Read KIMERU BIBLE PROTESTANT EDITION Kum 15 Bible Online

Kum 15 - KIMERU BIBLE PROTESTANT EDITION bible

Kum 15

¹ Nîrîo Musa na antû ba Israeli bainîîre MWATHANI rwîmbo rûrû bakiugaga, “Nkainîra MWATHANI nîûntû nî oombanîte aitunga ûkumio; mbarathi na mwîtithia waayo nî agereete îrieene.

² MWATHANI nîwe inya yaakwa na mûnkaria, na nî eete mwonokia waakwa. Ûûji nîwe Mûrungu waakwa naani nkamûkumagia, we Mûrungu wa ba baaba nkamûkathaga.

³MWATHANI nî nchamba, riîtwa rîaawe nî MWATHANI.”

⁴“Ngaarî cia ndwaa na njûûrî ya Farao nîwe wamîgerere ndieene; nacio nthuure cia atongeeria ba Farao iraûrîra îrieene îtuune.

⁵Îria rîrabakondoria rîrabathika; Nabo bareenama gîtinene kîa iiga.”

⁶“Njara yaaku ya ûrîo MWATHANI îrî ûkumio bwa inya, njara ya ûrîo yaaku MWATHANI yaaraganagia anthû.

⁷Nî ndeene ya kûnenea kwa ûnene bwaaku anthû batigithua kwaathana, ûgatûma mûthûûro jwaaku naju jûkabathiria ta matî.

⁸Nî rîrîa waaringîre nyiûrû ciaaku rûûjî rwaciûmbanîrie rwitîîtie, îkondoria rîa rûûjî rîrarûngama kîthûmba, naku gûntû kûrîa kworokereete mono îrieene kûgwatana bwega.

⁹Mûnthû arauga, ‘Nkeengana nawe mûgwatagwate, ngataa ûtonga bwaao, najûkie into birîa nkang'anîrwa nîbio. Ngaakûûra rûchiû na njara yaakwa îbathirie.’

¹⁰Nî wauîre ruuo rwaaku narîo îria rîrabakunîkania. Barorokîra rûûjîîne ta nchuuma.”

¹¹“Nûû ûkari taagwe, itû MWATHANI, gatîgatîîne ka mîrungu? Nûû ûkari taagwe ûrî ûchamba bwa ûtheru, we wa bata kîrî kûthithia mantû jagwîkîîrwa na marigarania?

¹²Gwe waatambûrûkîrie njara yaaku ya ûrîo nthî îrabameria.”

¹³“Gwe ûtongeretie antû barîa waakûûrîre na kîaao kîa mma, waabatongeeria na inya yaaku, mwanka antûûne aaku arîa atheru ûtûûraga.

¹⁴Antû ba mîgongo nî baigîîtue, baateetema; Afilisti bagwatwa nî rwakaî ta rwa mûka arî akuî kûewa mwana.

¹⁵Nabo atongeeria ba Edomu baamaka, na ba Moabu bagwatwa nî ûguaa, nabo atûûri ba Kanaani bonthe, baathira ûchamba.

¹⁶Kîmako na ûguaa birabagwata nîûntû bwa inya ya njara yaaku, baakira ki o ta iiga, mwanka antû baaku gwe MWATHANI, bakûrûka, baunûkia antû barîa gwe waakûûrîre.

¹⁷Gwe ûkabakûrûkia ûbaande kîrîmeene gîaaku kîongwa, antû arîa gwe MWATHANI ûthithîtie a gwikaragîra, kîûrûûne gîaaku itû MWATHANI kîrîa ûrîkîîtie na njara ciaaku.

¹⁸MWATHANI akaathanaga kenya na kenya.”

¹⁹Nîkwîthîrwa rî, rîrîa mbarathi cia Farao na ngaarî ciaawe cia ndwaa na eetithia baacio baatonyere îrieene, MWATHANI nî aacokanîrîrie rûûjî rûrabakunîkania. Îndî antû ba Israeli bo bareetîîra gatîgatîîne ka îria nthîgûrû înjûmo.

²⁰Nîrîo Miriamu mûka-kîroria, mwarî wa ng'ina wa Aaroni, aajûkîrie tamburini njareene ciaawe na aka bonthe baramûthingata bagweete tamburini na bakîangaga.

²¹Miriamu arabainîra arauga, “Inîreni MWATHANI, nîûntû nî oombanîte aitunga ûkûmio. Mbarathi na mwîtithia wa yo nî agereete ndieene.”

²²Nîrîo Musa aatongeererie Israeli kuuma Îrieene Îtuune nabo bareeta rwanda rwa Shuri. Nî beetîre ntukû ithatû rwanda na batoona rûûjî.

²³Nabo rîrîa baakinyîre Mara, batîngîûmba kûnyua rûûjî rwa Mara nîûntû nî rwaarî na ng'ana; tontû bûû rureetwa Mara.[4]

²⁴Nabo antû baranung'unîra Musa bakiugaga, “Nîmbi tûkaanyua?”

²⁵Nawe ararîrîra MWATHANI, na MWATHANI aramwonia mûtî nawe arajûgera rûûjîîne, naru rûûjî rûragîta mûrîo. Antû au nîo MWATHANI aabanenkereere mawaatho na nîo aabathimîîre,

²⁶arauga, “Bûkëeja kûthikîîra na mma kajû ka MWATHANI Mûrungu weenu na bûkaathithia jarîa jaagîrîte meethoone jaawe, na bûkaathîkîra maathana jaawe na mîathanîre yonthe yaawe, ntîkarîbûreetera mûrimo kinya jûmwe jwa îrîa ndaareteere antû ba Misri. Nîkwîthîrwa nî ni MWATHANI mûkworia mîrimo.”

²⁷Nabo nî beetîre barakinya Elimu antû kwaarî na ithima îkûmi na biîrî bia rûûjî na mîtî ya mîkîndû mîrongo mûgwanja. Nabo baraamba kambî au rûteere rwa rûûjî.