Read KIMERU BIBLE PROTESTANT EDITION Kum 13 Bible Online

Kum 13 - KIMERU BIBLE PROTESTANT EDITION bible

Kum 13

¹MWATHANI nî eerîre Musa atîrî,

² “Mbathûrîra marikithathi jonthe ûjatherie nîûntû bwaakwa; kîonthe kîrîa kîaingûraga kîu gatîgatîîne ka antû ba Israeli, kîrî kîa muntû kana kîa nyomoo, nî gîaakwa.”

³Musa areera antû atîrî, “Ririkanageeni ntukû îîjî îrîa bwaumîre Misri, kuuma nthîgûrû ya ûkombo, nîûntû MWATHANI aabûritîre ku na inya ya njara yaawe; gûtî mîgaate iimbithîtue îkarîjagwa.

⁴Ntukû îîu nîyo baaumîre Misri mweriine jwa Abibu.

⁵Rîrîa MWATHANI akaabûkinyia nthîgûrûûne ya Akanaani, na Ahiti, na Aamori, na Ahivi na Ajebusi, îrîa aaciîtîîrie biûjûjû bieenu kûbûnenkera, nthîgûrû îrîa nthongi na îrî mûthetu jûmûnoru na ûtonga bûbwingî, bûthithagie mambura ja Pasaka mweri jûu.

⁶Ntukû mûgwanja bûrîjage mîgaate îtiimbîthîtue, na ntukûûne ya mûgwanja bûkeethîrwa bûrî na kîatho kîa MWATHANI.

⁷Mîgaate îtiimbîthîtue nîyo îkarîjagwa ntukû iu mûgwanja. Gûtî mîgaate iimbîthîtue bûbuîrîte kwîthîrwa bûrî nayo, na gûtî mûtheega jwa kwimbithia bûbuîrîte kwîthîrwa bûrî naju nthîgûrûûne yeenu yonthe.

⁸Nayo ntukû îîu yakinya bûkeeraga aana beenu atîrî, ‘Tûrîthithia ûû nîûntû bwa jarîa MWATHANI aatûthithîrie tûkiuma Misri.’

⁹Nabu ûntû bûu bûkaa kîririkania kîrî buî, bûkari ta rwano rûrî njareene cieenu kana mothiûûne jeenu, nîkenda bwaragia nteto cia Waatho bwa MWATHANI; nîkwîthîrwa MWATHANI aabûritîte Misri na njara ya inya.

¹⁰Tontû bûû, bûûjûragie Waatho bûu îgiita rîa bu rîakinya o mwaka o mwaka.”

¹¹“Rîrîa MWATHANI akaabûkinyia nthîgûrû ya Akanaani, o ta ûrîa aaciîtîîrie biûjûjû bieenu na abûciîtîria, na athiria kûbûnenkera yo,

¹² bûkaathûragîra MWATHANI birîa bionthe bikethagîrwa birî marikithathi. Marikithathi ja ndûme jonthe ja nyomoo cieenu jakethagîrwa jarî ja MWATHANI.

¹³O îrikithathi rîonthe rîa ntigiri îgaakûûragwa na gatûrûme, kana kathenge îndî îkarega gûkûûrwa yûragwe. Najo marikithathi ja tûîjî jonthe jarîa jaagaaciarwa gatîgatîîne ka aana beenu bûkajakûûraga.

¹⁴Matukûûne jarîa jakeeja aana beenu bakëeja kûbûûria, ‘Nîmbi gîtûmi kîa ûntû bûbû?’ Bûbeere atîrî, ‘MWATHANI aatûritîre Misri nthîgûrû ya ûkombo na njara yaawe ya inya.

¹⁵Ûjû nîu gwakarîre rîrîa Farao aaregere gûtwîtîkîîria twîta nîûntû bwa ûûmo bwa nkoro yaawe, MWATHANI nî ooragîre marikithathi jonthe nthîgûrûûne ya Misri, ja antû na ja nyomoo. Kîu nîkîo gîtûmaga tûritîra MWATHANI kîgongwana gîntû kîrîa kîonthe kîa ndûme kîrugûraga kîu. Îndî ataana beetû barîa marikithathi bonthe tûkabakûûra.’

¹⁶Nabu ûntû bûû bûkaa kîrîrikania kîrî buî bûkari ta rwano rûrî njareene cieenu kana moothiûûne jeenu; nîûntû MWATHANI aatûritîre Misri na njara yaawe ya inya.”

¹⁷Kûrakara atîrî, rîrîa Farao aarekererie antû beeta, Mûrungu ataabatongeererie na njîra ya nthîgûrû ya Afilisti kinya këethîra nîyo yaarî nkuî. Nîkwîthîrwa Mûrungu augaga, “Antû bakëeja kûgarûka boona ndwaa, nabo bacoka Misri.”

¹⁸Îndî Mûrungu nî aatongererie antû na njîra ya mûthiûrûko ya rwanda gwîta bwa Îria Îtuune. Nabo antû ba Israeli barauma nthîgûrû ya Misri bareeta baitungîte nîûntû bwa ndwaa.

¹⁹ Musa nî aajûkîrie marûitû ja Josefu areeta najo; nîkwîthîrwa Josefu nî aarî agûciîtithia antû ba Israeli mûciîtio auga, “Rîrîa MWATHANI akaabûriûngîra, no mwanka bûjûkie marûitû jaakwa bwîte najo kuuma gûkû.”

²⁰Nabo bareeta kuuma Sukothi na baramba kambî Ethamu, rûteere rwa rwanda.

²¹MWATHANI eetaga arî mbere yaao, mûthenya arî îtuune rîrûngi ja gîtugî abatongeeretie, ûtukû arî mwankiine jûrûngi ja gîtugî abamûrîkîrîte nîkenda boomba gwîtaga ûtukû na mûthenya.

²²Narîo îtu rîrûngi ja gîtugî rîtaumaga mbere ya antû mûthenya na mwanki jûrûngi ja gîtugî jûtaumaga mbere yaao ûtukû.