Read KIMERU BIBLE PROTESTANT EDITION Kum 24 Bible Online

Kum 24 - KIMERU BIBLE PROTESTANT EDITION bible

Kum 24

¹Mûrungu nî eerîre Musa atîrî, “Itieni kîrî MWATHANI, ûûgwe na Aaroni, na Nadabu na Abihu na akûrû mîrongo mûgwanja ba Israeli; naabuî bûthaathayie bûrî gataaria.

²Nî Musa wenka ûkeeja akuî na MWATHANI; îndî bau bangî batîîja akuî, na kîrîndî gîtiitania nawe.”

³Musa nawe nî eetîre areera antû nteto cionthe irîa MWATHANI amwîrîte, na mawaatho jonthe. Nabo antû baracokia na kajû kamwe barauga, “Mantû jarîa jonthe MWATHANI augîîte tûkajathithia.”

⁴Musa nî aandîkîre nteto irîa MWATHANI aamwîrîte cionthe. Rûûnene nî ookîrîîre araaka kîritîro kîa igongwana gîtina gîa kîrîma na areeka maiga îkûmi na jaîrî kûringana na mîîrîga îkûmi na îîrî ya Israeli.

⁵Nawe aratûma nthaka cia antû ba Israeli kûritîra MWATHANI igongwana bia gwakîîria na igongwana bia thîîrî bia ndeegwa

⁶Musa arajûkia nusu ya tharike îîu aramîîkîra mpakûriine, na nusu ya tharike îrîa yaatigeere araminyîria kîritîro kîa igongwana.

⁷Nîrîo aajûkîrie Yuku rîa kîrîkanîro arathomera antû bathikîîrîte. Nabo antû barauga, “Jarîa jonthe MWATHANI auga tûkajathithia na tûkajaathîkîra.”

⁸ Musa arajûkia tharike araminyîria antû akiugaga, “Atîrî, îîjî nî tharike ya kîrîkanîro kîrîa MWATHANI eekanîîra naabuî kûringana na nteto iu cionthe.”

⁹Musa na Aaroni, na Nadabu, na Abihu na akûrû mîrongo mûgwanja ba Israeli nî baitîrie kîrîmeene,

¹⁰nabo baroona Mûrungu wa Israeli. Ruungu rwa magûrû ja Mûrungu kwaarî na antû a gûkinyithia magûrû arîa aathithîtue na maiga ja goro ja rangi ya wiirû bwa îgûrû.

¹¹Îndî Mûrungu ataathithîria akûrû bau ba Israeli ûntû bûbûthûûku. Nabo nî bategereere Mûrungu na bararîa na kûnyua baranyua.

¹²MWATHANI nî eerîre Musa atîrî, “Itia naaja kîrî ni kîrîmeene naagwe weteere nkûnenkere maiga jaaji jarî na Waatho na maathana jarîa mpaandîkîte baritanagwa najo.”

¹³Tontû bûû, Musa na nthûûmba yaawe Joshua baraithuranîra baraitia kîrîmeene kîa Mûrungu.

¹⁴Musa areera akûrû atîrî, “Kareni aja bûtweteere mwanka rîrîa tûgacoka kîrî buî. Aaroni na Huri barî amwe naabuî, na muntû kinya ûrîkû akeethîrwa arî na ûntû nî eete kîrî bo.”

¹⁵Nîrîo Musa aitîrie kîrîmeene narîo îtu rîrakunîka kîrîma.

¹⁶Nabu ûkumio bwa MWATHANI bûrathaara kîrîmeene gîa Sinai, na îtû rîrakunîka kîrîma ntukû ithanthatû. Ntukû ya mûgwanja Mûrungu areeta Musa kuuma îtuune.

¹⁷Mwonekere jwa ûkumio bûu bwa MWATHANI jwaarî ta mwanki jûgwakana kathûmbî ga kîrîma meethoone ja antû ba Israeli.

¹⁸ Musa nî aatonyere îtuune araitia kîrîmeene. Musa arakara kîrîmeene matukû mîrongo îna, mûthenya na ûtukû.