Read KIMERU BIBLE PROTESTANT EDITION Kum 26 Bible Online

Kum 26 - KIMERU BIBLE PROTESTANT EDITION bible

Kum 26

¹“Rûteere rwa ndeene rwa îema rîa gûtirimanîra rûthithue na nanga îkûmi cia nguû ithithîtue na mîrigi îîndanîtue bwega cia rangi ya wiirû bwa îgûrû, na ya mûkû na întuune. Nacio nanga iu îtumîîrwe maûa ja akerubimu jathithîtue bwega.

²Nabu ûraaja bwa nanga o îmwe bûkeethîrwa bûrî mita îkûmi na inya (14m), nabu wariî bwîthîrwe bûrî mita ijîîrî (2m). Nanga iu ciîthîrwe irî na ithimi bimwe.

³Nanga ithaano ciîthîrwe igwatithanîtue amwe na ithaano ingî kinya cio igwatithanîtue amwe.

⁴Nangeene ya mûthia kîrî gîkundî kîa mbere kîa nanga gûtumîîrwe inyiûrû bia ndigi cia rangi ya wiirû bwa îgûrû, na kûthithue o ûu nangene ya mûthia ya gîkundi kîa biîrî kîa nanga.

⁵Naagwe ûthithie inyiûrû mîrongo îtaano nangene ya mbere kîrî gîkundi kîmwe kîa nanga, na inyiûrû mîrongo îtaano nangene ya mûthia ya gîkundi kîa nanga kîa biîrî. Inyiûrû biu bikeethîrwa birî nangene gîkundiine kîa biîrî.

⁶Ningî ûthithie mîgwati mîrongo îtaano ya thaabu cia kûgwatithania ikundi bio-biîrî bia nanga, nîkenda îema rîa gûtirimanîra rîgwatana rîaa rîmwe.

⁷“Ningî ûthithie nanga îkûmi na îmwe cia guee ya mbûri nîûntû bwa îema au îgûrû rîa îema rîa gûtirimanîra.

⁸O nanga îîthîrwe îrî na ûraaja bwa mita îkûmi na ithaano (15m), na waariî bwa mita ijîîrî (2m). Nacio nanga iu îkûmi na îmwe ciîthîrwe irî na ithimi bimwe.

⁹Naagwe ûgwatithanie nanga ithaano amwe cionka na ithanthatû amwe cionka, nayo nanga ya ithanthatû ûmîunanîre au mbere ya îema.

¹⁰Naagwe ûthithie inyiûrû mîrongo îtaano mîthieene ya nanga îrîa îrî mûthia jwa gîkundi kîmwe kîa nanga, na ûthithie inyiûrû mîrongo îtaano kîrî nanga îrîa îrî mûthia jwa gîkundi kîngî.

¹¹“Ûthithie mîgwati mîrongo îtaano ya îturutia ya kûgwatithania inyiûrû, nîkenda ikundi bio-biîrî bia nanga bitumanua biaa îema rîmwe.

¹²Nakîo gîchunchî kîa nanga kîrîa gîgûtigara ta kîo nusu nanga, gîcuuracuure bwa nyuma ya îema.

¹³Gîchunchî kîa ûraaja bwa centimita mîrongo îtaano (50) kîrîa gîgûtigara kîrî ûraaja bwa nanga nteere cio-ijîîrî gîkare gîcuuri nteere cio-ijîîrî nîkenda gîkunîka îema.

¹⁴Ningî nîûntû bwa gûkunîka îema ûthithie mîgûûta ya ntûrûme îmîake rangi întuune na îmîake rangi ya wiirû bwa îgûrû

¹⁵“Ningî ûthithie itugî bia kûrûngîka îema na mbaaû cia mîgaa.

¹⁶Itugî biu biîthîrwe birî bia ûraaja bwa mita ithaano (5m) na ûmatu bwa centimita mîrongo mûgwanja na ithaano (75cm) o gîtugî.

¹⁷Kîrî o gîtugî kwîthîrwe kuumîrîte rûbaû nteere cio-ijîîrî rwa kûgwatithania gîtugî na kîngî. Ûu nîu ûkaathithia itugî bionthe bia îema rîa gûtirimanîra.

