Read KIMERU BIBLE PROTESTANT EDITION Kum 28 Bible Online

Kum 28 - KIMERU BIBLE PROTESTANT EDITION bible

Kum 28

¹“Rî, waathûre mûtaana wa nyakwe Aaroni amwe na ataana baawe Nadabu na Abihu, na Eleazari, na Ithamari kuuma kîrî antû ba Israeli nîkenda bantumîkagîra barî athînjîri-Mûrungu.

²Ningî ûtumîre mûtaana wa nyakwe Aaroni nguû intheru; nguû cia kwonania ûtheru na inthongi.

³Warîrie antû bonthe barîa barî na ûtea, barîa mpeete ûûme, nîkenda batumîra Aaroni nguû cia kûmwethia ûmûtheru nîkenda aa mûthînjîri-Mûrungu waakwa.

⁴Nacio iji nîcio nguû irîa bagatuma; nguû ya kîbara, na efodi, na rwaambambio, na îgoti rîtumi na mîtumi, na kîremba na mûcibi. Nabo batumîre mûtaana wa nyakwe Aaroni na ataana baawe nguû intheru nîkenda bantumîkagîra nacio barî athînjîri-Mûrungu.

⁵“Nabo batumîre itambaa bia rangi îkari ta thaabu, na wiirû bwa îgûrû, na ya mûkû na întuune amwe na gîtambaa gîtumi bwega.

⁶“Nabo bathithie nguû ya efodi ya rangi îkari ta thaabu, na ya wiirû bwa îgûrû, na ya mûkû na întuune, amwe na nguû îtumi na mîrigi îîndanîtue bwega.

⁷Efodi îthîrwe îrî na tûguû twa ituro twîrî tûgwatithanîrîîtue nteere ciaayo, nîkenda îkundîkagwa natu.

⁸Naju mûcibi jûrîa îgeekîrwa jwa kûmîkundîkagîîra kauna jûthithue na gîtambaa kîmwe nayo, jwîthîrwe jûrî na rangi îkari ta thaabu, na wiirû bwa îgûrû, na ya mûkû, na întuune, ningî jûtumwe na nguû ya mîrigi îîndanîtue bwega.

⁹Ûjûkie maiga jaîrî ja onikisi ûjaandîke mariîtwa ja ataana ba Jakubu na njîra ya kwaja.

¹⁰Waandîke mariîtwa ja bataantatû ba mbere iigeene rîmwe na mariîtwa jau jakeethîrwa jatigeere ûjaandîke iigeene rîu rîngî, bathingatanîte o ûrîa baaciarîrwe.

¹¹Waandîke mariîtwa jau ja ataana ba Jakubu maigeene na njîra ya kwaja o ta ûrîa mwandîki maigeene aandîkaga na ûtea. Ningî wereerie maiga jau na thaabu.

¹²Naagwe wîîke maiga jau jo-jaîrî tûguûne tûrîa twa ituro bia efodi, nîkenda Aaroni akamataga mariîtwa ja ataana ba Israeli ituroone biaawe mbere ya MWATHANI nîkenda jaririkanagia MWATHANI ataana ba Israeli.

¹³Ûthithie mîgemio na thaabu,

¹⁴na tûmîkathî twîrî twa thaabu întheru, twîîndi ja mîkanda; natu tûmîkathi tûu ûtûgwatithanie na mîgemio îîu ya thaabu.

¹⁵“Ûthithîrie mûthînjîri-Mûrungu nguû ya gwîkîra kîbara rîrîa akionania wendi bwa MWATHANI. Nguû îîu îthithue na ûtea bûbûnene na mûthithîrie jwa efodi, na ûmîthithie na rangi ya thaabu, na înjirû ta îgûrû, na ya mûkûjûni na întuune.

¹⁶Nguû îîu îîthîrwe îng'anene wariî na ûraaja na yunanîrwe jaîrî; îrî na ûraaja bwa centimita mîrongo îîrî na ithatû (23) na wariî o bûng'ana o ûu.

¹⁷Nayo ûmîtunge na mpari inya cia maiga ja goro. Rwari rwa mbere rwîthîrwe rûrî rwa maiga jamatuune buru, na topazi, na maiga jarîa mairû buru.

¹⁸Rwari rwa ijîîrî rwîthîrwe rûrî na maiga ja goro ja rangi ya wiirû bwa îgûrû na alûmasi.

¹⁹Rwari rwa îthatû rwîthîrwe rûrî na maiga ja jasinto jamatuune ja macunkwa jamaguundu, na maiga jamatuune tunî jarîa jetagwa agate, na maiga ja mûkûjûni jarîa jetagwa amethisto.

²⁰Naru rwari rwa inya rwîthîrwe rûrî na maiga jamairû ja matî, na ja onikisi na ja jasipa ja rangi ya mûkûnyûni.

²¹Maiga jau jeethîrwe jarî îkûmi na jaîrî, o ta ûrîa ataana ba Israeli baang'ana. Najo maiga jau jakare ta kîrore o iiga rîandîki riîtwa rîa mwîrîga.

