Read KIMERU BIBLE PROTESTANT EDITION Esta 7 Bible Online

Esta 7 - KIMERU BIBLE PROTESTANT EDITION bible

Esta 7

¹Tontû bûû, mûnene na Hamani nî beetîre kîathoone kîrîa Esta, mûka-mûnene aathuranîrîte.

²O kaîrî bakînyunyaga ndibei, mûnene nî oorîrie Esta atîrî, “Mbîîra ûrîa ûkwenda, naani ngaakûthithîria u. Kinya këethîra nî nusu ya nthîgûrû irîa mbathaga ngaakûnenkera.”

³Esta, aramwîra atîrî, “Këethîra ûkûgwîrua nî ni, na nî ûkwona kwagîrîte ûkaareka ûûni kana antû beetû booragwa.

⁴Mbeecha nî iriti nîkenda ûûni na antû beetû tûûragwa. Këethîra noo gatwendeetue nîkenda twaa nkombo gûtî u ndîngîuga, na ntîngî kûnogia na mantû jau. Îndî nandî ga tûkwenda kûthirua buru.”

⁵Mûnene Aritashashita arooria Esta atîrî, “Nûû ûûmîria ûkûthithia ûntû ta bûu? Nîkû arî?”

⁶Esta nawe aramwîra atîrî, “Nî mûnthû weetû ûrîa ûtûthangîkagia. Nawe nî muntû ûûjû mûthûûku tawe Hamani!” Rîu Hamani arambîrîria gûteetema au mbere ya mûnene na mûka-mûnene.

⁷Mûnene arookîîra athûûri, arauma kîathoone araumagara areeta kamuundeene ka gîkaro kîaawe. Îndî Hamani nî aatigîrwe kwerenca Esta nîûntû nî aarî akwona atî no mwanka mûnene amûkanûkie. Eerencaga Esta nîkenda amwonokia.

⁸Rîrîa mûnene aacokere kuuma kamuundeene nî eethîîre Hamani aigwîthîtie gîtîîne arîa Esta aakari nthî. Mûnene arauga atîrî, “Nîka muntû ûûjû akwenda kinya kûthengeera mûka-mûnene kwa inya, o aja nyomba yaakwa nkîonaga?” Mbere ya mûnene athiria kuuga ûu aakûre baîrî barîa baamûtumîkagîra bareeta barakunîka Hamani kîongo.

⁹Ûmwe wa aakûre ba mûnene weetagwa Haribona, areera mûnene atîrî, “Kûthûûkia mantû Hamani nî aakîte antû a gûcuuria Modekai ûrîa waarîrie arakwonokia gwe mûnene. Antû au gwa gûcuurania gwaki nja ya Hamani na nî kwa ûraaja bwa gwitia bwa îgûrû mita mîrongo îîrî na ithaano (25m).” Mûnene arabeera atîrî, “Cuurieni Hamani o.”

¹⁰Tontû bûû, Hamani aracuurua antû arîa aakîte gwa gûcuuria Modekai. Rîu mûnene arathûûrûka.