Read KIMERU BIBLE PROTESTANT EDITION Kum 11 Bible Online

Kum 11 - KIMERU BIBLE PROTESTANT EDITION bible

Kum 11

¹MWATHANI nî eerîre Musa atîrî, “Nî îkanûkia rîngî rîmwe akî rîtigeere rîrîa nkaareetera Farao na Misri. Kuuma au akabûrekeeria bwîte. Akabwinga abwîre bwîte buru.

²Nandî îta wîre arûme na aka bonthe beete kîrî atûûri baao na babarombe into bia fetha na bia thaabu.”

³MWATHANI aratûma Aisraeli beetîkîrîka mbere ya Amisri bonthe. Musa nî aarî muntû ûrî na îgweta mono nthîgûrûûne ya Misri, kîrî nthûûmba cia Farao na kîrî antû bonthe.

⁴Musa nî aabeerîre atîrî, “MWATHANI ariuga ûjû: ‘Gûgîkinya ûtukû gatîgatî ngakûrûkîîra Misri,

⁵na marikithathi jonthe jarîa jarî nthîgûrûûne ya Misri jagaakua, kwambîrîria na mwana wa kîranga wa Farao, ûrîa ûbwîrî gûkarîra rûriga rwaawe rwa ûnene, mwanka rikithathi ya nthûûmba ya mûka îrîa îthiaga; na kinya marikithathi jonthe ja ndîîthia.

⁶Gûkagîa kîrîro gîkînene nthîgûrûûne yonthe ya Misri, kîrîa gîtaigîgua kaîrî na gîtîkoroigîîgua kaîrî.

⁷Îndî gûtî kinya kurû îkaruumîîra antû ba Israeli kana nyomoo ciaao nîkenda bûkaamenya atî MWATHANI nî aathûranaga Amisri na Aisraeli.’”

⁸Musa ararîkia rwaria rwaawe akiugaga, “Nthûûmba iji ciaaku cionthe ikeeja kîrî ni na inturîrie maru ikiugaga, ‘Umagara wîte amwe na antû bonthe barîa ûtongeeretie.’ Naani nyuma ya bûu nkaumagara mbîte.” Nawe arauma kîrî Farao athûûri mono.

⁹Rîu MWATHANI areera Musa atîrî, “Farao atîbûthikîîra nîkenda mbîta na mbere kûringa biama bibingî nthîgûrûûne ya Misri.”

¹⁰Musa na Aaroni nî baaringîre biama bibi bionthe mbere ya Farao, îndî MWATHANI aroomia nkoro ya Farao ararega kûrekeeria antû ba Israeli bauma nthîgûrûûne yaawe.