Read KIMERU BIBLE PROTESTANT EDITION Kum 21 Bible Online

Kum 21 - KIMERU BIBLE PROTESTANT EDITION bible

Kum 21

¹MWATHANI nî anenkeere Musa mawaatho aramwîra atîrî, “Jaja nîjo mawaatho jarîa ûkaa antû ba Israeli bathingatage:

² Muntû akëeja kûgûra nkombo Mûhibirania, îkaarita ngûgî mîaka îtaantatû. Muntû ûu akaamîrekeeria mwakeene jwa mûgwanja îciîtîre îtî kûrîa noo mbi.

³Këethîra yeejîte yonka, îciîtîre yonka, këethîra yeejîte amwe na mwekûrû waayo, mwekûrû ûu ageetania nayo.

⁴Mwene nkombo akëeja kûmîgûranîra, mwekûrû ûu akämîciarîra aana, mwekûrû ûu na aana baawe bakaa ba mwene nkombo îîu. Nkombo îîu îgaciîtîra yonka.

⁵Îndî nkombo îkëeja kuuga na mma atî ‘Nî mpendeete mwathi waakwa na mwekûrû waakwa na aana baakwa; ntîkwenda kûrekeerua mbîta,’

⁶rîu mwene nkombo akaamiikia arîa Mûrungu athaathagîîrua. Nawe amiikie mwariine kana gîtugîîne kîa mûrango na akamîtûra gûtû na mûtumi. Nayo nkombo îkamûtumîkîra ûtûûroone bwaayo bunthe.”

⁷“Muntû akëeja kwendia mwarî waawe akaa mûka nkombo, mwarî ûu atîûmba kûrekeerua aciîtîra ta ûrîa nkombo cia arûme cirekagîîrua.

⁸Mwarî ûu nkombo akëeja kûremwa nî kûgwîria mwene ûrîa ûmûtuîte waawe, rîu mwene ûu akamûrekeeria akûûrwe. Mwene ûû atîûmba kûmwendia kîrî antû ba mîgongo nîûntû nî aamîthithîrîtie ûntû bwa kûmîaîria.

⁹Mwene ûu akeeja kûthuura mwarî nkombo nîûntû bwa mûtaana waawe, mwene nkombo ûu abuîrîte kûmîthithagîria ja mwarî waawe wengwa.

¹⁰Muntû akëeja kûgûra mwekûrû ûngî, atîbuîrîte kûrigîîria mwekûrû wa mbere biakûrîa kana nguû kana mantû jarîa ja mwekûrû na mûkûrû waawe.

¹¹Muntû ûu akëeja kûremwa kûûjûria mantû jau jathatû, mwekûrû ûu agaciîtîra atî na îrîi rîa mbeecha.”

¹² “Muntû ûrîa ûkaringa muntû amûûrage no mwanka ooragwe.

¹³ Îndî akëethîrwa atîthithîtie ûntû bûû akîendaga, gûkeethîrwa nî Mûrungu ûrekeete bûkarîka, nkabûthuurîra gûntû kûrîa muntû ta ûu ageetaga gwiciitha.

¹⁴Îndî muntû akëeja gûcwaa njîra ya kûûraga muntû ûngî na witho, kinya akëethîrwa arî kîritîro kîa igongwana gîaakwa bûkamûrita o bûmûûrage.

¹⁵“Muntû ûrîa ûkaringa îthe kana ng'ina no mwanka ooragwe.

¹⁶ Ûrîa ûkaiya muntû ûngî amwendie kana eethîrwe arî nawe, no mwanka ooragwe.

¹⁷ “Muntû ûrîa ûkaruma îthe kana ng'ina no mwanka ooragwe.

¹⁸“Antû bakëeja gûteta, na ûmwe waao akaringa ûngî na iiga kana nkuundi, na mûringwa atîkue îndî akaajua akaremwa gûûkîîra,

¹⁹nawe akëeja kûûmba gûûkîîra ageetaîta na mûregi, mûmûringi atîûrua; îndî akamûrîaa îgiita rîrîa amûtereete. Gwakara ûu, amûmenyeere mwanka rîrîa akaabua buru.

