Read KIMERU BIBLE PROTESTANT EDITION Esta 3 Bible Online

Esta 3 - KIMERU BIBLE PROTESTANT EDITION bible

Esta 3

¹Nyumeene, mûnene Aritashashita nî aaneneerie Hamani aramweethia mûrûngamîîri wa atongeeria barîa bangî bonthe. Hamani aarî wa rûrîîjo rwa Agagi ûrîa mûtaana wa Hamedatha.

²Mûnene nî aaugîîte atî bonthe barîa baakaragia mpingîro ya gîkaro kîa mûnene no mwanka baturie maru beenamîîrie mwanka nthîgûrû kwonania nî bakûgwatîra Hamani nthoni. Îndî Modekai ararega kûthithia ûu.

³Tontû bûû, antû barîa baakaragia nthûûmba irîa ciaarî mpingîroone ya gîkaro kîa mûnene barooria Modekai atîrî, “Nîkî tontû gwe ûtîkwaathîkîra waatho bwa mûnene?”

⁴Nabo nî baamûûragia ûu ntukû cionthe. Îndî Modekai ataatindanagîra nabo. Beerîre Hamani mantû jau nîkenda boona ûrîa akaathithia nîûntû bwa nteto cia Modekai. Nîkwîthîrwa Modekai aaugîîte atî we nî Mûyahudi.

⁵Rîrîa Hamani oonere Modekai atîkûmûgwatîra nthoni, aturia maru, kana eenamîîria mwanka nthî, Hamani nî aathûûrîre mono.

⁶Rîrîa aamenyere atî Modekai nî Mûyahudi, nî oonere atî kûmûûraga gûtîng'ani. Tontû bûû, nî aabangîre kûûraganîria Modekai amwe na Ayahudi bangî bonthe barîa batûûraga nthîgûrû îrîa mûnene Aritashashita aathaga.

⁷Kûrî mweri jwa mbere jûrîa jweetagwa Nisani mwakeene jwa îkûmi na îîrî waathaniine bwa mûnene Aritashashita, Hamani nî aaringithîrie kuura îrîa yeetagwa Puri. Baaringîre kuura nîkenda bamenya îgiita rîrîa rîaagîrîte rîa kûthiria Ayahudi. Nyuma ya kuura ikûringwa, nî kwamenyekere atî ntukû ya îkûmi na ithatû ya mweri jûrîa jweetagwa Adari nîyo yaagîrîte.

⁸Rîu Hamani areera mûnene Aritashashita atîrî, “Kûrî na antû bamwe banyaganîtie kunthe nthîgûrûûne îrîa waathaga. Mawaatho jaao nî mwanya na ja antû bangî bonthe. Ningî batîathîkagîra waatho bwaaku. Tontû bûû, gwîtîkîîria beeta na mbere kûthithia ûu gûtî u gûgaakûguna.

⁹Këethîra nî ûkwona kwagîrîte rita waatho uuge bathirue. Naani nkaanenkanîra kilo ngiri magana jathatû ja mîrongo îna (340,000) cia fetha kîrî barîa bamenyagîîra mîthithû yaaku, bamîîke kîgîînene gîaaku.”

¹⁰Mûnene ararita mbete yaawe îrîa yaarî na mûûri jwa ûnene aranenkera Hamani ûrîa wa rûrîîjo rwa Agagi, na aarî mûtaana wa Hamedatha. Hamani aarî mûnthû wa Ayahudi.

¹¹Mûnene areera Hamani atîrî, “Kara na mbeecha na ûthithîrie Ayahudi ûrîa ûkwona kwagîrîte.”

¹²Tontû bûû, kûrî ntukû ya îkûmi na ithatû ya mweri jwa mbere jûrîa jweetagwa Nisani, aandîki barîa baandîkagîra mûnene mantû, nî beetîrwe nî Hamani. Arabeera baandîkîre arûngamîîri babanene ba barîa baateethagîîria mûnene kwaathana, na baandîkîre atongeeria barîa baathaga gûntû gûkûnene, na baandîkîre atongeeria barîa baathaga antû ba kuuma mîgongo mwanya mwanya barîa baarî nthîgûrûûne îîu. Baandîke na nthiomi mwanya mwanya, o ta ûrîa mwandîkîre jwaao jwakari. Barûga iu ciaandîki nî aandîki bau antûûne a mûnene Aritashashita na iraringwa mûûri jwaawe.

¹³Antû barîa baikagia barûga, baraikia barûga iu nthîgûrûûne kunthe kûrîa mûnene aathanaga. Nacio barûga ciaaugaga no mwanka Ayahudi bonthe: babeethî na babakûrû, aka na twaana, no mwanka booragwe bathirue bonthe buru, ntukû ya îkûmi na ithatû, ya mweri jwa îkûmi na îîrî, jûrîa jweetagwa mweri jwa Adari. Ningî into biaao bitawe buru.

¹⁴Mantû jarîa jaarî barûgeene iu jaabwîrîte gûtûmîîrua nthîgûrûûne kunthe nîkenda antû bonthe baithuranîra ntukû îîu îgîkinya.

¹⁵Antû barîa baikagia barûga nî baikîrie barûga iu na mpwîî. Nayo barûga nî yaathomerwe ntûûreene ya Susa. Mûnene na Hamani nî baanyunyaga bakari nthî, îndî antû ba ntûûra ya Susa nî bangaratanîrue nî mantû jau.