Read KIMERU BIBLE PROTESTANT EDITION Esta 9 Bible Online

Esta 9 - KIMERU BIBLE PROTESTANT EDITION bible

Esta 9

¹Kûrî ntukû ya îkûmi na ithatû, ya mweri jwa îkûmi na îîrî, taju mweri jûrîa jweetagwa Adari, nîrîo waatho bweetîkîîrîtie anthû ba Ayahudi baithûkîra Ayahudi. Îndî ntukû îîu nîyo Ayahudi boombîre anthû baao ndweene.

²Ayahudi nî baarî bakûûthûrana ntûûreene irîa baatwîre cionthe, nthîgûrûûne irîa mûnene Aritashashita aathaga. Boothûranaga nîkenda baikaria kuuma kîrî anthû barîa baacwaga kûbathiria. Îndî antû ba nthîgûrû îîu batomagîîria kwithûkîra Ayahudi tontû nî babakîraga mono.

³Atongeeria na arûngamîîri bonthe ba nthîgûrû irîa mûnene aathaga, nî baatethereerie Ayahudi nîûntû nî baakîraga Modekai.

⁴Antû bonthe ba nthîgûrû irîa mûnene aathaga nî baarî bakûmenya ûrîa Modekai aarî akweewa gîtîîo gîkînene gîkaroone kîa mûnene na ûrîa aarî akûgîa nkuma înene.

⁵Tontû bûû, Ayahudi nî booragîre anthû baao, nîûntû nîu boonaga kwagîrîte kûthithia.

⁶Ayahudi nî booragîre anthû magana jataano ntûûreene îrîa nene ya Susa.

⁷Ningî nî booragîre Parishanidatha, na Dalifoni, na Asipatha,

⁸na Poratha, na Adalia, na Aridatha,

⁹na Parimashita, na Arisai, na Aridai, na Vaizatha.

¹⁰Bau baarî ataana îkûmi ba Hamani ûrîa waarî mûnthû wa Ayahudi. Hamani aarî mûtaana wa Hamedatha. Îndî Ayahudi gûtî into baataîre.

¹¹Ntukû o îîu yongwa, mûnene nî aamenyithîrue ûrîa antû barîa booragîri ntûûreene ya Susa bang'ana.

¹²Mûnene areera Esta mûka-mûnene atîrî, “Ntûûreene ya Susa, Ayahudi nî booragîte antû magana jataano o amwe na ataana îkûmi ba Hamani. A nthîgûrûûne yonthe îrîa mbathaga rî, booragîte bang'ana? Nandî rî, nîatîa ûngî ûkwenda? Mbîîra nabu bûkaathithua.”

¹³Esta aramûcokeria atîrî, “Këethîra nî ûkwona kwagîrîte mûnene, îtîkîîria Ayahudi barîa barî ntûûreene ya Susa rûûjû bathithie ûrîa waatho bûkuugaga bathithie naarua. Ningî wîtîkîîrie biimba bia ataana barîa îkûmi ba Hamani bacuurue gûntû kûrîa gwaki gwa gûcuuranîria.”

¹⁴Tontû bûû, mûnene ararita waatho atî ûntû bûu bwa gûcuuria ataana barîa îkûmi ba Hamani bûthithue kûu ntûûreene ya Susa.

¹⁵Kûrî ntukû ya îkûmi na inya ya mweri jûrîa jweetagwa Adari, Ayahudi barîa baatûûraga ntûûreene ya Susa nî boothûranîre barooraga antû bangî magana jathatû (300). Gûtî into baataîre.

¹⁶Nabo Ayahudi barîa bangî baarî nthîgûrûûne irîa mûnene aathaga, kinya bo nî boothûranîre nîkenda baikaria. Ayahudi bau nî booragîre anthû baao akî, antû ngiri mîrongo mûgwanja na ithaano (75,000). Gûtî into baataîre.

¹⁷Baathithîrie ûu kûrî ntukû ya îkûmi na ithatû ya mweri jûrîa jweetagwa Adari. Rûûneene, kûrî ntukû ya îkûmi na inya nî baanogokere. Nayo îraa ntukû ya gûkûngwîra kîatho.

¹⁸Îndî Ayahudi barîa baatûûraga ntûûreene ya Susa nî baarî bakûûraga antû baao ntukû ya îkûmi na ithatû na ya îkûmi na inya, îndî baranogoka ntukû ya îkûmi na ithaano. Nayo îraa ntukû ya gûkûngwîra kîatho.

