî mwakeene jwa îthatû jwa waathani bwaawe na areeta arûngamîîri bonthe ba nthîgûrû îrîa aathaga na atongeeria ba njûûrî ya Parasia na ya Media.

⁴Mambura jau jaakarîre ntukû îgana rîa mîrongo înaana (180). Îgiiteene rîu rîonthe mûnene Aritashashita nî oonagia atongeeria bau ûtonga bwa nthîgûrû yaawe, na mwago na ûthongi bwa ûnene bwaawe.

⁵Nyuma ya mambura jau, mûnene nî eetîre antû bonthe; nkîa na itonga birîa biatûûraga ntûûreene ya Susa na arabathithîria mambura. Mambura jau nî jeetîre na mbere ntukû mûgwanja. Mambura jau jaathithîîrue kamuundeene karîa kaarî kîaragoone kîa gîkaro kîa mûnene.

⁶Kîarago kîu nî kîathongometue na itambaa bia bamba bia rangi înjerû na bia rangi ya wiirû bwa îgûrû. Nabio nî biaacuurîîtue na mîkang'i ya fetha na ndigi cia bamba cia rangi ya mûkû. Mîkang'i îîu ya fetha yaamuntîîri itugîîne bia nkoronyangwe. Ningî nî kwaarî na itî bia thaabu na bia fetha. Arîa biakinyithîtue nî kwagemetue na maiga ja goro ja mîthemba mwanya mwanya.

⁷Antû nî baanyunyaga ndibei na ikombe birîa biathithîtue na thaabu bia mîthemba mwanya mwanya. Nawe mûnene nî aakundîrie antû ndibei na wingî.

⁸Antû nî beetîkîrîîtue kûnyua ndibei o ûrîa bakwenda. Nabo akîîki ba ndibei nî beeri beekîîre antû ndibei o ûrîa muntû eendaga.

⁹O îgiita rîu, mûka-mûnene tawe Vashiti nî aathithîîrie aka mambura gîkaroone kîu kîa mûnene Aritashashita.

¹⁰Rîrîa gwakinyîre ntukû ya mûgwanja ya mambura jau, mûnene nî aanyuîte ndibei aroogita mono. Nî eetîre nthûûmba ciaawe mûgwanja irîa ciaarî aakûre. Nabo baarî Mehumani na Bizitha, na Haribona na Bigitha, na Abagitha na Zethari na Karikasi.

¹¹Mûnene nî aabatûmîre nîkenda beeta mûka-mûnene tawe Vashiti eeta kîrî we. Aabuîrîte gwîta eekîrîte thirû yaawe ya ûnene nîkenda amwoonania kîrî atongeeria barîa baarî mambureene amwe na antû bangî barîa beeti kîathoone nîûntû aarî ûmûthongi mono.

¹²Îndî Vashiti nî aaregere kwathîkîra mûnene na ararega gwîta. Ûntû bûû bûratûma mûnene athûûra mono.

¹³Rîu mûnene areeta antû baboome barîa baijî waatho nîkenda abooria ûrîa kûthithagua mantû ta jau jaakarîka. Bwaarî wîthîre bwa mûnene kûûria kîrîra mantûûne jegiî waatho.

¹⁴Mûnene nî eetîre atongeeria mûgwanja barîa baatongagîîria nthîgûrû ya Parasia na ya Media. Nabo baarî Karishena, na Shethari, na Adimatha, na Tarishishi, na Meresi, na Marisena, na Memukani. Antû bau nî baarî baboome na nî baijî waatho mono. Nîbo mûnene ooragia kîrîra kûrî na mantû ta jau.

¹⁵Mûnene arabooria atîrî, “Kûringana na waatho rî, Vashiti abuîri kûthithîrua atîa nîûntû bwa kûrega kûmbathîkîra ndîgûtûmana?”

¹⁶Memukani areera mûnene atîrî, “Tî wenka Vashiti athithîrîtie ûthûûku, îndî nî athûûkîtie kinya atongeeria ba antû ba nthîgûrû cionthe irîa waathaga.

¹⁷Îthithio rîrî rîa mûka-mûnene tawe Vashiti rîaamenyeka nî aka bonthe, rîgaatûma bamene arûme baao mono, nîkwîthîrwa bakaugaga atîrî, ‘Kinya mûnene Aritashashita nî aatûmanîîre mûka-mûnene tawe Vashiti ararega.’

¹⁸O naarua aka beetû twinthe atongeeria ba Parasia na ba Media bakaamenya nteto irîa Vashiti auga. Nabo bamenya, kinya tuî bakaarega gûtwathîkîra. Najo jakareeta rûmena na mîthûûro îmîthûûku.

¹⁹“Tontû bûû, wona kwagîrîte, gwe mûnene, rita waatho na bwaandîkwe kîrî waatho bwa Parasia na Media, bûrîa bûtîûmba kûgarûrwa. Waatho bûu buuge atî Vashiti akoroonekana kîrî mûnene Aritashashita kaîrî. Ningî ûcwee mûka ûngî ûmwega nkûrûki yaawe, aee mûka-mûnene.

²⁰Tontû bûû, rîrîa waatho bûu bûgaatûmîîrua nthîgûrûûne yonthe îrîa wathaga, aka bakaathîkagîra arûme baao; arûme bau bëethîrwa barî nkîa kana itonga.”

²¹Nteto iu cia Memukani nî ciaagwîrîrie mûnene mono amwe na atongeeria. Tontû bûû, mûnene arathithia ûu Memukani aaugîre.

²²Mûnene nî aandîkîîre antû ba nthîgûrû cionthe irîa aathaga barûga. Abaandîkîîre o antû na rûthiomi rwaao. Barûga îîu yaaugaga atî ntomûrûme wonthe nî aathage nja yaawe o ûrîa akwenda.