Read KIMERU BIBLE PROTESTANT EDITION Kum 27 Bible Online

Kum 27 - KIMERU BIBLE PROTESTANT EDITION bible

Kum 27

¹“Ningî rî, waake kîritîro kîa igongwana na mîtî ya mîgaa kîrî na ûraaja bwa mita ijîîrî na nusu (2.5m) na waariî bwa mita ijîîrî na nusu (2.5m), na gwitia bwa îgûrû mita îmwe na nusu (1.5m).

²Ûthithie ngoji mîthieene ya kîritîro kîa igongwana yo-îna, na ngoji iu ciîthîrwe ithithîtue na gîntû kîmwe na kîritîro kîa igongwana, na bionthe biereererue na îturutia.

³Ûthithie nyongû cia gwîkagîrwa mûju kuuma kîritîro kîa igongwana, na ûthithie iciko, na mpakûri, na nchibe na tûraî twa gûkamataga mwanki. Into biu bionthe bia kîritîro kîa igongwana bithithue na îturutia.

⁴Ûthithie antû ookîrîte a kûrigîîria mwanki na mwîîndo jûkari ta rûgara jwa îturutia. Îgûrû rîa mwîîndo jûu jûkari ta rûgara ûthithie mîkang'i îna mîthieene ya kîritîro kîa igongwana yo-îna.

⁵Naru rûgara rûu ûrwîîke ruungu rwa antû au gûûkîîrîte a kîritîro kîa igongwana, nîkenda rûgara rûthika kîritîro kîa igongwana kuuma nthî mwanka gatîgatî.

⁶Ningî ûthithîrie kîritîro kîa igongwana ikingi bia mîgaa na ûbiereerie na îturutia.

⁷Nabio ikingi biu bitonyithue mîkang'iine, nîkenda bikaraga nteere cio-ijîîrî cia kîritîro kîa igongwana rîrîa gîgûkamatwa.

⁸Nakîo kîritîro kîa igongwana ûkîthithie na mbaaû ûkîmenyagîîra gûtiga gîkuriî o ta ûrîa woonereetue kîrîmeene.”

⁹“Naagwe ûthithie kîarago kîa îema rîa gûtirimanîra. Rûteere rwa bwa ûmotho rwa kîarago gûcuurie nanga ya mîrigi îmîînde bwega ya ûraaja bwa mita mîrongo îtaano (50m) rûmwe.

¹⁰Itugî bia nanga îîu biîthîrwe birî mîrongo îîrî na ikinyithio biaabio mîrongo îîrî bithithîtue na îturutia. Nayo mîgwati ya itugî biu na tûrûkuurio twaabio biîthîrwe bithithîtue na fetha.

¹¹Rûteere rwa bwa ûrîo rwa kîarago kîu gûcuurue nanga o ta îîu ya ûraaja bwa mita mîrongo îtaano (50m), na itugî bia kûmîgwatîîra mîrongo îîrî na ikinyithio biaabio mîrongo îîrî bionthe bithithîtue na îturutia. Îndî mîgwati yaabio na tûrûkuurio twaabio twîthîrwe tûthithitue na fetha.

¹²Kîrî wariî bwa kîarago, rûteere rwa bwa rûgûrû gûcuurue nanga ya ûraaja bwa mita mîrongo îîrî na ithaano (25m), na itugî îkûmi na ikinyithio îkûmi.

¹³Wariî bwa kîarago rûteere rwa bwa gaiti ta ru rûteere rwa gûkûrûkîîra gûcuurue nanga ya mita mîrongo îîrî na ithaano (25m) o ûraaja.

¹⁴Nanga îrîa îgacuurua rûteere rûmwe rwa mpingîro îkeethîrwa îrî ûraaja bwa mita mûgwanja na nusu (7.5m), na kûrî na itugî bithatû na ikinyithio bithatû.

¹⁵Rûteere rûngî rwîthîrwe rûrî na nanga ya ûraaja bwa mita mûgwanja na nusu (7.5m) na itugî bithatû na ikinyithio bithatû.

¹⁶Nîûntû bwa mpingîro ya kîarago kwîthîrwe kûrî na nanga ya gûcuurua mwariine ya ûraaja bwa mita îkûmi (10m). Nayo nanga îîu îgemue na mîrigi ya rangi ya wiirû bwa îgûrû, na ya mûkû na întuune îmîînde na mîtumi. Nayo îkeethîrwa îgwatîîri nî itugî bina na ikinyithio o ta biu.

¹⁷Ikingi bionthe birîa bikathiûrûkîra kîarago bigwatithanue na tûrûkuurio twabio twa fetha. Nayo mîgwati yaayo îthithue na fetha na ikinyithio bithithue na îturutia.

¹⁸Kîarago nakîo gîkeethîrwa kîrî na ûraaja bwa mita mîrongo îtaano (50m), na wariî bwa mita mîrongo îîrî na ithaano (25m), na gwitia bwa îgûrû mita ijîîrî na nusu (2.5m). Nakîo gîcuurue nanga cia nguû îthithîtue bwega na kîîthîrwe kîrî na ikinyithio bia îturutia.

¹⁹Nabio into bionthe birîa biatumîkaga ngûgîîne cionthe îemeene rîa gûtirimanîra, na biango biarîo bionthe, na biango bia kîarago bionthe bithithue na îturutia.

²⁰“Ningî wîre antû ba Israeli bakûretere maguta ja zeituni jarîa makembu buru nîûntû bwa kûreeta weerû, nîkenda taawa îîkwa îthaaraga magiita jonthe.

²¹Aaroni na ataana baawe nîbo bakagwatagia taawa iu mbere ya MWATHANI bagaciîka îemeene rîa gûtirimanîra, oome ya gîtambaa kîrîa kîthiîkîte Îthandûkû rîa kîrîkanîro, kuuma ûgoro mwanka rûkîîrî. Ûntû bûu nî Waatho bwa kwathikagîrwa kenya na kenya nthukîîne cionthe cia antû ba Israeli.”