Read KIMERU BIBLE PROTESTANT EDITION Kum 12 Bible Online

Kum 12 - KIMERU BIBLE PROTESTANT EDITION bible

Kum 12

¹ MWATHANI nî aarîîrie Musa na Aaroni barî nthîgûrûûne ya Misri arabeera atîrî,

²“Mweri jûjû jûkeethîrwa kîrî buî jûrî jwa kwambîrîria mîeri. Nîju jûkaa mweri jwa mbere jwa mwaka kîrî buî.

³Arîrieni kîuthûrano kîa antû ba Israeli bonthe bûbeere atî: ntukû ya îkûmi ya mweri jûjû yakinya, o muntû nî ajûkie ntûrûme, o nja îmwe îjûkie ntûrûme îmwe.

⁴Îndî nja îkëethîrwa îrî na antû babakai ûntû batîûmba kûthiria ntûrûme îmwe, mwene mûciî nî aringanîre nja yaawe na ya mûtûûri waawe barîe ntûrûme îîu. Thînjeni ntûrûme irîa bûkoomba kûthiria.

⁵Thureeni ntûrûme kana nthenge ya mwaka jûmwe îtî na banja.

⁶Mîkeeni mwanka ntukû ya îkûmi na inya ya mweri jûjû, rîrîa kîûthûrano kîa antû bonthe ba Israeli bakoothûrana amwe na bûûrage nyomoo iu thaa cia ûgoro.

⁷Rîu bakaajûkia tharike îmwe bamîake mîînjîroone yo-îîrî ya mwari na gîtugîîne kîa nyomba irîa bakaarîîra.

⁸Bagaakia nyama iu na bacirîjanîrie na mîgaate îtiimbithîtue na nyani irî ng'ana ûtukû o bûu.

⁹Bûkárîa nyama kinya îrîkû yaacio îrî îmbîthî kana îtherûkîîtue tiga yaakîîtue akî; kinya mûtwe jaacio na mathagiro na into bia kîu.

¹⁰Naabuî bûkáreka noo mbi îraara mwanka rûkîîrî. Kîrîa gîgatigara mwanka rûkîîrî no mwanka kîîthîrue.

¹¹Bûrîe na mpwîî na bûciogeete nguû na bwîkîrîte îratû na bûgwete nturo njareene cieenu ta antû baithuranîrîte gwîta rûgendo. Îîjî nîyo Pasaka ya MWATHANI.

¹²Ûtukû bûu ngaakûrûkîîra nthîgûrûûne ya Misri na mbûrage marikithathi jonthe marikithathi ja antû na ja nyomoo. Ngakanûkia mîrungu ya Misri yonthe. Nî ni MWATHANI.

¹³Tharike nîyo îkaa rwaano rweenu rwa kwonanania nyomba irîa bûrî. Rîrîa nkoona tharike ngakûrûka ntîbûringithîtie na gûtî ûntû bûbûûî bûkabwîjîîra bûbûthiria, rîrîa ngakanûkia nthîgûrû ya Misri.

¹⁴ Ntukû îîu îkaa ntukû ya kûririkanagwa kîrî buî, naabuî bûkamîmenyagîîra na bûkaathithia mambura nîûntû bwa kûririkana ûrîa ni MWATHANI ndathithia. Nthukî cieenu cionthe îkaathithagia ûntû bûu bûrî ta Waatho kenya na kenya.”

¹⁵MWATHANI arauga atîrî, “Naabuî bûkaarîjaga mîgaate îtiimbîthîtue ntukû mûgwanja. Ntukû ya mbere bûritage mîtheega ya kwimbithia nyomba cieenu nîûntû muntû wonthe ûrîa ûkaarîa mûgaate jwimbîthîtue kuuma ntukû ya mbere mwanka ya mûgwanja akeengagwa kuuma Israeli.

¹⁶Ntukû ya mbere na ya mûgwanja bûûthûranage amwe kûthaathayia Mûrungu. Bûkárita ngûgî ntûku iu îndî no bwîrugaîre biakûrîa bieenu akî.

