Read KIMERU BIBLE PROTESTANT EDITION Kum 16 Bible Online

Kum 16 - KIMERU BIBLE PROTESTANT EDITION bible

Kum 16

¹Nakîo kîûthûrano kîonthe gîa antû ba Israeli nî kîaumîre Elimu kîreeta kîrakinya rwanda rwa Sini, rûrîa rûrî gatîgatî ka Elimu na Sinai ntukû ya îkûmi na ithaano mweriine jwa îîrî nyuma ya rîrîa baaumîre nthîgûrû ya Misri.

²Nakîo kîûthûrano kîonthe kîa antû ba Israeli nî kîaanung'unîîre Musa na Aaroni kûu rwanda.

³Nabo antû ba Israeli barabeera atîrî, “Tî kaaba MWATHANI arîngî tûûragîra nthîgûrûûne ya Misri, kûrîa twaakaraga nthî nteere cia nyongû cia nyama na twaarîjaga irio tûkanyira? Nîkwîthîrwa gwe ûtûreetete rwanda rûrû nîkenda ûûraga kîûthûrano gîkî kîonthe na mpara.”

⁴ Nîrîo MWATHANI eerîre Musa Atîrî, “Nkabuurithîria mîgaate kuuma îgûrû. Nabo antû bakaumagaraga bakoothûrania biakûrîa bia ntukû îmwe o ntukû o ntukû, nîkenda nkaabageria mbone këethîra bakaathingata Waatho bwaakwa kana batîbûthingata.

⁵Nayo ntukû ya ithanthatû bakîthuranîra kîrîa bagaakûrûkia, bakathuranagîra mainda jaîrî ja birîa boothûranagia o ntukû.”

⁶Tontû bûû, Musa na Aaroni bareera antû ba Israeli bonthe atîrî, “Ûgoro bûkaamenya atî nî MWATHANI Mweneinya abûritîre nthî ya Misri,

⁷na rûkîîrî bûkoona ûkumio bwa MWATHANI nîûntû nî aigîîtue bûkîmûnung'unîra. Ka baatuî tûrî baaû nîkenda bûtûnung'unîra?”

⁸Musa arauga, “MWATHANI akaabûnenkera ûgoro nyama cia kûrîa ûgoro na rûkîîrî mîgaate ya kûng'ana, nîûntû MWATHANI nî aigîîtue kûnung'una kweenu kûrîa bûmûnung'unîrîte, baatuî rî, tûrî baaû? Tî baatuî bûkûnung'unîra, nî MWATHANI.”

⁹Musa nawe nî aarîîrie Aaroni aramwîra, “Îîra kîûthûrano kîonthe gîa antû ba Israeli ûjû, ‘Theengereeni kîrî MWATHANI nîûntû nî aigîîtue kûnung'una kweenu.’”

¹⁰Kûrakara atîrî, Aaroni o akîaragîria kîûthûrano gîa antû ba Israeli, baaraithîria bwa rwanda rî, nî boonere ûkumio bwa MWATHANI îtuune.

¹¹MWATHANI aarîîrie Musa aramwîra,

¹²“Mbigîîtue mînung'uno ya antû ba Israeli; baarîîrie ûbeere atîrî, ‘Ûgoro bûkaarîa nyama na rûkîîrî bûrîe mîgaate. Naabuî bûkaamenya atî ni nî ni MWATHANI Mûrungu weenu.’”

¹³Ûgoro bwakinya, nkware nî cieejîre nacio iroojûra kambîîne; na rûkîîrî îme nî rîagwîte kambîîne kunthe.

¹⁴Narîo îme rîkûnyaara kûroonekana kûu rwanda tûinto tûtûûthû tûkari ta nkamia tûgwîte nthîgûrû.

¹⁵ Antû ba Israeli batwona baroorania atîrî, “Nîmbi îîjî?” Nîkwîthîrwa bataamenyaga nîmbi yo. Musa arabeera, “Nî mîgaate îrîa MWATHANI abûnenkera bûrîa.

¹⁶Nabu bûbû nîbu MWATHANI aathanîte auga: ‘Bûmîûthûranie o ûmwe weenu, kûringana na kîrîa muntû akarîa, mpakûri îmwe [5] nîûntû bwa o muntû kûringana na antû barîa barî îemeene rîaawe.’”

¹⁷Nabo antû ba Israeli nî baathithîrie o ûu; bamwe baroothûrania îmingî, bangî îmîkai.