¹⁸Itugî birîa ûkaathithia nîûntû bwa îema rîa gûtirimanîra biîthîrwe birî: itugî mîrongo îîrî nîûntû bwa rûteere rwa ûmotho;

¹⁹na ûthithie ikinyithio mîrongo îna bia fetha rungu rwa itugî biu, o ikinyithio biîrî rungu rwa o gîtugî nîûntû bwa mbaaû irîa ciumîrîte mîthieene ya itugî.

²⁰Rûteere rwa ûrîo rwa îema rîa gûtirimanîra ûthithie itugî mîrongo îîrî.

²¹Ûbithithîrie ikinyithio mîrongo îna bia fetha, o ikinyithio birî rungu rwa o gîtugî kîmwe.

²²Naru rûteere rwa nyuma rwa îema bwa rûgûrû, ûthithie itugî bitantatû.

²³Ûthithie itugî biîrî bia gwîkîrwa mîthieene yo-îîrî ya îema bwa nyuma.

²⁴Itugî biu biîthîrwe biathûkene bwa nthî îndî bigwatithenue bwa îgûrû mwogoone jwa mbere. Ûu nîu itugî bia mîthia ya îema yo-îîrî bikeethîrwa bikari.

²⁵Naku kwîthîrwe kûrî na itugî binaana na itina biaabio biîthîrwe birî bia fetha, itina îkûmi na bitaantatû bionthe, o gîtugî biîrî-biîrî.

²⁶Naagwe ûthithie mîgaamba ya mîgaa, îtaano nîûntû bwa ikingi bia rûteere rûmwe rwa îema rîa gûtirimanîra,

²⁷na îtaano îngî nîûntû bwa itugî bitaano bia rûteere rûu rûngî rwa îema rîa gûtirimanîra. Mîgaamba îtaano îngî nîûntû bwa ikingi birîa birî îemeene bwa ndeene nyuma buru rûteere rwa bwa rûgûrû.

²⁸Naju mûgaamba jwa gatîgatî jûrîa jûgakûrûkîîra gatîgatî ga itugî juume mûthia jûmwe jwa îema mwanka jûngî.

²⁹Naagwe weereerie itugî na thaabu na ûbithithîrie mîkang'i ya thaabu ya kûgwatîîra mîgaamba. Nayo mîgaamba ûmîereerie na thaabu.

³⁰Ûgaaka îema rîu rîa gûtirimanîra kûringana na mwakîre jûrîa nkwoneretie kîrîmeene.

³¹“Naagwe ûthithie nanga ya rangî ya wiirû bwa îgûrû, na ya mûkû na întuune. Nayo nanga îîu îîthîrwe îrî ya mîrigi îîndanîtue bwega na îtumîîrwe maûa ja akerubimu.

³²Ûcuurie nanga îîu itugîîne bina bia mîgaa bierereetue na thaabu, na birî na mîgwati ya thaabu na bikinyithîtue ikinyithioone bia fetha.

³³ Nanga îîu ûmîcuurie na mîgwati îîu, na ûcoke ûreete Îthandûkû rîa kîrîkanîro nyuma yaayo. Nanga îîu nîyo îkabwathûranîra antû arîa atheru na arîa atheru buru.

³⁴Nakîo gîtî gîa Kîaao ûkîrîîkîîre îgûrû rîa Îthandûkû rîa kîrîkanîro au antû arîa atheru buru.

³⁵Nayo meetha ûmîîke oome ya nanga na itugî bia kûrîkîîra taawa ûbiîke rûteere rwa bwa ûmotho rwa îema rîa gûtirimanîra bitegene na nanga îîu. Nayo meetha ûmîîke rûteere rwa bwa ûrîo rwa îema rîa gûtirimanîra.

³⁶Tontû bwa mwari jwa îema ûthithie nanga îtumi bwega na mîrigi ya rangi ya wiirû bwa îgûrû, na ya mûkû na îmîtuune, na ûmîgemie ûgîtumagîra mîtumi.

³⁷Nîûntû bwa nanga îîu ya gûkunîka îema ûthithie itugî bitaano bia mîgaa na ûbiereerie na thaabu, nayo mîgwati yaayo yereerue na thaabu, nabio ikinyithio bia itugî biu biîthîrwe birî bia îturutia.”