¹⁷Thithagieni mambura jaja ja mîgaate îtiimbithîtue nîûntû ntukû îîu nîyo ndaabûritîre bwinthe nthîgûrûûne ya Misri. Tontû bûû, nthukî cionthe nî ithithagie mambura jau kuuma ntukû îîjî ta Waatho kenya na kenya.

¹⁸“Bûkarîjaga mîgaate îtiimbîthîtue kuuma ûgoro bwa ntukû ya îkûmi na inya mwanka ûgoro bwa ntukû ya mîrongo îîrî na îmwe cia mweri jwa mbere.

¹⁹Ntukû iu mûgwanja gûtî mûtheega jwa kwimbithia mûgaate jûbuîrîte kwîthîrwa jûrî nyomba cieenu. Nîkwîthîrwa ûrîa wonthe ûkarîa gîntû kiimbithîtue akeengagwa kuuma kîrî kîûthûrano kîa antû ba Israeli, kinya ëethîrwa arî mûgeni kana mûtûûri wa gûntû kûu.

²⁰Gûtî gîntû kiimbîthitue bûkaria. Bûkarîjaga mîgaate îtiimbîthîtue kûrîa bûtûûraga.”

²¹Musa nî eetîre akûrû bonthe ba Israeli arabeera atîrî, “O muntû nî athuure ntûrûme kûringana na nja yaawe ûrîa îng'ana na athînje bamîrîe ntukû ya Pasaka.

²²Jûkieni gîkundi kîa matî ja makuuû bûjatombeke tharikeene îrîa îrî mpakûriine, na bûmîake gîtugîîne na mîînjîroone yo-îîrî ya mwari. Gûtî muntû ûbwîrî kuumagara nyomba yaawe mwanka rûkîîrî.

²³ Nîkwîthîrwa MWATHANI ageetania na nthî yonthe akîûraaga Amisri. Rîrîa akoona tharike itugîîne na mîînjîroone ya mîari, agakûrûkîra mîari îîu na atîrekeeria mwînyangia akûrûka nyomba cieenu abûûraga.

²⁴Bûthingatage Waatho bûu na kinya nchiarwa cieenu ibûthingatage kenya na kenya.

²⁵Rîrîa bûgeeta nthîgûrûûne îrîa MWATHANI akabwaa o ta ûrîa eekîîre wîrane, bûkathithagia ûntû bûu.

²⁶Rîrîa aana beenu bakabûûria, ‘Nîmbi gîtûmi gîa ûntû bûu?’

²⁷Bûbeere, ‘Nî kîgongwana gîa Pasaka ya MWATHANI, nîûntû nî aakûrûkîîre nyomba cia antû ba Israeli barî Misri, rîrîa ooragîre Amisri îndî aratûcaîîra.’” Rîu antû bareenamîîria barathaathayia Mûrungu.

²⁸Antû ba Israeli nî beetîre barathithia ûntû o bûu, o ta ûrîa MWATHANI eerîte Musa na Aaroni.

²⁹ Ûtukû gatîgatî, MWATHANI nî ooragîre marikithathi jonthe ja nthîgûrû ya Misri, kwambîrîria mwana wa kîranga wa Farao, ûrîa ûrîngî aa mûnene mwanka îrikithathi rîa mûtae ûrîa ûtheeki na marikithathi ja nyomoo cionthe.

³⁰Ûtukû bûu Farao na nchaama ciaawe cionthe na Amisri bonthe nî bookîrîîre na bararîra mono nîûntû gûtî nyomba îtaarî na kiimba kîa mwana wa mbere.

³¹Ûtukû o bûu Farao areeta Musa na Aaroni na arabeera, “Ûkîîreeni bwîte buume gatîgatîîne ka antû baakwa, buî amwe na antû ba Israeli! Îteeni bûgatumîkîre MWATHANI o ta ûrîa bûreendaga.

³²Jûkieni mbûri na ng'ondu na ng'ombe cieenu o ta ûrîa bûrorîîtie, bwîte na kinya ni bûntharime.”

