Read KIMERU BIBLE PROTESTANT EDITION Kum 22 Bible Online

Kum 22 - KIMERU BIBLE PROTESTANT EDITION bible

Kum 22

¹“Muntû akëeja kwiya ndeegwa kana ng'ondu nawe akamîthînja kana akamîendia, muntû ûu akarîaa ndeegwa îîu îmwe na ndeegwa ithaano, na ng'ondu îîu îmwe akamîrîaa na ng'ondu inya.

²Mwamba akëeja kûgwatwa akiunaga nyomba ya itha, na akaringwa agakua atîrîîrua tharike yaawe.

³Îndî akëeja kûûragwa gûgûkea akaarîîrua tharike yaawe. Mwamba no mwanka arîee birîa bionthe aiîte. Îndî akëethîrwa atî na gîntû gîa kûrîaa nakîo eendue nîkenda kîrîa aiîte kîrîwa.

⁴Îndî akëeja kwîthîrwa arî na gîntû kîrîa aiîte kîrî mwoyo: kîethîrwa kîrî ndeegwa kana ntigiri kana ng'ondu, akaarîaa maita jaîrî.

⁵“Muntû akëeja gûtûma kîthaka kana muunda jwa mîzabibû jûrîîthua, kana akarekeeria nyomoo ciaawe ikarîa kîthaka kîa muntû ungî no mwanka arîee na birîa biega buru bia kîthaka kîaawe na birîa biega bia muunda jwaawe jwa mîzabibû.

⁶“Mwanki jûkëeja kûgwata jûgataamba matîîne ja miigua naju jûkaîîthia ithûmba bia irio bibikethe kana bitîkethi birî muundeene kana jûkaîîthia muunda, mûgwatia mwanki no mwanka arîee birîa biîte.

⁷“Muntû akëeja kûnenkera muntû ûngî mbeecha kana into bingî amwithîra nacio mbeecha iu kana into biu bikëeja kwiiwa birî kwa muntû ûu ûnenkeri mwamba agwatwa arîee mainda jaîrî.

⁸Mwamba akëeja kûrega kûgwatwa mwene kûu biraithi akareetwa mbere ya Mûrungu aciîtie auge nîwe kana tî we ûjûkîîtie into bia muntû ûu ûngî.

⁹“Gûkëethîrwa kûrî na nkaanja îgûrû rîa gîntû kîngî kinya kîrîkû kîethîrwa kîrî ndeegwa kana ntigiri, kana ng'ondu, kana nguû kana gîntû kîngî kinya kîrîkû kîrîa kîûrîte, antû barîa bakûringanîra nkaanja o muntû akiugaga ‘Gîkî nî gîaakwa,’ îgamba rîkaretwa mbere ya Mûrungu. Muntû ûrîa Mûrungu akagitîra nîwe mwîyia, akarîaa mainda jaîrî ja gîntû kîu kîrî muntû ûu ûngî.

¹⁰“Muntû akëeja kûnenkera muntû ûngî ntigiri kana ndeegwa kana ng'ondu kana nyomoo îngî kinya îrîkû amwithîra; nayo îgakua kana îkagîa ûthûûkû kana îgatawa gûtî muntû ûkwona,

¹¹nî muuma jûrîa akanyuîra mbere ya MWATHANI jûkagiita îgamba rîu. Muntû ûrîa wanenkeri nyomoo eekîra ûngî akëeja gûciîtia atî atîringithîtie nyomoo îîu na njara ciaawe, mwene nyomoo îîu ageetîkîra muuma jûu na mwîki nyomoo gûtîkîo akarîaa.

¹²Îndî gûkëeja kwîthîrwa nyomoo nî kwiwa yaiîrwe kwaawe, muntû ûu no mwanka arîee mwene yo.

¹³Ningî îkëethîrwa yûûragi nî nyamû ya kîthaka, muntû ûu akamîreeta îrî ûkûûjî; na atîrîaa îîu yûûragi nî nyamû cia kîthaka.

¹⁴“Muntû akëeja kûromba nyomoo kuuma kwa mûtûûri waawe, nayo nyomoo îîu îkëeja kûringwa kana îgakua mwene atî o, muntû ûu akarîaa nyomoo îîu.

¹⁵Îndî mwene akëeja kwîthîrwa nî agûkarî o îgîkua kana îkîringwa, muntû ûu gûtîkîo akarîaa. Îndî îkëethîrwa nîka îgûkombori nî mbeecha cia gûkombora akî ikarîwa.

¹⁶ “Ntomûrûme akëeja gûcwaa mwarî karaiti ûrîa ûtagambua nî muntû ûngî na akamama nawe, no mwanka arîee rûracio na amûjûkie ae mwekûrû waawe.

¹⁷Îndî îthe wa mwarî akarega buru kweejana mwarî waawe kîrî muntû ûu, no mwanka muntû ûu arite mbeecha ing'anene na rûracio rûrîa rûritagîrwa mwarî karaiti.

¹⁸ Bûkarekagîîrieni mûka mûrogi atûûra mwoyo.

¹⁹ Muntû ûrîa wonthe ûkamama na nyomoo no mwanka ooragwe.

²⁰ “Muntû wonthe ûrîa ûkaritîra mûrungu jûngî igongwana tiga MWATHANI wenka no mwanka ooragwe buru.

²¹ “Bûkathithagîrieni ageni ûthûûku kana bûbainyîîria, tontû kinya buî bwatwîre bûrî ageni nthîgûrû ya Misri.

²²Bûkathangîkagieni ntigwa kinya îrîkû kana kaana gatî na aciari.

²³Bûkëeja kûbathangîkia nabo bagankaîra, gûtî nkaanja nkaigua kîrîro kîaao;

²⁴naani ngwatwe nî marûrû mbûûrage na rûchiû, nabo eekûrû beenu bakaa ntigwa na aana beenu batigwe batî na beethe.

²⁵ “Bûkëeja gûkoobithia mbeecha kîrî nkea ya antû baakwa barîa bûtûûranagia nabo bûkabathithagîrieni ja ûrîa aeejani marandû bathithanagîria, bûbeetia mpongeeri îgûrû rîa mbeecha iu.

²⁶ Ûkarîîja kûjûkia nguû ya muntû ûngî îrûngamîîra îraandû, ûtîkareke riûa rîthûa ûtîcokeretie mwene.

²⁷Tontû nguû îîu îkëethîrwa nîyo yonka arî nayo ya gwîkunîkîra nîmbi akaiguîkîra nayo akîmama? Nawe akëeja gûnkaîra, nkamûthikîîra nîûntû ndî wa kîaao.

²⁸ “Ûkarîîja kwaria ûthûûku îgûrû rîa Mûrungu kana ûruma ûrîa ûrî mûtongeeria gatîgatîîne keenu.

²⁹“Ûkarîîja gûcererwa ûtînditîrîte kîewa kîa maketha jaaku kîa ndibei. Nenkagîreni twaana tweenu twa tûîjî twa mbere.

³⁰Ningî bûkaathithagia o ûu na ng'ombe na ng'ondu cieenu. Karegwa kana gatûrûme gakarage na ng'ina ntukû mûgwanja; ntukû ya inyanya bûkandeetera.

³¹ Buî nîûntû bûrî antû baakwa barîa atheru bûkarîîja kûrîa nyama cia nyomoo yûragîri kîthakeene; igeragîreni kurû.”