¹⁸ Îndî rîrîa baathimîre îrîa boothûranîtie na mpakûri, muntû ûrîa woothûranîtie îmingî gûtîkio aakûrûkithîtie nakîo. Nawe ûrîa woothûranîtie îmîkai gûtîkîo aanyiîrîîtwe nîkîo. O muntû oothûranîtie mîgaate îmûng'anîrîte.

¹⁹Musa arabeera, “Gûkágîta muntû ûtigaria noo mbi kîrî yo mwanka rûkîîrî.”

²⁰Îndî bo rî, bataathikîrîre Musa; bamwe baao nî baatigarîrie îmwe yaao mwanka rûkîîrî, nayo îrathûûka îroojûra mang'inyo na îranunka. Musa arathûûra nîbo.

²¹O rûkîîrî o rûkîîrî nî baamîûthûranagia, o muntû îrîa arîngîûmba kûrîa. Îndî riûa rîara îgakerûka.

²²Naku kûrakara atîrî, ntukû ya ithanthatû yakinya baroothûrania mîgaate mainda jaîrî ja îrîa boothûranagia o ntukû, mpakûri ijîîrî nîûntû bwa o muntû. Nabo atongeeria bonthe ba kîûthûrano nî beejîre bareera Musa mantû jau.

²³ Musa nawe arabeera atîrî, “Mantû jaja nîjo MWATHANI aathanîte: rûûjû nî ntukû ya kûnogoka buru, nî sabatû întheru ya MWATHANI. Kandeni birîa bibuîrîte gûkandwa, na bûruge birîa bibuîrîte kûrugwa, nabio bionthe birîa bigatigara nî bûbiîke mwanka rûkîîrî.”

²⁴Tontû bûû, barabiîka mwanka rûkîîrî, o ta ûrîa Musa aabeerîte. Nabio bitaanunkîre na gûtî mang'inyo jaarî ku.

²⁵Musa arauga atîrî, “Biu nîbio bûkaarîa naarua, nîûntû naarua nî sabatû ya MWATHANI. Naarua gûtîbio bûkoona oome.

²⁶Bûrîtua kûbiûthûranagia ntukû ithanthatû, îndî ntukû ya mûgwanja ta yo ntukû ya sabatû, gûtîbio bikethagîrwa birî o.”

²⁷Îndî kûrakara atîrî, ntukû ya mûgwanja antû bamwe nî baumagarîre kûûthûrania biakûrîa biu nabo gûtîbio beethîre.

²⁸MWATHANI arooria Musa atîrî, “Nî mwanka rî bûkarega kwaathîkîra maathana jaakwa na Waatho bwaakwa?

²⁹Atîrî, nîûntû MWATHANI nî abûnenkerete sabatû, nîkîo gîtûmi ntukû ya ithanthatû abûnenkagîra mîgaate ya ntukû ijîîrî. O muntû nî akarage kwaawe, na gûkágîta muntû uumagara kwaawe ntukû ya sabatû.”

³⁰Tontû bûû, antû baranogoka ntukû ya mûgwanja.

³¹ Nabo antû ba Israeli nî beetîre mîgaate îîu manna.[6] Manna yakari ja mpîndî injerû na mûchemo jwaayo ta tûmîgaate twîkîri nainchû.

³²Musa arabeera atîrî, “MWATHANI aathanîte auga ûjû: ‘Îîkeeni mpakûri îmwe ya manna îîthagîrwe îrî o nthukîîne cieenu cionthe, nîkenda bakoonaga mîgaate îrîa ndaabûmathîre nayo bûrî rwanda, rîrîa ndaabûritîre nthîgûrû ya Misri.’”

³³ Musa nawe areera Aaroni atîrî, “Jûkia nyongû wîkîre mpakûri îmwe ya manna ku naagwe ûmîîke mbere ya MWATHANI, nîkenda îîthagîrwa îrî o nthukîîne cionthe.”

³⁴Aaroni nî aamîîkîre mbere ya kîrîkanîro nîkenda îkaraga o, ta ûrîa MWATHANI eerîte Musa.

³⁵ Nabo antû ba Israeli nî baarîîre manna mîaka mîrongo îna, mwanka barakinya nthîgûrû yatûûragwa nî antû. Barîîre manna mwanka barakinya mwankeene jwa nthîgûrû ya Kanaani

³⁶Nayo mpakûri îrîa yetagwa omeri[7] yaarî ya kîthimi kîa lita îjîîrî.