Read KIMERU BIBLE PROTESTANT EDITION Kum 25 Bible Online

Kum 25 - KIMERU BIBLE PROTESTANT EDITION bible

Kum 25

¹MWATHANI nî aarîîrie Musa aaramwîra,

²“Arîria antû ba Israeli ûbeere barite biewa nîûntû bwaakwa. Ûjîkie biewa nîûntû bwaakwa kuuma kîrî muntû o ûrîa ûgûciendera wengwa.

³Nabio biewa birîa ûkaajûkia kuuma kîrî bo nî thaabu, na fetha, na îturutia,

⁴na nguû irîa nthongi cia rangi ya wiirû bwa îgûrû, na ya mûkû, na întuune na ithithîtue na guee ya mbûri.

⁵Ningî ûjûkie mîgûûta ya ntûrûme yaaki rangi întuune, na mîgûûta îtaguti na mîtî ya mîgaa.

⁶Ningî ûjûkie maguta ja taawa, na maguta jarîa jaeeraga bwega ja gwîtûûrîria na ubaani îrîa yeeraga bwega ya kîgongwana.

⁷Ûjûkie twiga twa goro twa kûgemia tûrîa twîtagwa onikisi, na twiga tûngî tûtwega twa kûgemia nguû ya efodi na nguû ya gwîkîra kîbara.

⁸Nabo banthithîrie antû atheru nîkenda ntûûraga gatîgatîîne kaao.

⁹Naagwe ûthithie antû au atheru kûringana na bûrîa bunthe nkwonetie mantûûne ja mwakîre jwa îema rîu, na mantûûne ja mûthithîrie jwa into birîa bionthe bigeekîrwa ku.”

¹⁰Nabo bagatuma Îthandûkû rîa mbaaû cia mîgaa; rîa ûraaja bwa centimita îgana rîmwe na mîrongo îîrî na îtaano (125cm) na kwarama centimita mîrongo mûgwanja na îthaano (75cm) na gwitia bwa îgûrû centimita mîrongo mûgwanja na îthaano (75cm).

¹¹Naabuî bûrîererie na thaabu întheru buru ndeene na oome, na bwa oome ûûmbania thaabu ûthithie mîkîîndû kûrîthiûrûkîra.

¹²Ûrîthithîrie mîkang'i îna ya thaabu wîkîre magûrû jaarîo mîkang'i îîu; mîkang'i îîrî rûteere rûmwe na îîrî îngî rûteere rûngî.

¹³Bûthithie itugî bia mîgaa bûbiereerie na thaabu.

¹⁴Nabio itugî biu bûbiîkîre mîkang'iine îîu îrî rûteere rwa îthandûkû nîkenda rîkamatagwa nayo.

¹⁵Nabio itugî bigakaraga mîkang'iine îîu ya îthandûkû na bikarîritwa ku.

¹⁶Naagwe ûgeekîra îthandûkûûne maathana jarîa ngakûnenkera jaandîki.

¹⁷ Ûthithie nkunîki îrîa îtagwa “gîtî gîa kîaao” kîa thaabu akî; ya ûraaja bwa centimita îgana rîmwe na mîrongo îîrî na îtaano (125cm) na wariî bwa centimita mîrongo mûgwanja na îthaano (75cm)

¹⁸Ningî ûthithie akerubimu baîrî ba thaabu; ûbathithie na thaabu înjûmo ûbeeke nteere cio-ijîîrî cia nkunîki îîu îtagwa gîtî gîa kîaao.

¹⁹Ûthithie mûkerubimu ûmwe rûteere rûmwe rwa gîtî gîa Kîaao na ûngî rûteere rûngî rwaakîo; akerubimu bau beethîrwe bathithîtue na gîntû kîmwe na gîtî gîa kîaao.

²⁰Nabo akerubimu beethîrwe bataambûrûkîtie mathagu jaao îgûrû rîa gîtî gîa kîaao. Ningî moothiû jaao jeethîrwe jeerekerete gîtî gîa kîaao bakare bategeene.

²¹Naagwe wîkîre kîrîkanîro kîrîa ngaakûnenkera îthandûkûûne na ûrîkîîre gîtî gîa Kîaao îgûrû rîa Îthandûkû rîu rîa kîrîkanîro.

