Read KIMERU BIBLE PROTESTANT EDITION Kum 14 Bible Online

Kum 14 - KIMERU BIBLE PROTESTANT EDITION bible

Kum 14

¹Nawe MWATHANI aarîîrie Musa aramwîra,

²“Îîra antû ba Israeli bagarûke baambe kambî mbere ya Pihahirothi gatîgatî ka Migidoli na îria bankeene na Baali-zefoni. Au nîo bûkaamba kambî rûteere rwa îria.

³Farao akauga îgûrû rîa antû ba Israeli atîrî, ‘Nî barigicanîtue nî nthîgûrû, naru rwanda rwabacîgîîria.’

⁴Naani rî, nkoomia nkoro ya Farao nawe akeengana nabo, naanî nkagîta ûkumio nîûntû bwa Farao na njûûrî ciaawe, nabo Amisri bamenye ni nî ni MWATHANI.” Nabo Aisraeli barathithia mantû jau.

⁵Mûnene wa Misri akwîrwa atî antû bakûmatûka, mathûgaanio ja Farao na nchaama ciaawe jaragarûka îgûrû rîa antû. Nawe arauga, “Nîatîa twathithia, twarekeeria Israeli yeeta yatiga gûtûtumîkîra?”

⁶Tontû bûû, arathuranîra ngaarî yaawe ya ndwaa na arajûkia njûûrî yaawe

⁷na ngaarî magana jatantatû cia ndwaa îrîa nthuure na ngaarî îngî cionthe cia ndwaa cia Misri irî na asikarî cionthe.

⁸MWATHANI nî oomîrie nkoro ya Farao mûnene wa Misri na ningî areengana na antû ba Israeli barîa beetîte barî na ûchamba mono.

⁹Nabo Amisri bareengana nabo barî na mbarathi cia Farao cionthe na ngaarî cia ndwaa na eetithia mbarathi na njûûrî yaawe yonthe nabo barabagwatagwatîra arîa baambîte kambî akuî na îria rûteere rwa Pihahirothi mbere ya Baali-zefoni.

¹⁰Rîrîa Farao aakuîîrîrie, antû ba Israeli baciûkia meetho rî, baroona nî Amisri beengeene nabo. Nabo antû ba Israeli barakîra mono, bararîrîra MWATHANI.

¹¹Nabo barooria Musa atîrî, “Nî mbîrîra iraûrîte Misri tontû ûratûritîre kû twîja gûkuîra rwanda? Nîmbi îratûmîre ûtûthithîria ûjû watûrita Misri?

¹²Anga tî mantû jaja twakwîraga tûrî Misri rîrîa twakwîraga, ‘Rekana naatuî twîte na mbere gûtumîkîra Amisri?’ Nîkwîthîrwa nî kaaba tûrîngîkuîra Misri nkûrûki ya kwîja gûkuîra rwanda.”

¹³Musa areera antû atîrî, “Bûgakîreni, ûmîîrieni na bûraithîrie bwoone wonokio bwa MWATHANI, bûrîa akabwonokia nabu naarua îîjî. Nîkwîthîrwa Amisri baba bûkwona naarua bûtîkarîboona kaîrî.

¹⁴MWATHANI akabûrwîrîîra, buî kireni ki bweteere.”

¹⁵MWATHANI areera Musa atîrî, “Nîmbi îgûtûma ûndîrîra? Îîra antû ba Israeli beete na mbere na rûgendo.

¹⁶Taambûrûkia njara ûûkîrîîtie rûturo rwaaku îgûrû rîa îria ûrîathûrane nîkenda antû ba Israeli bauna îria beetîrîte nthî înjûmo.

¹⁷Naani nkoomia nkoro cia Amisri nîkenda babûthingata ku, naani ngîte ûkumio nîûntû bwa Farao na njûûrî yaawe yonthe, na ngaarî ciaawe cia ndwaa, na eetithia mbarathi baawe.

¹⁸Nabo antû ba Misri bakaamenya atî ni nî ni MWATHANI rîrîa nkaigîîra ûkumio îgûrû rîa Farao, na ngaarî ciaawe cia ndwaa, na eetithia mbarathi baawe.”

¹⁹Kûrakara atîrî, mûraîka wa Mûrungu ûrîa weetaga arî mbere ya njûûrî ya Israeli aracoka nyuma yaao. Narîo îtu rîrûngi ja gîtugî rîrauma mbere yaao rîracoka nyuma yaao,

²⁰rîrakara gatîgatî ka njûûrî ya Misri na njûûrî ya Israeli. Naku kûreethîrwa kûrî na îtu na kûragîa muundu rûteere rwa Amisri naru rûteere rwa Aisraeli rûreethîrwa rûrî na weerû. Tontû bûû, gûtî njûûrî yaakuîrîîria îngî ûtukû bunthe.

²¹Nîrîo Musa aatambûrûkîrie njara îgûrû rîa îria, nawe MWATHANI areeta ruuo rûrûnene rwa bwa gaiti aratindîka naru îria ûtukû bunthe, aratûma rûujî rwathûkana na îria riaa nthî înjûmo.

²² Nabo antû ba Israeli bareetîîra îrieene gatîgatî nthî înjûmo, rûûjî rûciûmbîte ta rûthingo rûteere rwaao rwa bwa ûrîo na rwa bwa ûmotho.

²³Nabo Amisri bareengana na Aisraeli, barakûrûka îrieene gatîgatî babathingatîte, amwe na mbarathi cionthe cia Farao, na ngaarî ciaawe cia ndwaa, na eetithia mbarathi baawe.

²⁴Kûrî akuî gûkîa, MWATHANI arî mwankiine jûrûngi ja gîtugî na îtuune nî eenîkîre meetho nthîgûrû araraithîria njûûrî ya Amisrî, nawe aramîangaratania.

²⁵MWATHANI aratûma magûrû ja ngaarî cia Amisri cia ndwaa jaremwa nî kûthiûrûka iraremwa nî gwîta bwega. Nabo Amisri barauga atîrî, “Twithareni tûmatûke tuume kîrî Aisraeli, nîkwîthîrwa MWATHANI nîwe ûkûbarwîrîîra kîrî Amisri.”

²⁶MWATHANI rîu areera Musa atîrî, “Taambûrûkia njara îgûrû rîa îria nîkenda rûûjî rwîja rûkunîkania Amisri na ngaarî ciaao cia ndwaa, na eetithia mbarathi baao.”

²⁷Tontû bûû, Musa aratambûrûkia njara îgûrû rîa îria gûgîkia narîo rîracokanîîra ûrîa rîakari mbere. Nabo Amisri barageria kûmatûka îndî MWATHANI arabarindania îrieene gatîgatî.

²⁸Nacio ndûûjî iracokanîîra irakunîkania ngaarî cia ndwaa, na eetithia baacio, na njûûrî yonthe ya Farao îrîa yaamûthingatîte. Gûtî kinya ûmwe waao watigarîre.

²⁹Îndî antû ba Israeli bo barauna îria beetîrîte nthî înjûmo rûûjî rûciûmbîte rûthingo rûteere rwa bwa ûrîo na rwa bwa ûmotho.

³⁰Ûu nîu MWATHANI oonokerie Israeli ntukû îîu kuuma njareene cia Amisri; nayo Israeli nî yoonere Amisri bakuîte barî rûteere rwa îria.

³¹Nabo Aisraeli boona mantû jamanene jarîa MWATHANI aathithîrîtie Amisri; nabo baramûkîra mono na bareetîkia MWATHANI na nthûûmba yaawe Musa.