Read KIMERU BIBLE PROTESTANT EDITION Kum 17 Bible Online

Kum 17 - KIMERU BIBLE PROTESTANT EDITION bible

Kum 17

¹ Nakîo kîûthûrano kîonthe gîa antû ba Israeli nî kîaumîre rwanda rwa Sini kîreeta rûgendo rwaao, gîkiumaga antû amwe gwîta angî kûrîngana na ûrîa MWATHANI aabeeraga. Nabo nî baambîre kambî Refidimu, îndî antû au gûtaarî na rûûjî rwa kûnyuwa nî antû.

²Tontû bûû, antû baranung'unîra Musa bakimwîraga, “Tûnenkere rûûjî rwa kûnyua.” Musa nawe arabooria atîrî, “Nîmbi îgûtûma bûntetia bûgeria MWATHANI?”

³Antû nabo nî baigîrue nyoonta ya rûûjî mono barî antû au, na baranung'unîra Musa, bakiugaga “Nîkî waatûritîre Misri, nîkenda wîja gûtûûragithia nyoonta amwe na aana beetû na nyomoo cieetû?”

⁴Rîu Musa arakaîra MWATHANI arooria, “Nîatîa nkûgîta antû baba, na barî akuî gûmpûûra na maiga?”

⁵MWATHANI areera Musa atîrî, “Jûkia akûrû bamwe ba Israeli ûkûrûke mbere ya antû wîîte ûgweete rûturo rûrîa waringîre naru rûûjî rwa Naili.

⁶Naani rî, nkaarûngama mbere yeenu, iigeene rîrîa rîrî kîrîmeene kîa Horebu. Naagwe ûringe iiga rîu, naru rûûjî rûkauma ku, nîkenda antû banyua.” Musa arathithia ûntû bûu mbere ya akûrû ba Israeli.

⁷Nao antû au areetwa Masaha na Meriba nîûntû bwa antû ba Israeli kûnung'una, na nîûntû bwa kûgeria MWATHANI bakiugaga, “MWATHANI arî gatîgatî geetû kana atî o?”

⁸Nabo rî, Amaleki nî beejîre kûrwîra na Israeli Refidimu.

⁹Musa areera Joshua atîrî, “Thuura antû bwîîte bûkarwee na Amaleki. Naani rûûjû nkarûngama karîmeene îgûrû ngweete rûturo rwa MWATHANI.”

¹⁰Tontû bûû, Joshua arathithia o ûrîa Musa aamwîrîte areeta kûrwaa na Amaleki. Musa na Aaroni na Huri nabo baraitia karîmeene îgûrû.

¹¹Kûrakara atîrî, o rîrîa rîonthe Musa eethagîrwa ookîrîîtie njara, Israeli nî yoombanaga; na o rîrîa rîonthe eenîka njara, Amaleki bakoombana.

¹²Îndî njara cia Musa nî cianogere; nabo barajûkia iiga bararîîka ruungu rwaawe ararîkarîra. Aaroni na Huri baragwatîîra njara ciaawe ûmwe rûteere rûmwe ûngî rûngî. Tontû bûû, njara ciaawe nî ciakarîre ciûkîîrîte mwanka riûa rîrathûa.

¹³Joshua arathiria Amaleki amwe na antû baawe na rûchiû.

¹⁴ MWATHANI nî eerîre Musa atîrî, “Andîka mantû jaja yukuune jarî Kîririkanio kîrî antû na ûjathome Joshua akiigagua, atî nkaathiria Amaleki buru batîkaririkanwe kaîrî nthîgûrûûne.”

¹⁵Musa nî aakîre kîritîro kîa igongwana na aragîîta, “MWATHANI nîwe rwano rwaakwa rwa kûthingataga”

¹⁶akiugaga, “Ûkîîria njara rûrigeene rwa MWATHANI! MWATHANI akaarûjaga na Amaleki kuuma nthukî îmwe gwîta îngî.”