Read KIMERU BIBLE PROTESTANT EDITION Kum 10 Bible Online

Kum 10 - KIMERU BIBLE PROTESTANT EDITION bible

Kum 10

¹MWATHANI nî eerîre Musa atîrî, “Îta kîrî Farao nîûntû nî mpûûmagarîîtie nkoro yaawe na nkoro cia nthûûmba ciaawe, nîkenda mbonania biama bibi biaakwa kîrî bo,

²na nîkenda bûkeeraga aana beenu, na aana-ba-aana beenu, ûrîa ndaeetherie Amisri bakara ta biaa na biama birîa ndaaringîre gatîgatîîne kaao, na nîkenda bûmenyaga atî ni nî ni MWATHANI.”

³Tontû bûû, Musa na Aaroni nî beetîre kîrî Farao baramwîra, “MWATHANI Mûrungu wa Ahibirania ariuga ûjû, ‘Nî mwanka rî, ûgakara ûregeete kwinyiyia mbere yaakwa? Rekeeria antû baakwa beete bagantumîkîre.

⁴Nîkwîthîrwa warega kûrekeeria antû baakwa beeta rî, rûûjû nkareeta ngigî nthîgûrûûne yaaku.

⁵Ikoojûra nthî yonthe, mwanka muntû aremwe kwona mûthetu. Ikaarîa birîa bionthe biatigîrwe nî ngai ya nchûgû na irîe mîtî yeenu îrîa îrî kîthakeene.

⁶Ningî ikoojûra nyomba ciaaku na cia nthûûmba ciaaku cionthe na cia Amisri bonthe. Ikaingîa ûntû ba-baagu and biûjûjû bieenu bitoona kuuma ntukû îrîa biaciarîrwe mwanka nandî.’” Nawe arauma kîrî Farao areeta.

⁷Nthûûmba cia Farao iramwîra, “Ka muntû ûûjû ageeta na mbere gûtûûthangîkia mwanka rî? Rekeeria antû beete bagatumîkîre MWATHANI Mûrungu waao. Nîka ûtîgûciûkîrwa mwanka rîu atî Misri nî înthûûkîtue buru?”

⁸Tontû bûû, Musa na Aaroni baracokua kîrî Farao nawe arabeera, “Îteeni bûgatumîkîre MWATHANI Mûrungu weenu. Îndî nîba bageeta?”

⁹Musa aramwîra, “Twinthe tûgeeta: tugeeta na aana beetû na kinya barîa akûrû. Tûgeeta na ataana na aarî beetû, na ng'ondu na mbûri na ng'ombe cieetû nîûntû no mwanka tûthithie mambura nîûntû bwa MWATHANI.”

¹⁰Farao arabeera, “MWATHANI nî abûteethie, këethîra nkabûrekeeria bwîta na aana beenu! Nî bûkwoneka bûrî na mworoto jûmûthûûku mathûgaanioone jeenu.

¹¹Gûtî ûntû ta bûu! Arûme akî nî beete bagatumîkîre MWATHANI, nîûntû nîu bûkwenda.” Rîu Farao arabeenga barauma akuî nawe.

¹²Rîu nîrîo MWATHANI eerîre Musa atîrî, “Taambûrûkia njara îgûrû rîa nthî ya Misri nîkenda ngigî ciîja ku irîa imera bionthe na matî jonthe jarîa ngai ya nchûgû yaatigarîrie.”

¹³Tontû bûû, Musa aratambûrûkia rûturo rwaawe îgûrû rîa nthîgûrû ya Misri, nawe MWATHANI arareeta ruuo kuuma bwa gaiti mûthenya jûu junthe, na ûtukû bûu bunthe rûraurutana nthîgûrûûne îîu. Gûgîkîa, ruuo rûu nî rwaarî rûkûreeta ngigî.

¹⁴ Ngigî iroojûra nthîgûrû ya Misri kunthe, mîrumbî îmînene ya ngigî îtoonekana kaîrî na îtîkoroonekana nyumeene îragwa nthîgûrûûne ya Misri.

¹⁵Nacio irakunîka nthîgûrû yonthe, mwanka îrairûa, na irarîa imera na matî na matuunda jonthe jarîa ngai ya nchûgû yaatigarîîtie. Gûtî mûtî jûmwîthî jwatigarîre nthîgûrûûne ya Misri yonthe.

¹⁶Nîrîo Farao eetîre Musa na Aaroni na mpwîî arabeera, “Nî mbîîrîîtie MWATHANI Mûrungu weenu na nkabwîîria.

¹⁷Nandî rî, ndekereni meeyia jaakwa, ndabûromba rîrî rîonka na bûndombere MWATHANI Mûrungu weenu ampeberie akî îkanûkia rîrî rîthûûku.”

¹⁸Tontû bûû, Musa arauma kîrî Farao na areeta araromba MWATHANI.

¹⁹MWATHANI nî aagarûrîre ruuo rûraurutana kuuma bwa rûgûrû na inya mono naru rûrakamata ngigî rûraigera îrieene rîa nthanje[3]. Gûtî ngigî kinya îmwe yaatigarîre nthîgûrûûne ya Misri yonthe.

²⁰Îndî MWATHANI nî oomîrie nkoro ya Farao na ataarekererie antû ba Israeli beeta.

²¹MWATHANI nî eerîre Musa atîrî, “Taambûrûkia njara bwa îgûrû nîkenda kûgîa muundu nthîgûrûûne ya Misri; muundu jûmûnene jwa kûrigarania.”

²² Rîu Musa aratambûrûkia njara bwa îgûrû naku kûragîa muundu jûmûnene nthîgûrûûne ya Misri yonthe ntukû ithatû.

²³Antû batoombaga kwonana, kana bauma kûrîa baarî ntukû ithatû. Îndî kûrîa antû ba Israeli bonthe baatûûraga nî kwaarî na weerû.

²⁴Farao areeta Musa aramwîra, “Îteeni bûgatumîkîre MWATHANI, na kinya aana beenu no beetanie naabuî. Îndî bûtige mbûri na ng'ondu na ng'ombe cieenu.”

²⁵Musa nawe aramwîra, “No mwanka ûtûnenkere birîa tûkaaritîra MWATHANI Mûrungu weetû birî biewa na igongwana bia gwakîîria.

²⁶Kinya ng'ombe cieetû no mwanka twîte nacio, gûtî nyomoo kinya îmwe tûgatiga, nîûntû nî imwe ciaacio tûkaaritîra MWATHANI Mûrungu weetû, na tûtîmenya irîa tûkaamûritîra mwanka rîrîa tûgaakinya nao.”

²⁷Îndî MWATHANI aroomia nkoro ya Farao nawe ararega kûbarekeeria.

²⁸Rîu Farao aramwîra atîrî, “Îta uume kîrî ni na wimenyeere mono ntîkeeje gûkwona mbere yaakwa kaîrî; nîûntû ntukû îrîa ngakwona mbere yaakwa nî yo ûgaakua.”

²⁹Musa nawe aramwîra, “Ûkuuga bwega! Ntîkororaithîria ûthiû bwaaku kaîrî.”