Read KIMERU BIBLE PROTESTANT EDITION Esta 4 Bible Online

Esta 4 - KIMERU BIBLE PROTESTANT EDITION bible

Esta 4

¹Rîrîa Modekai aamenyere mantû jonthe jarîa jaathithîtue, nî aatambûrangîre nguû ciaawe areekîra mathango, na araciaka mûju, kwonania kwithikîîra. Ningî aragiitanîîria ntûûreene gatîgatî akîrîraga na inya mono.

²Nî eetîre arakinya mpingîroone ya gîkaro kîa mûnene, îndî ateetîkîîrîîrue gûkûrûka gîkaroone kîu kîa mûnene nîûntû gûtî muntû weetîkîrîîtue gûkûrûka ku eekîrîte mathango.

³Nthîgûrû kûrîa kunthe waatho bwa mûnene bwatûmagîîrua, Ayahudi nî beethagîrwa barî na kîeba gîkînene. Baraciata biakûrîa, bararîra bakiugaga mbu, baithikîîrîte. Ayahudi babaingî nî beekîîre mathango na baraciaka mûju kwonania kwithikîîra.

⁴Rîrîa aarî na aakûre barîa baatumîkagîra Esta bamwîrîre ûrîa Modekai aathithagia, nî aathangîkîre nkoroone mono. Aranenkanîra nguû ciikîrua Modekai nîkenda arita mathango eekîra nguû iu, îndî Modekai ararega nguû iu.

⁵Rîu Esta nî eetîre nthûûmba yaawe îrîa yeetagwa Hathaki. Hathaki aarî mwakûre na aathuuri nî mûnene nîkenda atumîkagîra Esta. Esta aramwîra eete akoone nîatîa Modekai aakari na gîtûmi kîa mantû jau aathithagia.

⁶Hathaki nî eetîre kîrî Modekai arîa aarî kîaragoone gîa ntûûra kîrîa kîaarî mbere ya mpingîro ya gîkaro kîa mûnene.

⁷Modekai nî aamwîrîre mantû jonthe jarîa jaakarîkîte kîrî we, na ûrîa mbeecha ciang'anaga irîa Hamani aaugîîte akarîaa mîthithûûne ya mûnene nîkenda Ayahudi booragwa.

⁸Ningî Modekai nî aamûnenkeere barûga îmwe ya irîa ciaandîki na ciaaethua waatho. Barûga îîu nî yaathomi ntûûreene ya Susa na nî yaaugaga ûrîa Ayahudi bakaathirua. Modekai nî eerîre Hathaki aikîrie Esta barûga îîu na amwîre ûrîa mantû jaakari. Ningî oorie Esta eete, eerencanîîre Ayahudi kîrî mûnene.

⁹Hathaki aracoka kîrî Esta aramwîra ûrîa Modekai aamwîrîte.

¹⁰Esta aratûma Hathaki kaîrî aramwîra eete eere Modekai atîrî,

¹¹“Antû bonthe na atongeeria baao ba nthîgûrû irîa mûnene aathaga nî baijî atî gûtî muntû ûbuîrîte gûtonya kîaragoone kîa ndeene kwona mûnene atîîti. Muntû wa kuuna waatho bûu abuîri kûûragwa. Muntû ta ûu arîngî teetha akî këethîra mûnene arîngî kûmûûkîrîîria rûturo rwaawe rwa thaabu. Ûûni nthirîtie ntukû mîrongo îthatû ntaatûmanîrwa mbîta kîrî mûnene.”

¹²Modekai nî eerîrwe ntûmwa ya Esta.

¹³Aratûmana kîrî Esta arauga eerwe atîrî, “Ûkáthûgaania atî ûtî ûgwatiine ta Ayahudi bangî nîûntû ûrî gîkaroone kîa mûnene.

¹⁴Menya atî wakira îgiita ta rîrî, ûteethio na wonokio bwa Ayahudi bûkoonora kuuma angî. Îndî gwe na antû ba nja yeenu bûkaathirua. Nûû wiijî këethîra ûtaaeetherue mûka-mûnene nîûntû bwa îgiita ta rîrî?”

¹⁵Esta nawe aratûmana kîrî Modekai aramwîra atîrî,

¹⁶“Îta wîre Ayahudi bonthe barîa barî ntûûreene ya Susa boothûrane amwe. Baciate kûrîa na kûnyua ntukû ithatû nîûntû bwaakwa. Ûûni amwe na aarî barîa bantumîkagîra tûkaathithia o ûu. Rîu mbîte kîrî mûnene kinya këethîra nkeethîrwa nkiunaga waatho. Naani ndooragwa nî mbûragwe.”

¹⁷Modekai areeta arathithia mantû jonthe jarîa Esta aamwîrîte athithie.