Read KIMERU BIBLE PROTESTANT EDITION Kum 23 Bible Online

Kum 23 - KIMERU BIBLE PROTESTANT EDITION bible

Kum 23

¹ “Ûgátaambia nguutû cia ûrongo. Ûkágwatanîra na muntû ûmûûî ûmûteethia na ûkûûjî bwa ûrongo.

²Ûkáthingata mwingî mathithioone jamathûûku; ningî ûgátujanîîra ûkûûjî bwa ûrongo îgambeene ûgarûra ûûma ûthingateene na mwingî.

³ Ûkéendera muntû nkîa îgambeene.

⁴ “Ûkëeja gûtirimana na ng'ombe kana ntigiri ya mûnthû waaku yûrîte, ûmîcokie kîrî mwene.

⁵Ûkëeja kwîthîra ntigiri ya muntû ûkûthwîre îgwîte îkamamîrwa nî mûrigo, ûkamûtiganîria nayo, ûmûteethie kûmîûkîîria.

⁶ “Ûkagiria muntû nkîa mma bûrîa abuîrîte kûthithîrua îgambeene.

⁷Karaga kûraaja na mantû ja ûrongo, ningî ûkooraga muntû ûtî na maatia kana ûmwagîru, nîûntû ntîkarîagîria muntû ûmûûî.

⁸Ûkarîjûkia nkukumo nîûntû nkukumo nîka îkunîkaga muntû meetho na ikagiria nteto cia mma ithikîîrwa.

⁹ “Ûkainyîîria mûgeni; gwe nî wiijî ûrîa mûgeni aigagua nîkwîthîrwa nî bwatwîre bûrî ageni nthîgûrû ya Misri.

¹⁰ “Bwaandage miuunda yeenu îgiita rîa mîaka îtaantatû na bûkethage birîa bikaumaga ku.

¹¹Îndî mwakeene jwa mûgwanja bûrekagîrie miuunda îkanogoka îtîrîmi, nîkenda antû barîa barî na thîîna gatîgatîîne keenu boona biakûrîa na birîa bigatigara birîewe nî nyamû cia kîthaka. Ûu no u bûkaathithagia na miuunda yeenu ya mîzabibû na mîkandamia.

¹² “Ritageni ngûgî cieenu ntukû ithanthatû, îndî ntukû ya mûgwanja bûkanogoka; nîkenda ndeegwa cieenu na ntigiri cieenu ikanogoka; na kinya aana ba nkombo cieenu cia aka na ageni bakanogoka.

¹³“Menyagîîreeni mantû jonthe jarîa mbwîrîte. Bûkáromba mîrungu îngî; bûkárîmîgweta kinya mariîtwa jaayo na tûnyua tweenu.

¹⁴“O mwaka bûthithagie biatho bithatû nîûntû bwa gûnkumithia.

¹⁵ Bûthithagie mambura ja mîgaate îtiimbîthîtue mweriine jwa Abibu o ta ûrîa ndaabwathîre. Îgiita rîu rîakinya bûrîjage mîgaate îtiimbîthîtue ntukû mûgwanja nîûntû nîrîo bwaumîre Misri.

¹⁶ Ningî bûthithagie kîatho kîa maketha; maketha ja irio ja birîa bûrîmîte miuundeene yeenu ja mbere. Ningî bûthithagie kîatho kîa igaanda mûthieene jwa mwaka rîrîa bûrûkagia maketha jeenu kuuma miuundeene.

¹⁷Arûme bonthe beenu bakeeja mbere ya MWATHANI Mûrungu mainda jathatû o mwaka.

¹⁸“Bûkárîungania tharike ya kîgongwana gîaakwa na mîgaate imbithîtue, kana bûreka maguta ja nyomoo îrîa nditîri kîgongwana jarara mwanka rûûnene rûkîîrî.

¹⁹ Retageni into birîa biega buru bia maketha jeenu ja mbere nyomba ya MWATHANI Mûrungu weenu. Bûkaroruga kang'ondu kana kabûri na îria rîa ng'ina.

²⁰“Atîrî, ngatûma mûraîka mbere yeenu, abûkarie rûgendoone na abûkinyie gûntû kûrîa mbûthuranîrîte.

²¹Thikagîîreni ûrîa akûbwîra na bûmwathîkîre nîûntû bwarega kûmwathîkîra atîbûrekera meeyia jeenu nîkwîthîrwa ni ndî ndeene yaawe.

²²Îndî bûkëeja kûmwathîkîra na mma bûkaathithia jonthe jarîa mbwîrîte, nkaa mûnthû wa anthû beenu na mûthangîkia wa barîa babûthangîkagia.

²³Mûraîka waakwa akabûtongeeria na abwikie nthîgûrû ya Aamori na Ahiti na Aperizi na Akanani, na Ahivi, na Ajebusi naani nkabathiria buru.

²⁴Bûkárîturîria mîrungu yaao maru kana bûmîthaathayia kana bûthingata mantû jarîa bathithagia, îndî bûthûûkangie mîrungu yaao ya mîng'uanano na bûmiunange buru.

²⁵Buî bûthaathagie MWATHANI Mûrungu weenu, naani nkaatharima irio bieenu na rûûjî rweenu na mbweberie mîrimo.

²⁶Nthîgûrûûne yeenu gûtîkoroneka mûka ûkuuna kana nthaata. Nkabwejaga ûtûûro bûbûûjûru.

²⁷“Naani ngagûtongagîîria nîkenda makagia anthû baaku; mbangaratanagie barîa bonthe bûgatirimanaga nabo ndweene na babûmatûke.

²⁸Naani ngatûma maguu mbere yeenu; nkeenga buru Ahiti, na Akanani, na o ûrîa bûgûkûrûka nthîgûrû ciaao.

²⁹Ntîbeenga kuuma mbere yeenu na mwaka jûmwe nthîgûrû îtîkeje gûtigwa îgaanjo, nyomoo cia kîthaka nacio ciingîa ibwagia.

³⁰Tontû bûû, nkabenga mpaara mpaara, mwanka rîrîa gûkeethîrwa kûrî na antû beenu bakûng'ana naabuî bûmamîre nthî.

³¹Ngekîra mîanka ya nthîgûrû yeenu kuuma Îria Îtuune mwanka gûkinya îria rîa Mediterania; na kuuma rwanda mwanka rûûjîîne rwa Eufurate; nîkwîthîrwa nkanenkanîra atûûri ba nthîgûrû îîjî njareene cieenu naabuî bûkabeenga buru.

³²Bûkoroeja gwîka kîrîkanîro nabo kana na mîrungu yaao.

³³Bûkarîenda antû bau batûûra nthîgûrû yeenu, batîgatûme bûthithia meeyia; nîûntû bûkëeja gûtumîkîra mîrungu yaao, nî mma kîu gîkaa kîgitaria kîeenu.”