Read KIMERU BIBLE PROTESTANT EDITION Esta 2 Bible Online

Esta 2 - KIMERU BIBLE PROTESTANT EDITION bible

Esta 2

¹Nyuma ya mantû jau jonthe, mûthûûro jwa mûnene Aritashashita nî jwanyianyiîre. Nî aakarîre akîririkanaga Vashiti na mantû jarîa aathithîtie. Ningî araririkana ûrîa aamûgitîrîte îgamba bûbûthûûku.

²Nthûûmba iria ciaamenyagîîra mûnene nî ciamwathîre ciramwîra atîrî, “Ga ûcwîrwe aarî karaiti babathongi.

³Thuura atongeeria kuuma nthîgûrû irîa cionthe wathaga, nîkenda bakûretera aarî bonthe babathongi. Aarî bau karaiti bareetwe ntûûreene ya Susa nîkenda bamenyagîîrwa nî Hegai ûrîa mwakûre ûrîa ûmenyagîîra aka ba mûnene. Ningî bathongomague na into bia kwigemia.

⁴Mwarî ûrîa ûgaakûgwîria ûmûjûkie aee mûka-mûnene antûûne a Vashiti.” Mûnene aragwîrua nî ûntû bûu, arathithia u.

⁵Îgiita rîu ntûûreene ya Susa nî kwaarî na Mûyahudi wa kuuma mwîrîgeene jwa Benjamini. Nawe eetagwa Modekai, na aarî mûtaana wa Jairi. Jairi aarî mûtaana wa Shimei, Shimei mûtaana wa Kishi.

⁶ Modekai na atae bangî nî baarî bagwikua kîthamîrioone amwe na Jekonia mûnene wa Juda. Nabo baataîtwe kuuma Jerusalemu nî Nebukadineza mûnene wa Babiloni.

⁷Modekai nî aamenyagîîra mwarî wa muntwoo weetagwa na Kîhibirania Hadasa. Hadasa nîwe weetagwa Esta. Esta ûu aarî ûmûthongi mono akîoneka. Aciari ba mwarî ûu nî baarî bagûkua nawe Modekai aramûjûkia aramûrera ta mwana waawe.

⁸Tontû bûû, rîrîa mûnene aaritîre waatho atî aarî babathongi nî baikue kîrî we ntûûreene ya Susa, waatho bûu nî bwaatûmîrîîrue nthîgûrûûne yonthe îrîa aathaga. Aarî babathongi nî baikîrue Susa, na kinya Esta nî aaikîrue. Nabo baamenyagîîrwa nî Hegai ûrîa waarî mûmenyeeri wa aka ba mûnene.

⁹Hegai nî oonere Esta aragwîrua nîwe na aratua kûmûthithagîria mantû jameega, ja mwanya na bangî. O ntûti Hegai ararita into bia kwigemia nîkenda bitumîrwa nî Esta na ararita biakûrîa bibiega nkûrûki nîkenda birîîwa nî Esta. Ningî arathuura aarî mûgwanja nîkenda bamenyagîîra Esta. Aarî bau baarî ba gîkaro kîa mûnene. Aramwikia antû aeega nkûrûki ya kûrîa aka bangî ba mûnene baakaraga.

¹⁰Esta ataarî akwimenyithania atî aarî Mûyahudi nîûntû Modekai nî aamûkaanîtie.

¹¹Ntukû cionthe Modekai nî aakûrûkagîîra au mbere ya kîarago kîa gîkaro kîa mûnene, antû arîa aka ba mûnene baakaraga nîkenda amenya mantû ja Esta.

¹²Mbere ya o mwarî aikua kîrî mûnene Aritashashita, nî eethagîrwa athongometue mîeri îkûmi na îîrî. Eethagîrwa akîthongomua na maguta ja manemane mîeri îtaantatû na akathongomua na maguta jangî ja kwithongomia mîeri îîu îngî îtaantatû.

¹³Mbere ya mwarî eeta kîrî mûnene, nî aanenkagîrwa kîrîa kîonthe eendaga kuuma kûu aka ba mûnene baakaraga.

¹⁴Mwarî eetaga kwa mûnene ûgoro na akauma ku rûkîîrî. Rîu mwarî auma ku nî aaikagua antû angî arîa aka ba mûnene baakaraga arîa baamenyagîîrwa nî Shaashigazi ûrîa mwakûre. Shaashigazi nîwe waamenyagîîra aka ba gwîka ba mûnene. Mwarî ataacokaga kîrî mûnene kaîrî tiga mûnene arîngî kûgwîrua nîwe. Mûnene arîngî kûgwîrua nî mwarî, nî aagwetaga riîtwa rîaawe akîmûtûmanîra.

¹⁵Îgiita nî rîaakinyîre rîa Esta gwîta kîrî mûnene. Esta aarî mwarî wa Abihaili muntwoo wa Modekai. Modekai nî aamûjûkîîtie akamûrera ta mwana waawe. Esta agîîta kîrî mûnene, gûtî gîntû aajûkia kuuma au aka ba mûnene baakaraga tiga birîa Hegai aamwîrîrîte. Barîa bonthe boonaga Esta nî baamwendaga.

¹⁶Esta aaikîrue kîrî mûnene Aritashashita mweriine jwa îkûmi, jûrîa jweetagwa na Kîhibirania Tebethi[1]

¹⁷Mûnene nî eendere Esta nkûrûki ya aka bonthe. Ningî Esta nî aagwîrîrie mûnene nkûrûki ya aarî bangî bonthe. Tontû bûû, mûnene areekîra Esta thirû nîkenda aa mûka-mûnene antûûne a Vashiti.

¹⁸Rîu mûnene arathithia kîatho gîkînene nîûntû bwa Esta. Ningî kîathoone kîu, mûnene areeta nchaama ciaawe amwe na antû bangî barîa baamûtumîkagîra nthîgûrûûne irîa aathaga. Ningî arauga antû batige kûrita ngûgî ntûkû îîu banogoke. Aracoka araeejana biewa bia goro.

¹⁹Rîrîa aarî boothûranîrue îgiita rîa jaîrî, Modekai nî aarî akweethua ûmwe wa atongeeria gîkaroone kîa mûnene.

²⁰Îgiita rîu Esta ataarî akûimenyithania atî we aarî Mûyahudi nîûntû nî aakaanîtue nî Modekai. Esta nî aathîkagîra Modekai o ta ûrîa aamwathîkagîra arî ûmûnini.

²¹Rîrîa Modekai aarî mûtongeeria gîkaroone kîa mûnene, nî aaigîrue aakûre baîrî tabo Bigithani na Tereshi barîa baakaragia tûnyomba twa mûnene bakiireba ûrîa bakooraga mûnene Aritashashita nîûntû nî baathûûri mono nîwe.

²²Modekai nî aamenyere nkireba îîu nawe aramenyithia mûka-mûnene Esta. Esta nawe areera mûnene mantû jarîa eerîtwe nî Modekai.

²³Rîrîa ûntû bûu bwaacûûnkûûnîrwe bwega na bûramenyeka nî bwa mma, antû bau bobaîrî nî baacuurîrue antû arîa gwaaki gwa gûcuurania. Ûntû bûu nî bwaandîkîrwe yukuune rîa ngono mûnene ategeete.