²²Ûthithîrie ngûu îû ya kîbara tûmîkathî twa thaabu întheru twîîndi ûmwe na mûkanda.

²³Ûthithîrie nguû îîu ya kîbara mîkang'i îîrî ya thaabu îîndi ta mîkanda.

²⁴Ningî ûtonyithie mîkathî yo-îîrî mîkang'iine îîu yo-îîrî îrîa îrî mîthieene ya nguû ya kîbara.

²⁵Nayo mîthia yo-îîrî ya mîkathî îgwatithanue na tûrûbaû tûrîa twa thaabu, nîkenda ûbigwatithania na tûguû twa ituro twa efodi rûteere rwa mbere.

²⁶Naagwe ûthithie mîkang'i îîrî ya thaabu, ûmîgwatîthanie mîthiene yo-îîrî ya nguû ya kîbara, bwa ndeene îriganîrîtie na efodi.

²⁷Ûthithie mîkang'i îîrî ya thaabu ûmîgwatithanîrie na tûguû twa ituro twa efodi bwa nthî mbere yaatu tu-twîrî, na îgûrû rîa mûcibi jûu jûgemetue bwega.

²⁸Nayo nguû ya kîbara bamîgwatithanie mîkang'i yaayo kîrî mîkang'i ya efodi na mûtaame jûmwirû ja îgûrû nîkenda îmamîra mûcibi jwa efodi na nîkenda îtiogoka kuuma kîrî efodi.

²⁹Aaroni akamatage nguûne ya kîbara mariîtwa ja ataana ba Israeli, ajakamatage rîrîa arî antû arîa atheru nîkenda aandikanagia bo magiita jonthe.

³⁰ Nguûne îîu ya kîbara wîkîre Ûrimu na Thumimu,[9] bikarage kîbareene kîa Aaroni rîrîa arî mbere ya MWATHANI. Tontû bûû, Aaroni nîwe ûkamenyaga wendi bwa Mûrungu îgûrû rîa antû ba Israeli magiita jonthe.

³¹“Naru rwambambio rwa efodi rûthithue rwa rangi injîrû ya îgûrû kunthe.

³²Rwambambio rûu rwîthîrwe rûrî na antû arîa kîongo gîgatonyagîîra, antû au kûthithue na mwîîndo kûthiûrûka ta ûrîa nguû itumagwa mîthia nîkenda rûtîgataambûke.

³³Rwambambio rûu kuuma kauna na kwînama bwa nthî rûgemue na maûa ja mîkukumanga ya rangi înjirû ja îgûrû, ya mûkûjûni na întuune, na gatîgatîîne ka maûa jau jagaanue na ntuara cia rangi îkari ta thaabu.

³⁴Maûa jau jeete jagîkûrûkanaga ûjû: ntuara na nkukumanga, ntuara na nkukumanga na îûa rîa nkukumanga kûrigîîria rwambambioone rûu kûrûthiûrûkîra.

³⁵Naru rwambambio rwîkagîrwe nî Aaroni rîrîa agîtumîkaga nacio ntuara ikagamba rîrîa agîkûrûka antû au atheru mbere ya MWATHANI na rîrîa akiumagara atîkeeje gûkua.

³⁶“Naagwe ûthithie thaani ya thaabu na ûmîandîke ta ûrîa mûûri jwaandîkagwa nteto iji: ‘Into bibitheru kîrî MWATHANI’

³⁷woganîrie thaani îîu kîrembeîne na kamûtame gakairû ja îgûrû, nayo thaaani îîu îkarage au ntong'oone ya kîremba.

³⁸Nayo îkarage ûthiûne bwa Aaroni, nîkenda Aaroni ajûkagia meeyia ja antû ba Israeli barîa baritaga igongwana nîkenda MWATHANI abiîtîkagîra.

³⁹Ûtume îgoti na gîtambaa gîkîega buru na kîremba kîa nguû o ta îîu, na ûtume mûcibi na mûtumi.

⁴⁰“Ûtumîre ataana ba Aaroni magoti na mîcibi na nkobia nîkenda bagîta ûkumio na bathongoma.

⁴¹Nacio nguû iu wîkîre Aaroni mûtaana wa nyakwe na ataana baawe ningî ûbeetûûrîrie maguta na kûbarîkîîra njara na kûbaathûra nîûntû bwa kwaa athînjîri-Mûrungu bamûtumîkagira.

⁴²Nabo ûbatumîre churubaarî cia kûbakunîka kîthûnu. Itumwe cia ûraaja bwa kuuma kauna mwanka biero.

⁴³Nabo Aaroni na ataana baawe beekagîre churubaarî iu bagîtonya îemeene rîa gûtirimanîra, kana rîrîa bakuîîria kîritîro kîa igongwana gûtumîkîra antûûne au atheru, nîkenda batîgaturame bakua. Mawaatho jau nîjo Aaroni na nchiarwa ciaawe bakathingataga mwanka kenya.”