Read KIMERU BIBLE PROTESTANT EDITION Esta 5 Bible Online

Esta 5 - KIMERU BIBLE PROTESTANT EDITION bible

Esta 5

¹Nyuma ya gûciata kûrîa na kûnyua ntukû ithatû, Esta nî eekîîre rwambambio rwaawe rwa ûnene, areeta ararûngama kîaragoone kîrîa kîaarî ndeene ya gîkaro kîa mûnene. Aarûngamîre eerekerete nyomba îrîa mûnene aakaraga. Îgiita rîu mûnene nî aakari nthî rûrîgeene rwaawe rwa ûnene nyomba îîu, eerekerete bwa mpingîro.

²Mûnene nî oonere Esta arûngami kîaragoone. Mûnene aragwîrua mono nî Esta. Mûnene aratambûrûkia njara arookîîria rûturo rwaawe rwa thaabu. Rîu Esta areetaîta araringithia kamûthia kaaru.

³Mûnene aramûûria atîrî, “Nîmbi ûkwenda Esta? Mbîîra ûrîa ûkwenda nkûthithîria, naani ngaakûthithîria u. Kinya këethîra nî nusu ya nthîgûrû îrîa mbathaga.”

⁴Esta areera mûnene atîrî, “Nî nkûthuranîrîte kîatho naarua ûgoro na wîjanie na Hamani. Woona kwagîrîte bwîje.”

⁵Rîu mûnene aratûmanîra Hamani na mpwîî nîkenda beeta kîathoone kîu beeti nî Esta. Tontû bûû, mûnene na Hamani bareeta kîathoone kîrîa Esta aathuranîrîte.

⁶Bakînyunyaga ndibei, mûnene nî oorîrie Esta atîrî, “Mbîîra ûrîa ûkwenda. Naani ngaakûthithîria u. Kinya këethîra nî nusu ya nthîgûrû irîa mbathaga ngaakûnenkera.”

⁷Îndî Esta aramwîra, “Ûrîa nkwenda nî atîrî,

⁸këethîra ûkûgwîrua nî ni, îtîkîîria kwîjania na Hamani kîathoone kîngî kîrîa nkaathuranîra nîûntû bweenu rûûjû. Rîu nîrîo ngaakwîra ûrîa nkwenda.”

⁹Hamani nî aaumîre kîathoone kîu ntukû îîu, agwîrîîtue na arî na nkerû. Îndî Hamani agûkinya mpingîroone ya gîkaro kîa mûnene nî oonere Modekai. Modekai ataaturîrie maru eenamîîria mwanka nthî kwonania nî akûmûgwaatîra nthoni. Tontû bûû, Hamani arathûûra mono.

¹⁰Amwe na bûu, Hamani araigwata araana. Rîu aratûmanîra acoore baawe na mwekûrû waawe Zereshi.

¹¹Hamani arabaikumîria akîbeeraga ûrîa arî na ûtonga bûbwingî, na nthaka inyiingî, na ûrîa mûnene amûneneetie na amwaa gîtîîo nkûrûki ya atongeeria bangî.

¹²Ningî arabeera atîrî, “Kinya Esta ûrîa mûka-mûnene gûtî ûngî areetîte Kîathoone kîrîa arathuranîrîte tiga ni na mûnene. Ningî kinya rûûjû nî ambîtîte kîathoone tûrî na mûnene.

¹³Îndî mantû jaja jonthe jatî na gîtûmi kîrî ni rîrîa nkwona Mûyahudi ûrîa wîtagwa Modekai akari nthî mpingîroone ya gîkaro kîa mûnene.”

¹⁴Rîu Zereshi, mwekûrû wa Hamani, na acoore ba Hamani bonthe baramwîra atîrî, “Akithia antû a gûcuuria Modekai. Antû au eethîrwe arî na ûraaja bwa mita mîrongo îîrî na ithaano (25m) gwitia bwa îgûrû. Rûûjû rûkîîrî ûûrie mûnene eetîkîîrie Modekai acuurue o. Rîu ûgeeta kîathoone bûrî na mûnene ûgwîrîîtue.” Nteto iu iragwîria Hamani, nawe araakithia antû a gûcuurania.