Read KIMERU BIBLE PROTESTANT EDITION Esta 8 Bible Online

Esta 8 - KIMERU BIBLE PROTESTANT EDITION bible

Esta 8

¹Ntukû o îîu mûnene Aritashashita aranenkera Esta, mûka-mûnene into birîa bionthe biaarî bia Hamani, ûrîa waarî mûnthû wa Ayahudi. Modekai areeta kîrî mûnene nîûntû Esta nî aarî akwîra mûnene atî Modekai nî wa ndûgû ciaao.

²Mûnene arajûkia mbete yaawe îrîa yaarî na mûûri jwaawe. Mûnene nî aarî akûjûkia mbete îîu kuuma kîrî Hamani. Aramînenkanîra kîrî Modekai. Esta araeethia Modekai mûrûngamîîri wa into bia Hamani.

³Rîu Esta akîrîraga, nî aairingîre nthî mbere ya mûnene. Eetîre kûmwarîria nîkenda mûbango jûrîa Hamani ûrîa wa rûrîîjo rwa Agagi jûthirua. Hamani nî aabangîrîte Ayahudi ûthûûku.

⁴Mûnene nî aatambûrûkîîrie Esta rûturo rwaawe rûrîa rwa thaabu.

⁵Esta arookîîra ararûngama au mbere ya mûnene. Aramwîra atîrî, “Gwe mûnene, weethîrwa nî ûgwîrîîtue nî ni na woona kwagîrîte, rita waatho na bwaandîkwe. Waatho bûu bwîthîrwe bûrî bwa kûgarûra waatho bûrîa Hamani ûrîa wa rûrîîjo rwa Agagi aaritîte. Agagi mûtaana wa Hamedatha. Waatho bûrîa Hamani aandîkîte bwaarî bwa kûthiria Ayahudi nthîgûrûûne cionthe irîa mûnene wathaga.

⁶Ûûni ntîûmîîria kwona ûthûûku ta bûu bûkîîjîîra antû beetû. Ntîûmîîria kwona antû ba ndûgû cieetû bakîûragwa.”

⁷Mûnene Aritashashita areera Esta, mûka-mûnene, barî na Modekai ûrîa Mûyahudi atîrî, “Nî bûkwona Hamani nî aracuurîrue nîûntû bwa kûbangîra Ayahudi mûbango jûmûthûûku. Ningî nî ndîrakûnenkeere into biaawe gwe Esta.

⁸Waatho bûriti na bûgeekîrwa mûûri jwa mûnene bûtîûmba kûgarûrwa. Îndî no bûringe mûûri jwaakwa mantûûne jarîa bûkwenda kwaandîkîra antû beenu ba Ayahudi.”

⁹Kûrî ntukû ya mîrongo îîrî na ithatû, ya mweri jwa ithatû, taju mweri jûrîa jweetagwa Sivani[2] aandîki barîa baandîkagîra mûnene mantû nî beetîrwe nî Modekai. Nawe arabeera baandîkîre Ayahudi na atongeeria bonthe ba nthîgûrû irîa mûnene aathaga barûga. Arûngamîîri bonthe ba nthîgûrû irîa îgana rîa mîrongo îîrî na mûgwanja (127) kuuma India mwanka Ethiopia nî baandîkîîrwe barûga. Baandîkîre na nthiomi mwanya mwanya, o antû bakîaandîkagîrwa na rûthiomi rwaao.

¹⁰Barûga iu ciaandîkîrwe antûûne a mûnene Aritashashita na iraringwa mûûri jwaawe. Nabo antû barîa baaikagia barûga baraikia barûga iu bagîtumagîra mbarathi irîa ciaarî rwîro mono.

¹¹Barûga iu ciaandîki atî mûnene nî aaritîte waatho bwaugaga atî Ayahudi nî beetîkîrîîtue bacemanagia ntûûreene irîa barî nîkenda babangaga ûrîa bagaikaria. Ningî nî beetîkîrîîtue kwînyangia na kûûraga na kûthiria anthû buru kuuma nthîgûrû na mîgongo îrîa îrîngî baithûkîra, amwe na aka na twaana twaao. Ningî beetîkîîrîîtue gûtaa into biaao.

¹²Waatho bûu bwaabuîri kwambîrîrua gûtumîrwa kuuma ntukû ya îkûmi na ithatû ya mweri jwa îkûmi na îîrî, taju mweri jûrîa jweetagwa Adari.

¹³Waatho bûu bwaabuîrîte gûtûmîîrua kîrî antû bonthe ba nthîgûrû cionthe. Nabo Ayahudi nî baabuîrîte kwîthîrwa baithuranîrîte nîkenda bairîîria kîrî anthû baao ntukû îîu.

¹⁴Mûnene nî eerîre eetithia mbarathi ciaawe irîa ciaarî rwîro mono beetange bagatûmîîrie waatho bûu. Nabu waatho bûu bûratûmîîrua ntûûreene îrîa nene ya Susa.

¹⁵Modekai nî aaumîre gîkaroone kîa mûnene eekîrîte rwambambio rwa ûnene rwa rangi ya wiirû bwa îgûrû na rangi înjerû. Ningî nî eekîrîte nguû ya îgûrû ya ndigi cia bamba ya rangi ya mûkû. Ningî nî eekîrîte thirû înthongi. Nabo antû ba ntûûra ya Susa nî baagwîrîîtue mono bagîkûngwagîra.

¹⁶Nabo Ayahudi nî baagwîrîîtue mono, na banogoki bakwona bakûûmbana.

¹⁷Nthîgûrûûne yonthe na ntûûreene cionthe kûrîa waatho bûu bwaathomagwa, Ayahudi nî baagwîragua mono, bakathithia biatho nîûntû bwa nkerû, na bakanogoka kuuma ngûgîîne ciaao. Ningî antû babaingî barîa bataarî Ayahudi nî baaere Ayahudi nîûntû nî baakîraga Ayahudi.