Read KIMERU BIBLE PROTESTANT EDITION Kum 2 Bible Online

Kum 2 - KIMERU BIBLE PROTESTANT EDITION bible

Kum 2

¹Nî kwaarî na muntû wa nchiarwa cia Lawi na nî eetîre aragûra mwarî wa nchiarwa cia Lawi.

² Mûka ûu nî aagîîre îu na araciara kaîjî. Rîrîa oonere atî nî kaana gakathongi, nî aakaithîre mîeri îthatû.

³Rîrîa mûka ûu oonere atîûmba gwîta na mbere kwitha mwana ûu, arajûkia gîkabû gîtumi na nthanje nîûntû bwaawe, arakîthinga na rami gîtîgatonye rûûjî, areekîra mwana ku, na areeka gîkabû nthanjeene rûteere rwa rûûjî rwa Naili.

⁴Mwarî wa ng'ina wa mwana ûu nî aarûngamîre gataaria nîkenda amenya ûrîa mwana akathithîrua.

⁵Mwarî wa Farao nî eetîre kwîria rûûjîîne rwa Naili nabo aarî barîa baamûmenyagîîra nî beetaîtîre rûteere rwa rûûjî. Nawe mwarî wa Farao nî oonere gîkabû nthanjeene na aratûma mwarî ûrîa waarî nthûûmba yaawe gûkîgîîra.

⁶Rîrîa aakunûrîre gîkabu aroona nî kaana kaarî ku nako nî kaarîraga. Arakaigîîrua kîaao arauga, “Gaka nî kamwe ga twaana twa Ahibirania.”

⁷Mwarî wa ng'ina wa mwana ûu areera mwarî wa Farao atîrî, “Mbîte ngagwîtîre mûgwati wa mwana kuuma kîrî aka Ahibirania akûgwatagîre mwana?”

⁸Mwarî wa Farao aramwîra, “Nthiî.” Tontû bûû, mwarî ûu nî eetîre areeta ng'ina wa mwana.

⁹Mwarî wa Farao aramwîra, “Jûkia mwana ûûjû wîte ûkangwatagîre we naani ngakweejaga îtuui.” Mûka ûu arajûkia mwana areeta nawe.

¹⁰ Mwana arakûra, nawe ng'ina aramwikia kîrî mwarî wa Farao, na araa mûtaana waawe. Mwarî wa Farao arauga “Nîka ndaamûritîre rûûjîîne” Tontû bûû, ageetagwa Musa.

¹¹ Ntukû îmwe Musa agûkûra mma, nî aumagarîre areeta kîrî antû baao na aroona bagîkinyîîrua kûrita ngûgî indito. Ningî aroona Mûmisri akîringangaga Mûhibirania, ûmwe wa antû baao.

¹²Musa aratega nteere cionthe na aroona gûtî muntû ûmwene, arooraga Mûmisri na aramûthika mûthangeene.

¹³Rûûneene akuumagara areethîra Ahibirania baîrî bakîrûjaga. Nawe areera muntû ûrîa waathangîte ûngî, “Nîmbi îgûtûma ûringa muntû weenu?”

¹⁴Muntû ûu aramûcokeria atîrî, “Nûû we ûkwethetie mûtongeeria na mûgambi wa gûtûgitîra igamba? Nîka ûkwenda kûmbûraga ja ûrîa ûrooragîre Mûmisri?” Musa araigua ûguaa na arathûgaania, “Nî mma ûntû bûû nî bûkûmenyeka.”

¹⁵ Rîrîa Farao aaigîrue mantû jau aracwaa njîra ya kûûraga Musa, îndî Musa, aramatûka kuuma kîrî Farao areeta gûtûûra nthîgûrûûne ya Midiani, arakara rûteere rwa kîthima.

¹⁶Mûthînjîri-mûrungu wa Midiani nî aarî na aarî mûgwanja; nabo nî beetîre barataa rûûjî, baroojûria nkongoroone nîkenda bakundia ng'ondu na mbûri cia îthe.

¹⁷Nabo arîîthi bareeta baraciînga îndî Musa ararûngama arabateethia na arakundia ng'ondu na mbûri ciaao rûûjî.

¹⁸Rîrîa aarî bau beetîre kîrî îthe Reueli arabooria, “Nîatîa naarua bwejanga na mpwîî?”

¹⁹Nabo baramwîra, “Kûrî Mûmisri ûmwe ûtûtunyûkîrie kuuma kîrî arîîthi na kinya atûtaîra rûûjî na akuundia ndîîthia.”

²⁰Reueli arooria aarî baawe atîrî, “Arî kû muntû ûu? Nîkî bûmûtigîre? Mwîteeni eeje arîe irio.”

²¹Musa nî eetîkîrîîrie gûtûûra na muntû ûu. Reueli nî aaere Musa mwarî waawe Zipora.

²²Zipora araciara kaîjî na Musa arageeta Gerishoni,[1] akiugaga, “Ndî mûgeni nthîgûrûûne yaitha.”

²³Nyuma ya ntukû inyingî, mûnene wa Misri nî aakuîre. Nabo antû ba Israeli baraikaîra nîûntû bwa kwîthîrwa baarî ûkomboone; na bagwikaîra barî ûkomboone îkaya rîaao rîrakinyîra Mûrungu.

²⁴ Mûrungu araigua gûkaya kwaao, na araririkana kîrîkanîro kîaawe na Abrahamu na Isaaka na Jakubu.

²⁵Mûrungu araraithîria antû ba Israeli, arathûgaania bwaao.