Read KIMERU BIBLE PROTESTANT EDITION Esta 6 Bible Online

Esta 6 - KIMERU BIBLE PROTESTANT EDITION bible

Esta 6

¹Ûtukû nyuma ya kîatho mûnene atoomba kwona toro. Tontû bûû, nî eetîrie Yuku rîa Mantû ja Karaaja, rîrîa rîaarî na mantû jarîa jaakarîkîte akîathanaga. Ningî arauga athomerwe rîo.

² Nî kwaathomerwe arîa kwaandîki ûrîa Modekai aamenyithanîrie ûrîa aakûre baîrî tabo Bigithana na Tereshi barîa baakaragia mpingîro ya gîkaro kîa mûnene, baabangîte kûûraga mûnene Aritashashita.

³Mûnene arooria atîrî, “Kûrî u kwaathithua gûcokeria Modekai nkaatho kana noo aeewa gîtîîo nîûntû bwa îthithio rîrî?” Nacio nthûûmba ciaawe iramwîra, “Gûtî u aathithîrua.”

⁴Mûnene arooria, “Kûrî mûtongeeria ûrî kîaragoone?” Îgiita rîu Hamani nî aarî agûkinya kîaragoone kîa bwa oome, kîa gîkaro kîa mûnene. Hamani eetîte kwîra mûnene atî Modekai nî abuîrîte gûcuurua antû arîa Hamani aakithîtie a gûcuurania.

⁵Nthûûmba cia mûnene iramwîra atîrî, “Nî Hamani ûrûngi kîaragoone.” Mûnene arauga atîrî, “Mwîreeni akûrûke.”

⁶Hamani nî aakûrûkîre nyomba kîrî mûnene. Mûnene aramûûria atîrî, “Mûnene akeenda kwaa muntû gîtîîo rî, amûthithîria atîa?” Hamani arathûgaania atî nîwe ûkwenda kûewa gîtîîo nî mûnene.

⁷Hamani areera mûnene atîrî, “Mûnene akëethîrwa akîendaga kwaa muntû gîtîîo,

⁸abuîrîte kuuga atî rwambambio rwaawe rwa ûnene amwe na mbarathi yaawe bireetwe. Mbarathi îîu îîthîrwe îîkîri thirû.

⁹Ûbuîrîte kuuga atî mûtongeeria waaku ûrîa mûnene eekîre muntû ûu ûkweewa gîtîîo rwambambio. Muntû ûu ûkweewa gîtîîo aitie mbarathine. Mûtongeeria ûu mûnene atongeerie mbarathi îrîa îkamatîte muntû ûu amikîîrie njîreene cia ntûûra. Mûtongeeria eete akiugaga atîrî, ‘Ûjû nîu mûnene athithagîria muntû ûrîa akwenda kwaa gîtîîo!’”

¹⁰Mûnene areera Hamani atîrî, “Îtaanga na mpwîî, ûgîîre rwambambio na mbarathi. Naagwe ûthithîrie Modekai, Mûyahudi ûrîa ûkaraga nthî mpingîroone ya gîkaro kîa mûnene bûu bungwa wauga. Ûgátiga kinya bûmwe bwa bûu wauga ûtîmûthithîrîtie.”

¹¹Tontû bûû, Hamani arajûkia rwambambio na mbarathi. Areekîra Modekai rwambambio. Modekai araitia mbarathine, nawe Hamani aratongeeria mbarathi areetîîra njîreene cia ntûûra agîtûmagîîria atîrî, “Ûjû nîu mûnene athithagîria muntû ûrîa akwenda kwaa gîtîîo!”

¹²Nyuma ya ûu, Modekai aracoka arîa aakaraga mpingîroone ya gîkaro kîa mûnene. Hamani nawe areetanga nja yaawe aithikîîrîte na aikunîkîte kîongo nîûntû bwa nthao.

¹³Hamani areera mûka waawe Zereshi na acoore baawe bonthe mantû jonthe jarîa jaakarîkîte kîrî we. Nabo antû baawe barîa boome amwe na mwekûrû waawe Zereshi baramwîra atîrî, “Gûkëethîrwa Modekai ûu wambîrîria gûkûthiria nî Mûyahudi, ûtîmûûmba. Gûtî nkaanja agaakûthiria buru.”

¹⁴Bakîmwaragîria o ûu, nthûûmba cia mûnene irîa ciaarî aakûre ireeta kûthagaana Hamani na mpwîî iramwikia kîathoone kîrîa Esta aathuranîrîte.