¹⁹Tontû bûû, nîkîo gîtûmaga Ayahudi barîa batûûraga tûtûûreene tûnini baeethia ntukû ya îkûmi na inya ya mweri jûrîa jweetagwa Adari ntukû ya kûnogoka. Ntukû îîu nîyo bakûngwagîra biatho na kweejana biewa.

²⁰Modekai nî aaugîre barûga ciaandîkwe mantû jarîa jaathithîkîte jonthe na itûmwe kîrî Ayahudi bonthe barîa baarî nthîgûrûûne irîa mûnene Aritashashita aathaga.

²¹Barûga iu ciaaugaga atî Ayahudi nî baabuîrîte kûnogokaga o mwaka o mwaka ntukû ya îkûmi na inya na ya îkûmi na ithaano ya mweri jûrîa jweetagwa Adari.

²²Îgiita rîa ntukû iu cio-ijîîrî nîrîo Ayahudi boombîre anthû baao. Rîu nîrîo kîrîro kîaao na kwithikîîra kwaao kwagarûkîre kûraa kûgwîrua na gûkûngwîra. Ningî nîcio ciaeere ntukû irîa antû babuîrîte kweejanaga biewa na gûteethagia nkîa.

²³Tontû bûû, Ayahudi nî beetîkîrîrie gwîta na mbere kûthithagia biatho o ta biu o mwaka o mwaka, ta ûrîa Modekai aabaandîkîrîte.

²⁴ Hamani mûtaana wa Hamedatha, wa rûrîîjo rwa Agagi, aarî mûnthû wa Ayahudi na nî aabanganîtie ûrîa Ayahudi bakaathirua. Hamani nî aaringithîtie kuura îrîa yeetagwa Puri nîkenda kûmenyekana ntukû yongwa îrîa Ayahudi bakaathirua.

²⁵Îndî Esta nî eetîre kîrî mûnene nawe mûnene ararita waatho atî Hamani abuîrîte gûkanûkua nîûntû bwa mîbango îmîthûûku îrîa aabangîrîte Ayahudi. Ningî atî we na ataana baawe nî baabuîri gûcuurua antû arîa gwaki kwa gûcuuranîria.

²⁶Tontû bûû, biatho birîa bieethagîrwa birî o ntukû iu cio-ijîîrî bieetagwa Biatho bia Purimu. Bieetîrwe ûu nîûntû bwa barûga îrîa Modekai aabaandîkîrîte na mantû jarîa jaakarîkîte.

²⁷Ayahudi nî baaritîre waatho atî o mwaka o mwaka bakaathithagia biatho biu, na bithithague nî nchiarwa ciaao, kana antû bangî barîa bakeenda kwaa Ayahudi o ta ûrîa Modekai aaugîîte.

²⁸Ningî nî baaugîre atî antû ba Israeli bonthe, na nchiarwa ciaao, nthukîîne cionthe, nî babuîrîte kuririkanaga gûkûngwîra kîatho kîu kîa Purimu, ntûûreene ciaao na nthîgûrûûne kunthe kûrîa bakethagîrwa batwîre.

²⁹Rîu Esta, mûka-mûnene, ûrîa waarî mwarî wa Abihaili, na Modekai nî baandîkîre barûga îngî ya kûrikithia mantû jarîa jaarî barûgeene ya mbere jegiî Purimu.

³⁰Barûga iu nî ciaatûmîrwe kîrî Ayahudi bonthe barîa baatûûraga nthîgûrûûne irîa îgana rîa mîrongo îîrî na mûgwanja (127), irîa ciaathagwa nî mûnene Aritashashita. Nacio ciaarî na mantû jegiî thîîrî na ûthinyaari.

³¹Ningî barûga iu nî ciabonagîîria bo amwe na nchiarwa ciaao ûrîa biatho bia Purimu biabuîrîte kûthithagua îgiita rîaabio rîaakinya. Esta na Modekai nî baabeerîte ûrîa bo amwe na nchiarwa ciaao babuîrîte gûciata biakûrîa baithikîîrîte.

³²Esta nîwe waaritîte waatho bûu bwa kûthithagia biatho bia Purimu. Waatho bûu nî bwaandîki.