Read KIMERU BIBLE PROTESTANT EDITION Kum 19 Bible Online

Kum 19 - KIMERU BIBLE PROTESTANT EDITION bible

Kum 19

¹Ntukû îrîa antû ba Israeli baakinyîre rwanda rwa Sinai kwaarî mweriine jwa îthatû nyuma ya kuuma nthîgûrû ya Misri.

²Kuuma Refidimu beetîre barakinya rwanda rwa Sinai, baraamba kambî ku. Antû ba Israeli baambîre kambî au mbere ya kîrîma.

³Musa nawe nî aitîrie kîrîmeene kîrî Mûrungu. MWATHANI aramwîta kuuma kîrîmeene aramwîra, “Ûjû nîu ûkeera nja ya Jakubu, na ûtûmîîrie kîrî antû ba Israeli:

⁴‘Bûî nî bwacioneere ûrîa ndaathithîîrie Amisri, na ndaabûkamata na mathagu ta ndiiû na ndaabûkinyia aja kîrî ni.

⁵ Tontû bûû, nandî bûkëeja kûthikîîra kajû gaakwa na kûmenyeera kîrîkanîro gîaakwa, bûkaa gîntû gîaakwa kîa bata mono gatîgatî ka mîgongo yonthe nîûntû nthîgûrû yonthe nî yaakwa,

⁶ buî bûkaa mûgongo jwa athînjîri-Mûrungu na mûgongo jûmûtheru.’ Nteto iu nîcio ûkeera antû ba Israeli.”

⁷Tontû bûû, Musa areeta aroothûrania akûrû barîa atongeeria ba Israeli na arabaa nteto cionthe irîa MWATHANI aamwîrîte.

⁸Nabo antû bonthe baracokia amwe barauga, “Jarîa jonthe MWATHANI augîîte, tûkaathithia.” Musa nawe aracokeria MWATHANI mantû jarîa antû baugîre.

⁹MWATHANI nî eerîre Musa atîrî, “Nkeeja kîrî gwe ndî îtuune rîrîrito nîkenda antû baigua nkîaria naagwe, na nîkenda bagwîtîkagia magiita jonthe.” Musa nawe areera MWATHANI mantû jarîa antû baugîre.

¹⁰MWATHANI areera Musa: “Îta kîrî antû ûbatherie naarua na rûûjî, na ûbeere bathambie nguû ciaao,

¹¹auke beethîrwe baithuranîrîte, nîûntû ntukû îîu ya aûke MWATHANI akeenama kîrîmeene gîa Sinai antû bonthe bakîonaga.

¹² Wîkîîre antû mwanka jûrîa antû batîkûrûka kûthiûrûkîra kîrîma, na ûbeere ûjû: ‘Imenyeereni bûtîgaitie kîrîmeene kana bûringithia mîthia yaakîo. Ûrîa wonthe ûkaaringithia kîrîma, ûkagitania mîanka aitîtie kîrîmeene no mwanka ooragwe.

¹³Gûkágîta muntû ûmûtonga na njara nîûntû no ooragwe na maiga kana arathwe, îrî nyamû kana arî muntû agatigithua. Rîrîa bakaigua kajû ka tarumbeta nîrîo bagaitia kîrîmeene.’”

¹⁴Musa areenama kîrî antû kuuma kîrîmeene, arabatheria nabo barathambia nguû ciaao.

¹⁵Nawe arebeera atîrî, “Ithuranîreni nîûntû bwa ntukû ya auke gûkágîta ûthengeera mûka.”

¹⁶ Kûrakara atîrî, kûrî rûkîîrî ntukû ya ithatû, nî kwagambîre ngorogoro na kûreenia ndweni na kûragîa îtu rîrîrito kîrîmeene, nayo tarumbeta îragamba na inya mono. Nabo antû bonthe barî kambîîne barateetema.

¹⁷Musa ararita antû kambîîne arabaumagaria nîkenda beeta gûtirimana na Mûrungu, nabo bararûngama arîa kîrîma kîambîrîrîîtie.

¹⁸Kîrîma gîa Sinai kîonthe nî gîakunîki nî toogi, nîûntû MWATHANI nî aarî akwînama kîrîmeene mûthembeene jwa mwanki. Nayo toogi nî yaitagia îgûrû ja toogi ya mwanki jûmûnene na kîrîma kîonthe kîrainaina mono.

¹⁹Kajû ka tarumbeta nî geetîre na mbere kûnenea, rîu Musa araaria, na Mûrungu aramûcokeria na ngorogoro.

²⁰MWATHANI arenama kîrîmeene gîa Sinai îgûrû na areeta Musa nau kîrîmeene îgûrû, nawe Musa araitia.

²¹MWATHANI aramwîra: “Înama nthî ûkarie na antû ûbeere batîgakûrûke mwanka beejîte kîrî MWATHANI gûkûnîîra; bathithia ûu bamenye babaingî baao bakathira.

²²Kinya athînjîri-Mûrungu barîa bakeeja akuî na MWATHANI no mwanka baitherie; batîkeeje kumbuthûkîrwa nî MWATHANI.”

²³Musa areera MWATHANI atîrî, “Antû batîûmba gwitia kîrîmeene gîa Sinai nîkwîthîrwa gwe nî waatûkaanîrie ûratwîra, ‘Îkîreni mwanka jûrîa antû batîkûrûka kûthiûrûkîra kîrîma’ kîee antû aathûre.”

²⁴MWATHANI aramwîra atîrî, “Înama bwîjanie na Aaroni. Menya wîja kûreka athînjîri-Mûrungu kana antû bakûrûka mwanka beeja kîrî MWATHANI, atîkeeje kûbaumbuthûkîra abathiria.”

²⁵Tontû bûû, Musa areenama kîrî antû arabaarîria.