Read KIMERU BIBLE PROTESTANT EDITION Kum 18 Bible Online

Kum 18 - KIMERU BIBLE PROTESTANT EDITION bible

Kum 18

¹Jethro mûthînjîri-mûrungu wa Midiani na mûthoni wa Musa, nî aigîrue jonthe jarîa Mûrungu aathithîrîtie Musa na antû baawe ba Israeli, araigua ûrîa MWATHANI aarî akûbarita Misri.

² Jethro mûthoni wa Musa nî aacokerie mwekûrû wa Musa ûrîa Musa aarî agûtiga.

³ Jethro nî eejanîrie kinya na ataana ba Zipora bobaîrî: ûmwe eetagwa Gerishoni (nîûntû Musa augaga, “Nkarîte ndî mûgeni nthîgûrûûne yaitha,”)

⁴na ûngî ageetwa Eliezeri (nîûntû Musa augaga, “Mûrungu wa baaba nîwe mûnteethia na mûntunyûkia kuuma kîrî rûchiû rwa Farao.”)

⁵Jethro mûthoni wa Musa, nî eejanîrie na ataana baawe, na mwekûrû waawe kîrî Musa rwanda arîa aambîte kambî kîrîmeene kîa Mûrungu.

⁶Nî aarî agûtûmana kîrî Musa akiugaga, “Ûûni mûthoni waaku Jethro nî mbîjîte kîrî gwe na mwekûrû waaku amwe na ataana baaku bobaîrî.”

⁷Musa nawe nî aaumagarîre kûthagaana mûthoni waawe, araigwîthia nthî mbere yaawe na aramûcûnca. Nabo baroorania cia iraaro na barakûrûka îemeene.

⁸Nîrîo Musa eerîre mûthoni waawe jarîa jonthe MWATHANI aathithîrîtie Farao na antû ba Misri nîûntû bwa Israeli, na mathîîna jarîa jonthe booneete njîreene, na ûrîa MWATHANI aaboonokerie.

⁹Jethro arakena mono nî mawega jarîa MWATHANI aathithîrîtie Israeli, mantûûne ja kûbatunyûkia njareene cia antû ba Misri.

¹⁰Jethro araromba arauga atîrî, “MWATHANI arotharimagwa we ûbûtunyûkîîtie kuuma njareene cia Amisri na cia Farao aatûma bwatiga kwinyîîrua nî Amisri.

¹¹Nandî nkûmenya MWATHANI nî ûmûnene nkûrûki ya mîrungu yonthe, nîûntû mantûûne jau jonthe nî oombanîte îgûrû rîa Amisri.”

¹²Jethro mûthoni wa Musa nî aaritîre kîgongwana gîa gwakîîria kîrî Mûrungu. Aaroni areejania na akûrû bonthe ba Israeli kûrîjanîra mîgaate na mûthoni wa Musa barî mbere ya Mûrungu.

¹³Naku nî gwakarîre atîrî, rûûnene Musa nî aakarîre kûgambîra antû. Nabo antû nî baarûngami bamûthiûrûkîrîte kuuma rûkîîrî mwanka ûgoro.

¹⁴Rîrîa mûthoni wa Musa oonere ûrîa aathithagia nîûntû bwa antû, aramûûria atîrî, “Nîatîa ûjû ûkûthithîria antû? Nîkî ûgûkara nthî wenka nabo antû bonthe bagakara barûngami bakûthiûrûkîte kuuma rûkîîrî mwanka ûgoro?”

¹⁵Musa aracokeria mûthoni waawe aramwîra, “Nîkwîthîrwa nî kîrî ni antû beejaga kûûrîrua mantû kîrî Mûrungu.

¹⁶Rîrîa barî na mateta, beejaga kîrî ni naani nkabaathûrana muntû na mûtûûri waawe, ningî nkabamenyithia mooritani ja Mûrungu na Waatho bwaawe.”

¹⁷Mûthoni wa Musa aramûcokeria aramwîra, “Ûu ûkûthithia tî bwega.

¹⁸Ûûgwe amwe na antû baba ûrî nabo nî kwinogia bûkwinogia ûtheri nîûntû ngûgî îîjî nî îndito mono kîrî gwe na ûtîûmba kûmîrita gwenka.

¹⁹Nthikîîra nandî wigue ûrîa nkuuga, nkwee kîrîra, Mûrungu arweethirwe o arî amwe naagwe. Gwe ngûgî yaaku nî kwaragîîria antû kîrî Mûrungu kûmwikagîria mathîîna jaao.

²⁰Ningî ûbaritanage mooritani na Mawaatho ja Mûrungu, na ûboonagie njîra îrîa babuîrîte gwîta nayo na jarîa babuîrîte kûthithagia.

²¹Nkûrûki ya jau thuura antû bagûciûmba kuuma kîrî kîrîndî kîonthe, antû akîri Mûrungu na eetîkua, barîa bathwîre nkukumo. Nabo antû ta bau ûbeeke îgûrû rîa antû baathage ikundi bia mangiri, na bia magana, na bia mîrongo îtaano na bia makûmi.

²²Nabo ûbarekeerie bagambagîre antû magiita jonthe. O bunka magamba jarîa manene jonthe bakûretagîre îndî tûgamba tûtûniini bagiitage bongwa. Rîu ûkoothîrwa nî mantû nabo bagakûgwatia mûrigo.

²³Ûkëeja kûthithia mantû jau o ta ûrîa Mûrungu akwaathîte, rîu ûkoomba kûûmîîria na antû baba bonthe bagaakinya kwaao na thîîrî.”

²⁴Tontû bûû, Musa araathîkîra kajû ka mûthoni waawe, arathithia jonthe jarîa aamwîrîte.

²⁵Musa arathuura antû bagûciûmba mma kuuma Israeli yonthe, arabeethia atongeeria ba antû; atongeeria ba ikundi bia mangiri-mangiri, na bia magana magana, na bia mîrongo îtaano-îtaano na bia makûmi.

²⁶Nabo atongeeria bau baratua kûgambagîra antû magiita jonthe. Najo magamba jarîa moomo jareetagîrwa Musa, îndî magamba jamoothû nî atongeeria bau bagambaga.

²⁷Nîrîo Musa arekererie mûthoni waawe araciîtîra, aracoka nthîgûrûûne yaao.