²⁰“Muntû akëeja kûûra nkombo yaawe ya ntomûrûme kana ya mûka na rûturo, nayo nkombo igakua o rîo muntû ûu akaewa îkanûkia.

²¹Îndî nkombo îkëeja kûthiria ntukû îmwe kana ijîîrî îtîrakua, muntû ûu gûtî îkanûkia akaewa nîûntû nkombo nî ûmwe na mbeecha ciaawe.

²²Arûme bakëeja kûrwaa na bakîrûjaga bakaringa mwekûrû ûmûrito îu rîkauma îndî atîgîe na ûthûûku bûngî, no mwanka ûrîa ûmûringîre arîee bionthe birîa mûkûrû waawe akamwîtia; arîee kûringana na îtuîro rîa agambi.

²³Îndî gûkëeja kwîthîrwa kûrî bûngî bwonoreete îkanûkia rîkethagîrwa rîrî mwoyo kûrîwa na mwoyo.

²⁴ Riitho kûrîwa riitho, îîgo kûrîwa na îîgo, njara kûrîwa na njara, kûgûrû kûrîwa na kûgûrû,

²⁵kîîrwa kûrîwa na kîîrwa, kîronda kûrîwa na kîronda, kîringîrwa kûrîwa na kîringîrwa.

²⁶“Muntû akëeja kûringa riitho rîa nkombo yaawe ya ntomûrûme kana ya mûka rîgatûrîka, no mwanka amîrekeerie îciîtîre gûtî na îrîi nîûntû bwa riitho rîaauo.

²⁷Muntû akëeja gûkûûra îîgo rîa nkombo yaawe ya ntomûrûme kana ya mûka no mwanka amîrekeerie îciîtîre gûtî na îrîi nîûntû bwa îîgo.”

²⁸“Ndegwa ya muntû îkëeja gûtûnga ntomûrûme kana mûka agakua, ndeegwa îîu no mwanka yûragwe na maiga, nacio nyama ciaayo itîkarîwe. Îndî mwene ndeegwa îîu atîûrua nîûntû atî na maatia.

²⁹Îndî ndeegwa îîu îkëeja kwîthîrwa îtwîîre gûtûngana, na mwene akëethîrwa amenyithîtue ûntû bûu nawe atîmîmenyeere, nayo îkooraga ntomûrûme kana mûka, ndeegwa îîu îkooragwa na maiga na mwene kinya we ooragwe.

³⁰Nawe mwene ndeegwa akëeja gûtuîrwa îrîi na akarîaa rîonthe agakûûrwa mwoyo jwaawe.

³¹Ningî ndeegwa îkëeja gûtûnga kaîjî kana kaarî, mwene ndeegwa agatuîrwa kûringana na Waatho o bûu bungwa.

³²Ndeegwa îkëeja gûtûnga nkombo ya ntomûrûme kana mûka, mwene ndeegwa îîu akarîaa shekeli mîrongo îthatû cia fetha kîrî mwene nkombo, ndeegwa nayo yûragwe na maiga.

³³“Muntû akëeja gûtiga îrinya rîtîkunîki, kana akenja îrinya akarîtiga rîtîkunîki, nayo ndeegwa kana ntigiri îkëeja kûgwa ku,

³⁴mwene îrinya rîu no mwanka arîee; anenkere mwene ndeegwa kana mwene ntigiri mbeecha, nakîo kiimba kîee kîa mwene îrinya.

³⁵Ndegwa ya muntû îkëeja kûûraga ndeegwa ya muntû ûngî, antû bau nî bakeendie ndeegwa îrî mwoyo nabo bagaane mbeecha irîa ikauma. Ningî bakagaana ndeegwa îrîa îkuîte.

³⁶Îndî gûkëethîrwa kwijîkeene na mma atî ndeegwa îîu nî îtwîîre gûtûngana na atî mwene nîka aregeete kûmîmenyeera, no mwanka arîee ndeegwa na ndeegwa, nayo îrîa îkuîte yee yaawe.”