Read KIMERU BIBLE PROTESTANT EDITION Kum 1 Bible Online

Kum 1 - KIMERU BIBLE PROTESTANT EDITION bible

Kum 1

¹ Jaja nîjo mariîtwa ja ataana ba Jakubu barîa beetanîrie nawe Misri; o muntû na nja yaawe:

²Rubeni, na Simioni, na Lawi na Juda,

³na Isakari, na Zebuloni, na Benjamini,

⁴na Dani, na Nafutali, na Gadi na Asheri.

⁵Nacio nchiarwa cionthe cia Jakubu ciaarî antû mîrongo mûgwanja (70); Josefu nî aarî agwîta Misri.

⁶Josefu nî aakuîre, na kinya ataana ba ng'ina bonthe na antû bonthe ba nthukî îîu nî baakuîre.

⁷ Îndî nchiarwa cia Israeli nî ciaciaranîre na irathegea mono, irongereka mainda jamaingî na iragea inya, mwanka iroojûra nthî.

⁸ Nthîgûrû ya Misri nî yaagîîre na mûnene ûmwerû ûtaamenyaga Josefu.

⁹Nî eerîre antû baawe ûjû, “Raithîrieni bwone ûrîa antû ba Israeli barî babaingî na barî na inya gûtûkûrûka.

¹⁰ Nandî ga tûcwee ûrîa tûbathithîria, batîgeete na mbere kûthegea, nîûntû gûkëeja kûgîa ndwaa boomba gwîta rûteere rwa anthû beetû bakarwaa naatuî na bakamatûka kuuma nthîgûrûûne yeetû.”

¹¹Tontû bûû, antû ba Misri bareeka arûngamîîri batongagîrie Aisraeli nîkenda babathangîkia na kûbaritithia ngûgî indito. Nabo Aisraeli baraakîra Farao ntûûra ijîîrî cia gwîka into: nacio nî Pithomu na Ramesesi.

¹²Nabo o ûrîa beetîre na mbere kûinyîîrua, nîo u beetîre na mbere kûthegea na kûûjûra kunthe. Nabo Amisri nî baakîrîre antû ba Israeli mono.

¹³Tontû bûû, nî baaritithîrie antû ba Israeli ngûgî na inya nkûrûki ya kîthimi.

¹⁴Amisri baratûma ûtûûro bwaao bûthûûka nîûntû bwa kûbaritithia ngûgî îîu njûmo ya kûthuranîra mûthetu jwa yûmba na maturubarî, na ngûgî cionthe cia mîundeene. Kîrî ngûgî cionthe irîa baaritaga Amisri nî babainyagîîria mono.

¹⁵Rîu mûnene wa Misri nî aarîîrie na eejûkia Ahibirania, ûmwe weetagwa Shifura na ûngî weetagwa Pua arabeera atîrî,

¹⁶“Rîrîa bûgûteethia aka Ahibirania bakîgîa na twaana, tegageni kaana karîa gagûciarwa, gakëeja kwîthîrwa karî kaîjî bûkoorage, îndî gakëeja kwîthîrwa nî kaarî bûtigane nako gatûûre mwoyo.”

¹⁷Îndî eejûkia bau nî baarî akîri Mûrungu na bataathithîrie ûrîa mûnene wa Misri aabeerîte, nabo nî baarekererie tûîjî tûratûûra mwoyo.

¹⁸Tontû bûû, mûnene wa Misri areeta eejûkia bau arabooria, “Nîkî bûkûthithia ûjû? Nîkî bûkûrekeeria tûîjî tûtûûra mwoyo?”

¹⁹Nabo eejûkia bareera Farao atîrî, “Aka Ahibirania batîkari ta aka Amisri, nîûntû aka Ahibirania barî inya mono na baciaraga na mpwîî mbere ya eejûkia bakinya kîrî bo.”

²⁰Tontû bûû, Mûrungu nî aathithagîria eejûkia bau bûbwega. Nabo antû nî beetîre na mbere kûthegea na inya mono.

²¹Nîkwîthîrwa eejûkia nî baarî akîri Mûrungu, Mûrungu nî aatûmîre baragîa na nja ciaao.

²² Rîu Farao nî aathanîre kîrî antû baawe bonthe arauga, “O kaîjî konthe karîa gagaciarwa nî Ahibirania bûkagerage rûûjîîne rwa Naili îndî aana ba aarî barekeerue batûûre mwoyo.”