²²Au nîo ngaatirimanaga naagwe, na nîo nkaaragîria naagwe îgûrû rîa gîtî gîa kîaao, gatîgatî ga akerubimu bobaîrî, au îthandûkûûne rîa kirîîkanîro, na nîo ngakwîragîra mantû jonthe jegiî antû ba Israeli.

²³Rî, ûthithie meetha ya mbaaû cia mîgaa, îrî na ûraaja bwa centimita îgana (100cm) na wariî bwa centimita mîrongo îtaano (50cm) na gwitia bwa îgûrû centimita mîrongo mûgwanja na ithaano (75cm).

²⁴Nayo meetha îîu ûmîereerie na thaabu întheru buru na ûûmbanie thaabu mûkîîndo kûmîthiûrûnkîra.

²⁵Wîkîre rûbaû rwa ûmatu bwa njara kûmîthiûrûkîra, na ûûmbanie thaabu mûkîîndo kûthiûrûkîra rûbaû rûu.

²⁶Nayo meetha ûmîthithîrie mîkang'i îna ya thaabu, nayo îgwatithanue na magûrû ja meetha îîu, o kûgûrû mûkang'i.

²⁷Mîkang'i îîu îkare akuî na rûbaû rûrîa rûthiurûkîte meetha, nîkenda îgwatîîra itugî birîa bikamîkamataga.

²⁸Nabio itugî bia gûkamataga meetha îîu ûbithithie na mîtî ya mîgaa na ûbiereerie na thaabu.

²⁹Ningî ûkaathithîria meetha îîu thaani, na ikombe, na mpakûri bia kûritagîra ubaani, na mpakûri ingî cia kûrita kîgongwana gîa gwîtûûrîria. Into biu ûbithithie na thaabu întheru.

³⁰ Naagwe wîkage mûgaate jwathûrîri Mûrungu meetheene îîu mbere yaakwa magiita jonthe.

³¹“Naagwe ûthithie gîtugî gîa kûrîkîîra taawa kîa thaabu; gîtina gîaakîo na mûthîrî jwaakîo jûthithue na thaabu îîthîtue bwega. Najo maûa ja ikombe na mabûûra jarîa jageemetue jathithue jarî gîntû kîmwe nakîo.

³²Nakîo kîîthîrwe kîrî na mpang'i ithanthatû ciumîre nteere ciaakîo, mpang'i ithatû rûteere rûmwe na ithatû rûteere rûngî.

³³O rwang'i kîrî iu ithanthatû rwîthîrwe rûrî na ikombe bithatû bikari ja maûa jakunûki ta ja mîtî îkarî ta mîkandamia.

³⁴Gîtugîîne gîa kûrîkîîra taawa kîongwa kûthithue maûa ja ikombe na mabûûra ta ja mîtî îkarî ta mîkandamia.

³⁵Kwîthîrwe kûrî na maûa jathithîtue na gîntû kîmwe na gîtugî kîu gîa kûrîkîîra taawa, o îûa rîîthîrwe rîrî rungu rwa mpang'i ijîîrî cia iu ithanthatû ciumîrîte gîtugîîne gîa kûrîkîîra taawa.

³⁶Mabûûra na mpang'i cia gîtugî kîu biîthîrwe birî bia gîntû kîmwe na gîtugî, bithithîtue na thaabu împûûre bwega.

³⁷Naagwe ûthithîrie gîtugî kîu gîa kûrîkîîra taawa, taawa mûgwanja; nacio taawa iu irîkîîrwe îgûrû rîaakîo nîkenda ithaarîra kîanya kîu kîrî mbere ya gîtugî.

³⁸Mîgwati ntambi na antû arîa îkaarîîkagîîrwa kûthithue na thaabu întheru buru.

³⁹Ûthithie gîtugî kîu gîa kûrîkîîra taawa na into biu bionthe na talanta[8] îmwe ya thaabu.

⁴⁰ Ningî woone ûkûbithithia kûringana na mûthithîrie jûrîa nkwoneretie kîrîmeene.”