³³Amisri nî beengaîngîre antû ba Israeli, nîkenda baumanga nthîgûrûûne na mpwîî, bakiugaga, “Tûgaakua twinthe.”

³⁴Tontû bûû, antû barajûkia mûtu jûmûkande mbere ya jwimba jûrî mpakûriine ciaao cia gûkandîra na baroogania amwe na nguû ciaao barakamata na ituro.

³⁵ Antû ba Israeli nî baarî bakûthithia o ta ûrîa Musa aarî akûbeera, bararomba Amisri into bia fetha, na bia thaabu na nguû.

³⁶MWATHANI nî aatûmîte beetîkîrîka kîrî Amisri, nîkîo baanenkagîrwa birîa bionthe baarombaga. Ûu nîu boombîre gûtaa into bia Amisri.

³⁷Antû ba Israeli nî baambîrîrie rûgendo kuuma Ramesesi gwîta Sukothi, barî arûme ngiri magana jatantatû (600,000) batîgûtara aka na twaana.

³⁸Antû bangî ba mîthemba îmingî nî beetanîrie nabo. Ningî nî beetîre na nyomoo inyiingî mono: mbûri, na ng'ondu na ng'ombe.

³⁹Nî bakaandîre mîgaate îtiimbîthîtue ya mûtu jûrîa baaumîre naju Misri, nîkwîthîrwa jûtaarî na mûtheega jwa kwimbithia, nîûntû nîka beengaîngîrwe kuuma Misri, na batoona kaanya ga kûthuranîra rîîgu.

⁴⁰ Antû ba Israeli nî baatwîre Misri mîaka magana jana ja mîrongo îthatû (430).

⁴¹Ntukû ya mûthia ya mwaka jwa mîaka îîu magana jana ja mîrongo îthatû (430) yongwa, nîrîo antû bonthe ba MWATHANI baumagarîre nthîgûrû ya Misri.

⁴²Ûtukû bûu bwaarî bwa MWATHANI kûbakaria nîkenda abarita kuuma nthîgûrû ya Misri. Tontû bûû, ûtukû o bûbû nîbu MWATHANI aathûrîre bûrîa antû ba Israeli bonthe bakararaga batîmami nîûntû bwa kwaa MWATHANI gîtîîo.

⁴³MWATHANI nî eerîre Musa na Aaroni atîrî, “Bûbû nîbu Waatho bwegiî Pasaka: Gûtî mûgeni ûbuîrîte kûmîîrîa.

⁴⁴Îndî nkombo yonthe îrîa îgûri na mbeecha yoomba kûrîa Pasaka nyuma ya bwamîtaana.

⁴⁵Gûtî mûgeni kana nthûûmba îrîa bûkomborete îbuîri kûrîa Pasaka.

⁴⁶ Pasaka îkarîîjagîrwa nyomba îmwe. Bûgákamataga nyama bûciumagaria oome ya nyomba. Ningî bûkauna mûrûitû noo jûmwe.

⁴⁷Kîûthûrano kîa antû ba Israeli bonthe no mwanka kîrîjage Pasaka.

⁴⁸Mûgeni akëeja gûtûûrania naabuî na akeenda kûthithia mambura ja Pasaka ya MWATHANI, no mwanka arûme baawe bonthe bataanwe. Rîu nîrîo ageetîkîîrua kûthithia mambura ja Pasaka, nîûntû akeethîrwa akari ta antû bangî ba nthî îîu. Îndî gûtî muntû ûtîtaani ûbiîrîte kûrîa kîatho gîa Pasaka.

⁴⁹Waatho o bûrîa bûkaathingatagwa nî antû ba nthîgûrû îîjî, noo bu bûkaathingatagwa nî mûgeni ûrîa ûkeeja gûtûûra amwe naabuî.”

⁵⁰Antû bonthe ba Israeli nî baathîkîre na barathithia o ta ûrîa MWATHANI eerîte Musa na Aaroni.

⁵¹O ntukû îîu yongwa nîyo MWATHANI aaritîre antû ba Israeli bonthe nthîgûrûûne ya Misri.